Ị mam Paddington, ẹga ká angịnyị ju iru lụmẹ gụ o-oye nya London, England. M̀ kụ bala ịnam bala aanam anyang ịta. Adam la akama ẹ-ẹga nya ere ọnwanwa, lẹ ọ-rụ hiihi.

Ụka kam ri onjwo, ịnam mẹjẹ́m nyọka raabwọ lodu ọnyị myị́ ọnyị. M̀ la ịBayịbụụ ochiche ọhẹ ọlẹ ká ụpwụ Eje Ọnyịịla à ji kem, m̀ yẹ ẹla ọlẹpwụ nyamwụ da ka eje chajị kam ka jẹ́-ẹ mwaa. M̀ kpịtịya nya ẹla ọlẹpwụ nya ụpwụ ọhẹ ọlẹ kam wa kọ gum ọ-ọkịlẹtụ. Ẹla ọọwa ri: “Ahyẹẹnụ ọhẹ juwa warị ká ijuju á ka ji kaka wẹẹ.” Omyi ẹla ịwẹ du kam jẹ́-ẹ kpa une ka ẹhị ka, m̀ kaa kụ ịlahị juwa kụ irya u-uhye nya ijuju. M̀ me irya ju ịlọm yẹkẹẹ, ‘ịngịhyẹ ka ji pyii kọ gụ ọ-ka hịhị ịịwẹ kem. Ịyẹ tị́ du kam jam?’ Ḿ tịtọ nyọka gbu ka!

M̀ tịtọ nyọka jẹ́ ang u-uhye nya ọkụmwụ odu. M̀ kaa maga nyọka ya ẹla ta egu, kà ẹga i-ju egu eji bala aligu nyam ilube-ụpwụ, bala ọ-ya ifim iluhi-uhi. Ahị kaa yọọ lala ang ịkpịpyọ bala ọ-luhi-uhi ịnyịnyị.

M̀ dọmwụ nya ọhịhị nya ụchị ọlala ụka kam gu ẹka iwo. M̀ dọmwụ nyọka nwa ẹchụ, ọọwa lẹ kọ bam ahị ahyaahị. Ọ ka nọ ka, m̀ dọmwụ nyọka nwa igbo. Ụka kam pwụ ẹka iwo kụrụ ookpokpo (11), m̀ dọmwụ nyọka ma ere ọnyọọngịrị yẹ. Nanana nyori ịpyọ nyamwụ í-hám ka, ọ hám nyọlẹ kọ kaa yam. Ịnyịnyị, eje bala ewo ọchịchị kaa hám. M̀ kaa ịpatí bala ụya ọyaya ịlẹ kị kaa họ la epwodu jaabwọ kọ chịkpẹẹ ham ka ba. M̀ kaa kpehe la epwodu bala ọ-nyà la epwodu-odu kpịbaa-kpịbaa ene ká ahị́ ka pyẹ. Nyọlẹ ká ịnyịrọ kaa chịm pyẹpyẹ ahyẹẹnụ ọkịla ọọnamwụ wẹẹ, m̀ kaa hwabwọ la ube-ụpwụ ọ-kaka. Ẹnụ kam ka, ụka lụmẹ-lụmẹ m̀ kaa juwa nwa ere ọnyọọngịrị ụka kị ja kpang mẹjẹ.

Ịmayẹ nyam ịla ẹka ohyẹẹkpe nyam uube-ụpwụ tịpyọ lụmẹ ka kpoye. Ẹla ọọwa jụ ịnam yẹẹyẹẹ bala o-ju agbama tam chajị ó jẹ́ jaabwọ ọlẹ kam jẹ́ lụrụ kaka ba ọ-ọhịhị nyam ka. Ahị rwarụ bala ọwa, ọọwa lẹ m rụ hi ẹpwa lẹlẹ. M̀ kụ bala oligu nyam ọlẹng, Tony, ọlẹ kọ ri alebwo nya ịgba ọgbagba ọlẹ kọ ri Rastafarian. Ọ kaa yoyi myịnyẹng-myịnyẹng, bala ọ-kaa kpa eteji ịnyịịngịrị ra, ịnyịnyị ị joo nya ọlabwẹga yẹẹyẹẹ. Ahyaahị m̀ kpa ẹnyị, m̀ ya ẹnyị ọọwa ma ọnyị ọlẹng lụka ọlẹ kam gu ẹka iwo kụrụ ịrwọnyẹ (16) kem wẹẹ.

M̀ tọ Alibeenu nya iJihova họhẹ-họhẹ ụka kam juwa bala angị ma anyị ịlẹ kị rwọrwụ lẹ ka, ẹ-ẹpwa ọlẹ kị họ haa nyọka kụ. Alegbeju ya ẹpwụ nya ube ọhẹ ham ụ-ụwa. Alibeenu nya iJihova angị imiiye kaa wẹ ẹga nya ịna-anjwo lala am-am ịhyẹ ụka myị́ ụka. Ẹnụtụrụ ookpokpo ọhẹ m yẹjula ang ọjẹ́jẹ nyaa. M̀ họ ịnyị lirya nyọka mẹjẹ nyori Alibeenu nya iJihova á kaa me ẹlịlẹhị jẹ ka. Ma ị wẹ ịtọ nyam ọnyị myị́ ọnyị ọlẹ kam taa ụ-ụgbẹyị ọkpẹnẹẹ bala ọ-bwu ẹpwụ nya ịBayịbụụ. Ị la dụmwọ bala ọ-la wụlẹlẹ, abwẹla nyaa ọọwa hám yẹẹyẹẹ. Lẹ myị ọnụ nyọka jẹ́ ịBayịbụụ balaa.

Ọtata lụmẹ ka, m̀ wẹ ka jẹ́ ang bwu ịBayịbụụ ọlẹ kọ yẹ ọhịhị nyam da. Bwu enjwo-enjwo nyam, kam kaa juhi nyọka gbu. Ma lẹẹlẹẹ m̀ jẹ́ ang bwu ẹla ọlẹ ká iJisọsị mẹjẹ u-uhye nya owuleji bwula igu! (ỊJọn 5:28, 29) Ịnyịnyị, m̀ jẹ́ nyori Ohe kpahị jum am kpangga. (1 iPita 5:7) Ẹla ọlụpwụ nya iJeremaya 29:11 gum ọ-ọkịlẹtụ yẹẹyẹẹ, ọ yẹkẹẹ: ‘Am iJihova je irya ọlẹ kam la chajị nyanụ. M la irya nya ọhaha nyanụ, m la irya nyọka tanụ ayịreji ka. M la irya ka ijuju nyanụ ka hiigu.’ M̀ dọmwụ nyọka la ẹhị ọrịrịị-rịrị nyori m ka hịhị gboyi myị́ oyi ị-ịParadayịsị odehe.—Eje Ọnyịịla 37:29.

Alibeenu nya iJihova mẹ ọháha nyịlẹhị jẹ ẹ-ẹga nyam. Ụka ọlẹ kam kà ọjịra-jịra nyaa họhẹ-họhẹ, ị dam ọwụraba yẹẹyẹẹ, ọng myị́ ọng nyaa la ọháha bala ọ-la dụmwọ! (ỊJọn 13:34, 35) Ọhọhọ nyaa ọwẹ datị gbanggbang hi abwọlẹ kị kaa họ ị-ịchọọchị nyam. Alibeenu nya iJihova dam ọwụraba nanana nya iwe-ahụrụ nyam. Ị ya ụka nyaa ham, ị kpahị jum bala ọ-dam ụbwọ yẹẹyẹẹ jaabwọ kọ chịla. Ọ lam lala o-ri m̀ juwa ẹ-ẹpwụ nya ugbiyegu ọtụka ọlẹ kọ la ọháha.

Bwu ịBayịbụụ ọjẹ́jẹ nyam, m̀ wẹ ka jẹ́ nyori m̀ baba nyọka ya ọhịhị nyam da nyọka pwoku ehile nya Ohe Oluhye. Ọ́ chịkpẹẹ ham nyọka tụụbwọ hi ẹchụ ọtaba ọnwanwa ka. Ịnyịnyị, eje ịhyẹ ịlẹ kam kaa ke ụrụ la kaa du ká irya nyam nyọka nwa ẹchụ ọnyọọngịrị kaa la ọngịrị gụ ọwọwa, lẹ m̀ hwabwọ la ọ-ka ke ụrụ la eje ịlịnyị. Chajị nyọlẹ kam tịtọ nyọka nwa ere lụmẹ ka lẹ, m̀ hwabwọ la ipatí ọkaka, chajị ụwa ri ẹga ọlẹ kam ka la ọmayẹ nyọka nwa ere ya. Ịnyịnyị m̀ mwahị nya aligu inyeewe ịlẹ kị ka jẹ́-ẹ dam ụbwọ nyọka họ ang ọnyịịla.—Etu 13:20.

Ịnyịnyị-ịnyịnyị, Tony juwa jẹ́ ịBayịbụụ bala Alibeenu nya iJihova. Nyọlẹ ká Alibeenu wẹ ịtọ ẹla nyamwụ wuu bwu ịBayịbụụ, ọọwa ya ọ-jẹ́ myị̀myị̀ họọ nyori ẹla ọlẹ kọ wẹ jẹ́ ri ịlẹhị. Ọ ya ọhịhị nyamwụ da yẹẹyẹẹ: ọ gbile ẹta-ẹkpẹ hi ogu ọtịpyọ nya alabwẹga ịlẹ kọ kaa ju ene-ene, hwabwọ hi oyi oyiyi, bala ọ-hwabwo la ẹchu ọnyọọngịrị ọnwanwa. Nyọka jẹ́-ẹ họ ẹla kpụ iJihova ịpyọ ọlam-ọlam, ahị ang imimiiye baba nyọka hwabwọ hi ọhịhị nya ụya bala ọ-ka họ ká anjwo nyahị ka la ewu o-chike. Lẹ ahị ye awụlẹ la 1982.

M̀ kpịtịya nya ụka ọlẹ kam kaa tịtọ nya ala ka ẹpwụ nya Ẹpwang ọ-Kụ Gbeji bala Awake!  * ịlẹ kị myì la oja nya angịlẹ kị jẹ́-ẹ ya abwẹla nyaa da myị́, ụma nya abwẹla ịlẹ kam tịtọ nyọka tụụbwọ hi ịnyịnyị. Ọgụ-ẹpẹtẹ nyaa ri ọhụ ojuju ham nya ịlẹhị-ịlẹhị. M̀ ye ọngịrị nyọka kịnyaa ja maga, ká abwọ ka chịm pyẹpyẹ ka. M̀ kaa kịnyaa la abwo ọrịrị ha iJihova nya abwọ ọ-ka chọọ pyẹpyẹ u-uhye nyam ka. Am bala Tony hu enyi Ohe nya angịhyẹ nya Alibeenu nya iJihova la Ọya Ọharwiye nya 1982.

O-ri igu bala iJihova Ohe Oluhye chị ọhịhi nyam da. Am bala Tony ye ụbwọ ọdada nya iJihova lụka ilujwo. Ahị jé ang nyọka kpụnịrọ Ohe Oluhye lụka ilujwo, ahị tị yẹ nyori ọ kaa dahị ụbwọ ụka myị́ ụka bala ọ-họ ịbaba nyahị hahị lala ugbiyegu.—Eje Ọnyịịla 55:22.

Ọ tị kpụm ịpyọ nyọlẹ kam jẹ́ da ọnyị ọlẹng bala ọnyang nyahị ụbwọ wẹ ka jé iJihova lala am-am. Lẹẹlẹẹ Ọ kaa ya ọkẹkẹnị ham ụka kam yẹ anjwo nyaa ịwa jaabwọ kị wẹẹ nwà ẹ-ẹpwụ nya ẹla ọjẹ́jẹ nya Ohe Oluhye.

Ḿ kaa kụlahị lodu juwa chuko chajị nya ijuju lee igu kaka. Am bala Tony kaa họ ụkụrwọ nya ọ-bwu ọjịra-jịra ọhẹ ka ọkịla epwihi ọnyị myị́ ọnyị nyọka jwaa ọhụ. Ahị kaa yẹjulaa mẹ ang jẹ́ angịkịla nyori kori kị la ọmyịmyị ẹ-ẹga nya iJisọsị, ịwa ịnyịnyị ka la ọhịhị ọmyịmyị-ka.