Ị Yẹ Ọháha Ọlẹ kị Mẹjẹ ẹ-Ẹga Nyaa
YOMARA bala anyịnamwụ alẹng—Marcelo bala Hiver—kụ epweji ochiche ọhẹ ụwa ịị Guatemala. Yomara dọmwụ nyọka jẹ́ ịBayịbụụ bala Alibeenu nya iJihova. Nyọlẹ kọ nọ chẹẹ, anyịnamwụ alẹng dọmwụ nyọka jẹ́ ang ịnyịnyị. Ma akama ọhẹ ji. Anyịnịna ịwẹ wuu kpụ idu, ị́ tị jẹ́ wa ụpwụ nya anyị kpụ idu ka. Lẹ, ọngọ mẹ ịBayịbụụ jáa à kaa wa ụpwụ ọlẹ kị wẹ kpa jẹ́ ang bala ịBayịbụụ ịlẹ kị da kpehe ẹ-ẹpwụ nya ang ọjẹ́jẹ ọọwa jaa lẹ.
Ọjịra-jịra ọ-kaka ri akama ọkịla haa. Ube nya Ịpyị-Adịrahụ ọlẹ kọ jwaa chwẹẹ gụ lụrụ, ị ka jẹ lala iminiti 40. Ịwa la ịlaa á ka jẹ́-ẹ jẹ bwu ẹpwa nyaa pwụ ụwa myị́ ka. Ma aanahị ịla ọjịra-jịra tị nwụlanọ nyọka kpaa ka ọjịra-jịra ụka wuu. Ụka ká ịwa angị ịta-ịta dọmwụ nyọka la ụpa ọọjịra-jịra ọla arịrị nya epwihi, aanahị kaa daa ụbwọ nwụlanọ gbee kị ka kpa ụpa nyaa ọọwa e-egbeju.
La Ọya Ọharụ 2019, ị dọmwụ nyọka họ ọjịra-jịra e-epweji nyaa. La ụka ọwẹ, ahụ bala ọrụ ọhẹ kị kaa ye ịlahị nya ụgbẹyị mwụ ka kụ epweji ọọwa. Ị cheje nyọka da anyịnịna ịta ịwẹ ụbwọ kị ka jẹ́-ẹ da ụpwụ bala ọ-wa ụpwụ la òja nya angị kpụ idu, nanana nyori ịwa la ịlaa á jẹ òja ọwẹ ka. Ị ka ẹga ọ-ya apwụ guru nyọka mwahị nya ala u-uhye nya òja nya angị kpụ idu bala agbẹyị ịlẹ kị kaa bwu mọọ jẹ.
Marcelo wẹẹ wẹ ịtọ-ẹla ọọjịra-jịra
Ẹ-ẹpwụ nya ọya ịmanyị-ịmanyị, ọ chịkpẹẹ anyịnịna ịta ịwẹ jẹ́ wa ụpwụ la òja nya angị kpụ idu, ọọwa tị du kị jẹ́ nwà kịlahị ẹ-ẹpwụ nya ang nya olegu ịnyịnyị. a Lẹẹlẹẹ, Yomara, Marcelo, bala Hiver ri angị ye ịlahị nya ụgbẹyị kpụrụrụ. Marcelo tị ri ọngọ myị ẹrụ ọọjịra-jịra ịnyịnyị. Ị kaa họ ụkụrwọ nya iJihova ẹ-ẹpwụ nya epwihi ọnyị myị́ ọnyị wuu. Ila ọchịchị nyaa chị wu angịkịla ịnyịnyị.
Ụbwọ ọdada ọlẹ ká anyịnịna ịta ịwẹ ye bwu ẹga nya ala ọjịra-jịra myaa lẹhị yẹẹyẹẹ. Yomara yẹkẹẹ: “Bwu ahyẹẹnụ ọhọhẹ ọlẹ kahị tọ Alibeenu nya iJihova, ị mẹ ọháha nya ịlẹhị ọlẹ ká angịnyị nya ịKịrayịsị kaa la jẹ ẹ-ẹga nyahị.” Marcelo ịnyịnyị yẹkẹẹ: “Ahị la aligu ịlam-ịlam ẹ-ẹpwụ nya ọjịra-jịra nyahị, ahị tị ri ụpa nya aanịna ịlẹ kị yẹ jula awụlẹ ẹ-ẹpwu nya ọháha chị odehe wuu ọnụ.” Yomara bala anyịnamwụ ịwẹ wẹẹ ya ẹhị rịrị gbe ụka ọlẹ kị ka kpa ẹhị nyaa yẹ jaabwọ ká odehe ọlẹ ka yẹda ka ri ịparadayịsị.—Eje. 37:10, 11; Ayị. 35:5.
a Ị họ ụpwụ ochiche ọhẹ ọlẹ kọ ri Learn to Read Braille nyọka da olidu lee ọngọ jẹ́ yọyị yẹẹyẹẹ ka ụbwọ nyọka jẹ́-ẹ wa ụpwụ bala ọ-da ụpwụ la òja nya angị kpụ idu.
