Isaias 55:1-13
55 Umaykayo amin a mawaw,+ mangalakayo iti danum!+
Umaykayo nga awanan iti kuarta, mangala ken mangankayo!
Wen, umaykayo mangala iti arak ken gatas+ uray awan ti kuartayo ta awan ti bayadanyo.+
2 Apay nga agbaybayadkayo iti saan a tinapay,Ken apay a gastuenyo ti urnongyo* iti saan a makapnek?
Denggendak a naimbag, mangankayo iti nasayaat a taraon,+Ken maragsakankayto unay iti nasustansia* a taraon.+
3 Dumngeg ken umasidegkayo kaniak.+
Dumngegkayo tapno agtultuloykayo nga agbiag,Ket sigurado a mangaramidak iti agnanayon a tulag kadakayo+Maitunos kadagiti ebkas ti napudno nga ayatko ken David, a dayta ket mapagtalkan.*+
4 Isu ket inaramidko kas saksi+ kadagiti nasion,Kas lider+ ken komander+ kadagiti nasion.
5 Awagamto ti maysa a nasion a saanmo nga am-ammo,Ket umayto kenka dagiti umili ti maysa a nasion a saan a makaam-ammo kenkaMaigapu ken Jehova a Diosmo,+ Daydiay Nasantuan ti Israel,Ta padayagennakanto.+
6 Birokenyo ni Jehova ta mabirokan pay.+
Umawagkayo kenkuana ta asideg pay.+
7 Panawan koma ti dakes a tao ti dalanna+Ken ti dakes a pampanunotna;Agsubli koma ken Jehova, a mangngaasinto kenkuana,+Iti Diostayo, a naan-anayto a mangpakawan* kenkuana.+
8 “Ta ti pampanunotko ket saanyo a pampanunot,+Ken dagiti dalanyo ket saanko a daldalan,” kuna ni Jehova.
9 “Ta no kasano a nangatngato ti langit ngem ti daga,Nangatngato met dagiti dalanko ngem dagiti dalanyoKen ti pampanunotko ngem ti pampanunotyo.+
10 Ta no kasano nga agtinnag ti tudo ken niebe manipud langitKen saan nga agsubli iti langit agingga a mabasa ti daga, tapno agtubo ti mula ken agbunga,A mangted iti bin-i iti agmulmula ken tinapay iti mangan,
11 Kastanto ti pagbalinan ti sao a rummuar iti ngiwatko.+
Saanto nga agsubli kaniak nga awan resultana,+No di ket sigurado nga itungpalna ti aniaman a pagragsakak,*+Ken sigurado nga agballigi iti pangibaonak.
12 Ta naragsakkayto a rummuar,+Ken maisublikayto a sitatalna.+
Agragsak ken agpukkawto dagiti bantay ken turod iti sanguananyo gapu iti rag-o,+Ken agpalakpakto dagiti kayo iti tanap.+
13 Agtubonto ti kayo a parwa imbes a siitan a mula,+Ken kayo nga arrayan imbes a makasalugsog a kasumba.
Gapu iti daytoy, agbalinto a nalatak* ni Jehova,+Maysa nga agnanayon a pagilasinan a saan a mapukaw.”
Footnotes
^ Wenno “kuarta a nagrigrigatanyo nga inurnong.”
^ Lit., “nataba.”
^ Wenno “mapagpiaran; mapagpannurayan.”
^ Wenno “sibubulosto a mangpakawan.”
^ Wenno “pagayatak.”
^ Wenno “maaddaanto iti nagan.”
