Ebanghelio ni Lucas 15:1-32
15 Mapmapan kenkuana ti amin nga agsingsingir iti buis ken dagiti managbasol tapno dumngegda kenkuana.+
2 Idaydayamudom dagiti Fariseo ken eskriba: “Makilanglangen daytoy a tao kadagiti managbasol ken makipangpangan kadakuada.”
3 Isu nga inestoriana daytoy nga ilustrasion:
4 “Asino kadakayo ti addaan iti 100 a karnero a no mapukawna ti maysa kadakuada ket dinanto panawan ti 99 iti pagpastoran ken mapanna biroken ti napukaw agingga a masarakanna?+
5 Ket inton masarakanna, ibaklayna iti abagana ket maragsakan.
6 Inton makaawiden, ayabanna dagiti gagayyem ken kaarrubana, nga ibagbagana, ‘Agragsaktayo ta nabirokakon ti napukaw a karnerok.’+
7 Ibagak kadakayo a naragragsakto idiay langit gapu iti maysa a managbasol a nagbabawi+ ngem iti 99 a nalinteg a saanda a kasapulan ti agbabawi.
8 “Wenno asino a babai nga addaan iti 10 a sinsilio a drakma* a no napukawna ti maysa, saanna a sindian ti lampara ken sagadan ti balayna tapno birokenna a naimbag dayta agingga a masarakanna?
9 Ket inton masarakanna, ayabanna dagiti gagayyem* ken kaarrubana, nga ibagbagana, ‘Agragsaktayo ta nabirokakon ti sinsilio a drakma* a napukawko.’
10 Ibagak kadakayo a maragragsakan met dagiti anghel ti Dios gapu iti maysa a managbasol a nagbabawi.”+
11 Inestoriana pay: “Adda maysa a tao a dua ti annakna a lallaki.
12 Kinuna ti inaudi, ‘Tatang, itedmo kaniakon ti tawidko.’ Isu a biningayna dagiti sanikuana nga ipatawidna iti dua nga annakna.
13 Kalpasan ti sumagmamano nga aldaw, innala ti inaudi ti amin a tawidna ket napan iti adayo a pagilian, ken sadiay a sinayangna ti sanikuana babaen ti gastador a panagbiag.
14 Idi naibusen ti amin a kuartana, dimteng ti nakaro unay a bisin iti intero a pagilian, ket nangrugin nga agrigat.
15 Napan pay ketdi nagtrabaho iti maysa kadagiti umili iti pagilian, a nangibaon kenkuana iti away tapno agtaraken kadagiti baboy.+
16 Kayatna payen ti mangan kadagiti bunga ti algarroba a kankanen dagiti baboy, ngem awan met ti mangted kenkuana.
17 “Idi nakapagpampanunot, kinunana, ‘Agsobsobra ti kanen ti amin a trabahador ni amak idinto nga addaak ditoy a matmatayen iti bisin!
18 Agawidakon ken amak ket ibagakto kenkuana: “Tatang, nakabasolak iti langit ken uray kenka.
19 Saanakon a maikari a maawagan iti anakmo. Pagbalinennak laengen a maysa kadagiti trabahadormo.”’
20 Isu a nagsubli ken amana. Uray adayo pay laeng, nakitan ni amana ket naasian unay, isu a timmaray a simmabat. Inarakupna* ti anakna ket sidudungngo nga inagkanna.
21 Kinuna kenkuana ti anak, ‘Tatang, nakabasolak iti langit ken uray kenka.+ Saanakon a maikari a maawagan iti anakmo.’
22 Ngem kinuna ti ama kadagiti adipenna, ‘Darasenyo! Mangiruarkayo iti bado, daydiay kasayaatan, ket ikawesyo kenkuana, ket mangikabilkayo iti singsing iti ramayna ken mangisuotkayo iti sandalias kadagiti sakana.
23 Inkay met alaen ti napalukmeg nga urbon a baka, partienyo ket mangan ken agselebrartayo,
24 ta natay daytoy nga anakko ngem nagbiag manen;+ napukaw ngem nabirokan met laeng.’ Ket nagragragsakda.
25 “Idi agawid ti inauna nga anakna manipud iti talon ken asidegen iti balay, nakangngeg iti tokar ken panagsasala.
26 Inayabanna ti maysa kadagiti adipen ket dinamagna no ania ti mapaspasamak.
27 Insungbat ti adipen, ‘Nagsublin ti kabsatmo, ket gapu ta simmangpet a nasalun-at,* impaparti ni tatangmo ti napalukmeg nga urbon a baka.’
28 Ngem nakapungtot ti inauna ken saan a simrek, isu a rimmuar ti amana ket inay-ayona.
29 Kinunana ken amana, ‘Adun a tawen nga agserserbiak kenka ket uray naminsan, diak sinukir dagiti bilinmo, ngem dinak man la pulos inikkan iti uray maysa nga urbon a kalding a pagsasanguanmi kadagiti gagayyemko.
30 Ngem apaman a simmangpet ti anakmo a nangsayang* iti sanikuam kadagiti balangkantis, impartiam iti napalukmeg nga urbon a baka.’
31 Kinuna ti ama, ‘Anakko, kanayon nga addaka iti dennak, ket kukuam ti amin a kukuak.
32 Ngem masapul nga agselebrar ken agragragsaktayo, ta natay ti kabsatmo ngem nagbiag; napukaw ngem nabirokan met laeng.’”
Footnotes
^ Wenno “gagayyemna a babbai.”
^ Lit., “Inapungolna ti tengnged.”
^ Wenno “natalged.”
^ Lit., “nangalun-on.”
