Ebanghelio ni Marcos 1:1-45
-
Mangasaba ni Juan a Mammautisar (1-8)
-
Panagbautisar ni Jesus (9-11)
-
Ni Jesus ket sinulisog ni Satanas (12, 13)
-
Irugi ni Jesus ti mangasaba idiay Galilea (14, 15)
-
Naayaban dagiti umuna nga adalan (16-20)
-
Naparuar ti dakes nga espiritu (21-28)
-
Adu ti paimbagen ni Jesus iti Capernaum (29-34)
-
Panagkararag iti lugar nga awan matataona (35-39)
-
Napaimbag ti agkukutel (40-45)
1 Ti pangrugian ti naimbag a damag maipapan ken Jesu-Kristo nga Anak ti Dios:
2 Kas insurat ni propeta Isaias: “(Adtoy! Ibaonko ti mensaherok nga umun-una ngem sika* a mangisagananto iti dalanmo.)+
3 Adda mangipukpukkaw idiay let-ang: ‘Isaganayo ti dalan ni Jehova!* Aramidenyo a nalinteg dagiti dalanna.’”+
4 Adda idi ni Juan a Mammautisar idiay let-ang, nga ikaskasabana ti bautismo kas simbolo ti panagbabawi tapno mapakawan dagiti basol.+
5 Napan kenkuana ti amin nga adda kadagiti teritoria ti Judea ken ti amin nga umili ti Jerusalem, ket impudnoda dagiti basolda ken binautisaranna* ida idiay Karayan Jordan.+
6 Nakabado ni Juan iti dutdot ti kamelio ken nakasinturon iti lalat.+ Dudon ken diro ti bakir ti taraonna.+
7 Ikaskasabana: “Nabilbileg ngem siak daydiay sumaruno kaniak. Saanak a maikari nga agrukob tapno mangwarwar iti galut dagiti sandaliasna.+
8 Binautisarankayo iti danum, ngem bautisarannakayto iti nasantuan nga espiritu.”+
9 Kadagidi a tiempo, naggapu ni Jesus idiay Nazaret iti Galilea ket binautisaran ni Juan idiay Jordan.+
10 Apaman a simmang-at manipud iti danum, nakitana a naglukat ti langit ken bumabbaba kenkuana ti espiritu a kasla kalapati.+
11 Ket adda timek a nangngeg manipud langit: “Sika ti Anakko a dungdungnguek; maragsakanak kenka.”+
12 Dagus a tinignay ti nasantuan nga espiritu a mapan idiay let-ang.
13 Isu a nagtalinaed sadiay iti 40 nga aldaw, a sulsulisogen ni Satanas.+ Kaduana dagiti atap nga animal, ngem dagiti anghel ti agserserbi kenkuana.+
14 Kalpasan a naaresto ni Juan, napan ni Jesus idiay Galilea,+ nga ikaskasabana ti naimbag a damag manipud iti Dios+
15 nga ibagbagana: “Dimtengen ti naikeddeng a tiempo, ket asidegen ti Pagarian ti Dios. Agbabawikayo+ ken mamatikayo iti naimbag a damag.”
16 Bayat a magmagna iti igid ti Baybay ti Galilea, nakitana ti agkabsat a mangngalap a da Simon ken Andres+ a mangiwaywayat kadagiti iketda iti baybay.+
17 Kinuna ni Jesus: “Surotendak, ket pagbalinenkayto a mangngalap iti tattao.”+
18 Dagus a pinanawanda dagiti iketda ket simmurotda kenkuana.+
19 Idi nakaadayo bassit, nakitana da Santiago ken Juan nga annak ni Zebedeo, nga adda iti bangkada a mangtartarimaan iti iketda.+
20 Dagus nga inayaban ida ni Jesus isu a pinanawanda ti amada a ni Zebedeo ken dagiti natangdanan a lallaki nga adda iti bangka ket simmurotda.
21 Napanda idiay Capernaum.
Apaman a nangrugi ti Sabbath, napan iti sinagoga tapno rugianna ti mangisuro.+
22 Nasdaaw dagiti tattao iti pamay-anna a mangisuro, ta isursurona ida a kas iti maysa nga addaan iti autoridad, saan a kas kadagiti eskriba.+
23 Pagammuan ta impukkaw ti maysa a lalaki iti sinagoga a naluganan iti dakes nga espiritu:
24 “Apay nga immayka ditoy, Jesus a Nazareno?+ Umaynakami kadi dadaelen? Ammok no asinoka a talaga, sika ti Nasantuan nga Adipen ti Dios!”+
25 Ngem tinubngar ni Jesus ti demonio: “Agulimekka! Rummuarka kenkuana!”
26 Pinagkuyegyeg ti dakes nga espiritu ti lalaki, ket nagriaw iti nakapigpigsa sa rimmuar kenkuana.
27 Napalalo ti siddaaw dagiti tattao ket imbagada: “Ania daytoy? Baro a pannursuro! Adda pannakabalinna a mangparuar kadagiti dakes nga espiritu, ken agtulnogda kenkuana.”
28 Nagbiit a nagwaras ti damag maipapan ken Jesus iti intero a Galilea.
29 Pimmanawda iti sinagoga sa napanda idiay balay da Simon ken Andres a kaduada da Santiago ken Juan.+
30 Aggurigor ken agid-idda idi ti babai a katugangan ni Simon+ isu a dagus nga imbagada ken Jesus.
31 Napan iti ayan ti babai sa iniggamanna ti imana ken tinulonganna a bumangon. Immimbag ti gurigorna ket nagserbi kadakuada.
32 Idi limneken ti init, impan dagiti tattao kenkuana ti amin a masakit ken naluganan iti demonio;+
33 ket ti intero a siudad inaribungbonganda ti ridaw dayta a balay.
34 Isu a pinaimbagna ti adu a masakit a nagduduma ti sakitda.+ Pinaruarna met ti adu a demonio, ngem saanna nga impalubos nga agsao dagiti demonio, ta ammoda nga isu ti Kristo.*
35 Kabigatanna, bayat a nasipnget pay, bimmangon ken napan iti lugar nga awan matataona ket nagkararag sadiay.+
36 Ngem binirok ni Simon ken dagiti kakaduana.
37 Idi nasarakanda, imbagada: “Birbirokendaka ti amin.”
38 Ngem insungbatna: “Intayo pay kadagiti sabali nga ili iti asideg, tapno mangasabaak met sadiay, ta dayta ti panggep nga immayak.”+
39 Ket napan nangaskasaba kadagiti sinagoga iti intero a Galilea ken nangparparuar kadagiti demonio.+
40 Immasideg met kenkuana ti maysa nga agkukutel. Nagparintumeng ken impakpakaasina: “Apo, no kayatmo laeng koma, mapaimbagnak.”+
41 Naasian ket sinagidna ti lalaki, sa kinunana: “Kayatko! Umimbagka.”+
42 Dagus a napukaw ti kukutelna, ket immimbag.
43 Sakbay a pimmanaw ti lalaki, inyunay-unay ni Jesus kenkuana:
44 “Dimo pulos ibagbaga daytoy iti asinoman, ngem mapanka agpakita iti padi, ket idatonmo dagiti imbilin ni Moises+ para iti pannakadalusmo, kas pammaneknek kadakuada nga immimbagkan.”+
45 Ngem idi nakapanawen, impadpadamag ken inyes-estoriana ti napasamak kenkuana isu a saanen a nawaya ni Jesus a sumrek iti siudad. Nagyan kadagiti lugar nga awan matataona iti ruar ti siudad. Ngem dandanonen latta dagiti tattao manipud iti amin a lugar.+
Footnotes
^ Lit., “iti sanguanan ti rupam.”
^ Wenno “intanebna.”
^ Wenno mabalin nga, “am-ammoda isuna.”
