UKỌCHẸ 16

Ẹñwu Jisọs Che Iko Ki Def’ilẹ-i?

PLAY

Ichẹñwu k’amonẹ wewe f’ibe kpẹ kado Jisọs, ẹñwu ki aw’efu ma che kaki i ch’ọma kẹkẹ ki defu akpati ujẹñwu amẹñọrẹ, abẹki ak’achẹ ki n’ibe abẹki ẹnẹ ki akwu alo. Ama, a neke kọchẹ lugbo-wñ lefu egwili ọlai-wñ anẹ ile-i? Efu ukọchẹ-i, a na li amẹñwu ogbogaga ki Jisọs che kpai ẹñwu k’a neke kọchẹ kwefu-wñ.

1. Ukọlọ ẹñwu ch’ogbogaga tule ñwu Jisọs?

Ukọlọ ki ch’ogbogaga tule ñwu Jisọs che ki “na j’uchẹnyọ ojanẹ e-Ọjọ.” (Gba Luku 4:43.) I j’uchẹnyọ r’amonẹ kaki Ọjọ ad’ojanẹ abẹki ọfẹ-wñ wa ki ad’akanya amonẹ duu w’ukpoji. a Ọla Jisọs kpa ñwu ukọlọ uchẹnyọ ejẹ n. I ch’ukọlọ lẹ ọdọ mẹta ny’ukpẹru.—Matiu 9:35.

2. Ẹñwu chi ki Jisọs ch’amukọlọ awuwu ki che?

Baibul kọla lugbo amẹñwu wewe dabu ‘ukọlọ ukpahiu kpai ẹwñ awuwu kpai ujiwe e-k’Ọjọ che lefu [Jisọs].’ (Ẹwñ 2:22) Lefu ukpahiu Ọjọ, afu kp’ohimini agb’ọla-wñ gbọ, i d’ujẹñwu ñwu amonẹ wewe, i ch’ọga amonẹ kpa, i la ñọ d’abo ki kwu dajikwanẹ. (Matiu 8:23-27; 14:15-21; Mark 6:56; Luku 7:11-17) Am’awuwu ki Jisọs che du tejugede kaki Ọjọ kpẹ Jisọs wa. Ma la ñọ du tejugede kaki Jihofa n’ukpahiu ed’amihianyi wa w’ukpoji.

3. Ẹñwu a neke kọchẹ kwefu ọlai Jisọs iko ki d’efu ilẹ-i?

Jisọs agb’omu Jihofa gbọ ẹgba duu. (Gba Jọn 8:29.) Dagba ku ma akobọ, Jisọs chẹñwu ki Jihofa tene ki che gbogbo t’iko ki kwu. I du tejugede kaki i jẹ che k’amonẹ ki r’Ọjọ dagba k’ẹñwu ki gbiti ñwu ma. Todu e-lẹ, Jisọs “t’ẹwñ uwọli nọ tanẹ ñwu [wa], todu [k’awa] ki l’eju ẹrẹ-wñ.”—1 Pita 2:21.

N’UMA NYỌGBA

Kọchẹ alu ki Jisọs j’uchẹnyọ kpai alu ki ch’amukọlọ awuwu ojoji ojoji.

4. Jisọs j’uchẹnyọ r’amonẹ

Jisọs lulẹ jiji efu ọna ebutu ki neke na j’uchẹnyọ r’amonẹ wewe. Gba Luku 8:1, ubilẹ mẹ ch’oluka oji am’ene-i:

Abo ku ma jọ dama ugbo Jisọs kate owñ Jisọs j’uchẹnyọ ru?
Ẹñwu Jisọs che ki neke li amonẹ?

Ọjọ ka tanẹ kaki Mesaya aj’uchẹnyọ r’amonẹ. Gba Aizaya 61:1, 2, ubilẹ mẹ ch’oluka oji am’ene-i:

Abu am’achẹ-i chẹ le oji Jisọs?
Ẹ neju kaki amonẹ dukpẹ ku ma gb’ọla uchẹnyọ eñini-i?

5. Jisọs k’amonẹ am’ochochi ki ch’ogbogaga

I ch’uchẹnyọ lugbo Ojanẹ Ọjọ kate Jisọs kọla lugbo-wñ n, ama i ñọ kọla lugbo am’ukọ ogbogaga ojoji ojoji ki neke ch’atẹko amonẹ. Kpibe oji am’ujiwe-i ki kwefu Ọla Eka Ojuwo Lẹ k’amonẹ wewe ma nyọnyọ eñini-i. Gba Matiu 6:14, 34 kpai 7:12, ubilẹ mẹ ch’oluka oji am’ene-i:

Ẹñwu ch’amukọ ogbogaga ki Jisọs k’amonẹ efu am’ọgba-i?
Ẹ neju kaki am’ukọ-i neke ch’atẹko amonẹ eñini-i?

6. Jisọs ch’amukọlọ awuwu

Jihofa d’ukpahiu-wñ Jisọs ki neke ch’amukọlọ awuwu. G’ujiwe ka, gba Mark 5:25-34 abẹk’ẹ g’IFIDIO-i. Ubilẹ, mẹ ch’oluka oji am’ene-i.

IFIDIO: Jisọs Ch’ọga Onobulẹ Ka Kpa (5:10)

Efu ifidio-i, ẹñwu onobulẹ lẹ kẹdọno?
Ẹñwu ẹ ñeju lugbo awuwu lẹ?

Gba Jọn 5:36, ubilẹ mẹ ch’oluka oji ene-i:

Ẹñwu am’awuwu ki Jisọs che ‘agb’ibenu’ lugbo-wñ abẹki ẹñwu ma du tejugede lugbo-wñ?

Ẹ che ma?

Amẹñwu wewe k’a ma lugbo Jisọs kwefu am’ọtakada Baibul mẹlẹ-i: Matiu, Mark, Luku, kpai Jọn. Okoke abo ku ma k’amọtakada-i kọla ojoji ojoji lugbo Jisọs. Amẹñwu ojoji ojoji ku ma kọ tanẹ ajẹñwu ọhiala lugbo Jisọs ki nẹru wa eju nyọnyọ.

MATIU

Ch’ẹnẹ ejodudu ki k’ọtakada ọhiala lugbo Jisọs. I jẹñwu wa ma am’ukọ ki Jisọs kọ, ololo-wñ ch’ukọ lugbo Ojanẹ Ọjọ.
MARK

Ch’ẹnẹ ki k’ọtakada ọhiala lugbo Jisọs ki nya tule. I ka ñwu wa amẹñwu ẹnyọ ojoji ojoji ki che.
LUKU

Ch’ẹnẹ ki kọla lugbo ọna k’adua ch’ogbogaga ñwu Jisọs manyu alu ki ch’ichi ẹnyọ kpai abobulẹ.
JỌN

Ch’ẹnẹ ki kọla nyọnyọ lugbo amẹñwu ki Jisọs ka ñwu am’onukwu-wñ kpai abomunẹ. E-i ajẹñwu wa kọchẹ lugbo ọla ẹnẹ ki Jisọs che.