Ẹ-ẹpwụ nya egbeju nya ẹla ọọwa, ahị jẹ́ nyori ẹla ọkpọnchị ookpokpo ọhẹ juwa kọ gu angịnyị ehe bala alegu-ẹrụ wuu. Ẹla ọọwa ri ịgọgọ ọ-ka chị ju ẹnyị ọtụka nya iJihova. Ụgbẹyị nya eji ọkpakpa nya iJihova ọ-háha lee ọ-háha ka ri ụpa ọhẹ nya ẹla ọkpọnchị ọwẹ. Angịnyị ehe ọ-ka godayị giri-giri lee ị́ ka họ ịnyị myị́ ka, ri ụpa ọkịla nya ẹla ọkpọnchị ọwẹ ịnyịnyị.

Ịyẹ tị́ du kahị ya lẹẹlẹẹ nyori ẹnyị nya iJihova bala ọ-ka chị ịgọgọ jwoo à ri ẹla ọlẹ kọ gụ́ wuu lẹ? Ahị yẹ ang ịta ịlẹ kị du wẹẹ.

Ọhọhẹ, ẹnyị nya iJihova Olegu Onyobyi à bịrị i-iku nya Iden lẹ. Ịtọ ẹla nya ijẹẹhị ọlẹ ká Olegu Onyobyi tọ Iivu wẹ mẹjẹ nyori ọ wẹẹ ya nyori Ohe nyị ri ọlụkpẹ ọlẹ kọ kaa wu anchẹ nyamwụ kpa hi ang ọlẹ kị baba nyamwụ. Ọọwa Olegu Onyobyi à pwa ju ẹla ọlẹ ká iJihova ya, mẹjẹ nyori ọ wụrụ Ohe ọla ọnọọkịla lẹlẹ. Lẹ ọ bịrị ẹnyị nya iJihova. Ọ wẹ ka ri “Ohe Onyobyi” ọngọ kaa chị ẹla ba ọngịnyị. (Jọn. 8:44) Nyọlẹ ká Iivu myị ju ọnọọkịla nya Ohe Onyobyi wẹẹ, ọ bịrị ehile nya Ohe bala ọ-la egbeju ọngịrị ta eji ọkpakpa nyamwụ. (Ọmwụ. 3:1-6) Daalẹ-daalẹ, Ohe Onyobyi kaa bịrị ẹnyị nya Ohe, juwa kpa ịnịịkịla pyẹ u-uhye nya ụma nya ọngọlẹ ká iJihova ri wẹẹ. Angịlẹ kị myị ju ịnịịkịla ịlịnyị à kaa ju ihi nya iJihova ka gụ́ lẹ. Lẹ, ẹla ọlẹ kọ chị ba ẹnyị ọ-la ịgọgọ nya iJihova à ri ẹla ọkịrọrọ ọlẹ kọ gụ́ wuu ẹ-ẹga nya anchẹ nya Ohe Oluhye ẹẹ. Ọọwa à ri ẹla o-ju ọmwụ nya akama ọyẹyẹ bala ọkwọ o-gugu ọlẹpwụ nya odehe ọlẹ lẹ.

Oheeye, chajị ká ang ka há hahị wuu, iJihova ka chị ịgọgọ ju ẹnyị nyamwụ, chajị ká oyoyi ọnyị myị́ ọnyị ka myị́ hyoo. Ẹlẹwẹ baba ha iJihova yẹẹyẹẹ. Ịnyị à du kọ ya nyori ọwa nyị ka “chịgọgọ ju ẹnyị ọtụka” nya ọwa lẹ. (Isi. 36:23) IJisọsị tị họ ká anchẹ ịla ọmyịmyị nya iJihova ka jẹ́ ẹla ọlẹ kọ ka baba gụ́ ẹ-ẹpwụ nya abwọ ọrịrị nyaa nyọlẹ kọ yẹkẹẹ: “Chị ịgọgọ ju ẹnyị nyang.” (Mat. 6:9) ỊBayịbụụ ya ẹla nyịlẹhị-ịlẹhị ụka lụmẹ-lụmẹ u-uhye nya ọbaba nyọka ya ogbo ha ẹnyị nya iJihova. Yẹ ọ-chụ pwokwita ịmanyị-manyị lẹẹ: “Anụ gwogbo ha [iJihova] jaabwọ kọ pwoku ẹnyị nyamwụ.” (1 Ego. 16:29; Eje. 96:8) “Anụ mwu eje rụ ụmụmẹ nya ẹnyị nyamwụ.” (Eje. 66:2) “M̀ ka gwogbo há ẹnyị nyang gbe oyi myị oyi.” (Eje. 86:12) Ụka ọhẹ lẹpwụ nya ụka ịlẹ ká iJihova la ịlọmwụ ya ẹla bwu epwoohe ri ụka ọlẹ ká iJisọsị ya ẹla u-ube ịgọgọ ọla iJerusalẹm yẹkẹẹ: “Adịda, chuchuu, chị ụmụmẹ nya ẹnyị nya ịlọng ehe.” IJihova tị wẹ ịnyịnyị yẹkẹẹ: “M dọmwụ chị ụmụmẹ nya ẹnyị nya ịlọm ehe ene-ene lẹ, m tị ka myịmyị-ị̀ juwa chọọ ehe kịlahị-ịlahị wẹẹ.”—Jọn. 12:28. a

Ọhata, irya nya iJihova kaa da ori wu ẹnyị nyamwụ ụka wuu. Kụ irya nya abwọlẹ ká ẹnyị nya iJihova ka baba ka ba ụka ká ọmayẹ ọlẹ kọ ka tụ Eji Ọkpakpa nya ỊKịrayịsị ọla Ẹka Ụnọ da á myị́ kpá  wẹẹ. Ányị ẹnyị nya iJihova à tị́ ka la alegu-ẹrụ bala angịnyị ehe wuu ụka ọọwa? Nyọka dahị ụbwọ wẹ ịtọ ẹla ọwẹ, ahị kpịtịya nya apa imiiye nya ẹla ọkpọnchị ọwẹ, kị ri angịnyị ehe ọ-ka godayị giri-giri bala eji ọkpakpa nya Ohe Oluhye. Angịnyị ehe ịlẹ kị la ọmyịmyị ka la ọmayẹ ẹ-ẹga nya o-godayị giri-giri nyaa pyịyọọ? Ehe. Ị ka la kpẹẹkpẹẹ ụka kị maa yẹ pwụ ọbaba lẹ. Ị ka ye ọhịhị ọmyịmyị-ka ụka ọwẹ lẹ. Ọ́ ka baba nyọka mẹjẹ nyori eji ọkpakpa nya Ohe Oluhye à há gụ́ lẹ ụka ọwẹ kaka. Ụka ọwẹ, alẹgụ-ẹrụ bala angịnyị ehe wuu ka yẹ jula awụlẹ bala o-ye eji ọkpakpa nya iJihova myị ịnyịnyị lẹ. Ma ẹnyị nya iJihova ka ri ang ọlẹ kọ baba gụ́ wuu ha anchẹ nyamwụ ụka ọọwa wẹẹ?

Ụka ọọwa, ọng myị́ ọng wuu ka jẹ́ ẹlịlẹhị u-uhye nya iJihova, lẹ ẹnyị nyamwụ ka la ịgọgọ pwụ ọbaba lẹ. Ma, ẹnyị nya iJihova ka kịnyaa la o-ri ang ọlẹ kọ baba gụ́ wuu ha anchẹ nyamwụ ilepwoohe bala odehe. Ịyẹ à tị́ du? Chajị ị ka yẹ jaabwọ ká iJihova ka họ ang ịlẹbyẹbyị ka ịlahị-ịlahị. Kụ irya wẹẹ: Chajị nyọlẹ ká iJisọsị ka kpịlọmwụ keji tụụbwọ hi eji ọkpakpa ha iJihova wẹẹ, Ohe ka ri “Olegbeju Agụgụ Ọtọnyị lọnyị nya ang myị́ ang wuu.” (1 Kọr. 15:28) Ụka kọ lịnyị kpá lẹ, angịnyị ehe à ka chị ọkẹkẹnị nya “ịlaa ọlala ọlẹbyẹbyị [nya] anyị nya Ohe Oluhye” lẹlẹ. (Rom. 8:21) IJihova tị ka họ irya nyamwụ ọlẹ kọ la ene-ene nyọka ya anyị nyamwụ ilepwoohe bala ilodehe jula awụlẹ ẹ-ẹpwụ nya ugbiyegu ookpokpo, jịra ịnyịnyị.—Efe. 1:10.

Ányị ọ tị́ ka la alugbiyegu nya iJihova ilepwoohe bala ilodehe ụka ká ẹlẹwẹ á họ kpá wuu? Ọ la gede-gede nyori ahị ka la irya nyọka gwogbo ha ẹnyị ọnyịịla nya iJihova kịnyaa wẹẹ. Olegu ịgọgọ kpa iDevidi da ụpwụ yẹkẹẹ: “Anụ gwogbo ha Amkpaa Ohe Oluhye . . . Anụ gwogbo ha ẹnyị ọlụmẹ-ụmẹ nyamwụ gbe oyi myị oyi!” (Eje. 72:18, 19) Ahị ka kịnyaa la ọ-yẹ agbẹyị ịkpịpyọ-kpịpyọ inyeewe ịlẹ kahị ka jẹ́-ẹ họ ịnyị gboyi myị́ oyi.

Ẹnyị nya iJihova ku ọmwakpa nya ẹla myị́ ẹla ọla u-uhye nyamwụ wuu. Lẹ, ẹnyị nyamwụ kaa kpụhị ịtịya nya ọháha nyamwụ. (1 Jọn. 4:8) Ahị ka kpịtịya ụka wuu nyori iJihova họhị ẹ-ẹpwụ nya ọháha, ọ ya ọnyị nyamwụ kiliya ọọlajị nya ọháha, bala o-ri ọ mẹjẹ la ọháha nyori eji ọkpakpa nyamwụ à há gụ́gụ wuu lẹ. Ma ahị ka kịnyaa la ọ-yẹ jaabwọ ká iJihova wẹẹ ka mẹ ọháha jẹ ẹ-ẹga nyahị gboyi myị́ oyi. Ahị ka ja tụ́ ju Adahị chwẹẹ bala o-mwu eje gwogbo ha ẹnyị ọla ịgọgọ nyamwụ gboyi myị́ oyi.—Eje. 73:28.