Ebanghelio ni Marcos 11:1-33
11 Idi asidegdan iti Jerusalem ken addadan iti Bantay Dagiti Olibo nga ayan ti Betfage ken Betania,+ imbaonna ti dua kadagiti adalanna+
2 ket kinunana: “Mapankayo iti masungad a purok, ket inton makastrekkayo, makakitakayto iti naigalut nga urbon nga asno a di pay nasaksakayan. Warwaranyo ken iyegyo ditoy.
3 Ket no adda agsaludsod, ‘Apay a warwarwaranyo ti asno?’ ibagayo, ‘Kasapulan daytoy ti Apo. Isublinanto met la a dagus ditoy.’”
4 Isu a napanda ket nakakitada iti asno iti ridaw ti maysa a balay iti igid ti dalan, ket winarwaranda dayta.+
5 Ngem insaludsod ti dadduma nga agtaktakder sadiay: “Apay a warwarwaranyo ti urbon nga asno?”
6 Imbagada ti kinuna ni Jesus, isu a pinalubosan ida dagiti tattao.
7 Impanda ti urbon nga asno+ ken Jesus, ket inyap-apda iti asno ti makinruar a badoda sa nagsakay ni Jesus.+
8 Adu met ti nangyaplag iti makinruar a badoda iti dalan. Nangtukkol met ti dadduma kadagiti bulbulong iti igid ti dalan.+
9 Ket ipukpukkaw dagidiay magmagna iti sango ken likud: “Maisalakan koma!+ Mabendisionan koma daydiay umay iti nagan ni Jehova!*+
10 Bendisionan koma ti Dios ti um-umay a Pagarian ni amatayo a David!+ Isalakan koma daydiay agnanaed iti langit!”
11 Simrek iti Jerusalem sa napan iti templo. Kinitana ti amin nga adda iti aglawlaw, ngem gapu ta dandanin sumipnget, napan idiay Betania a kaduana ti Sangapulo ket Dua.+
12 Kabigatanna, idi pumampanawdan idiay Betania, mabisinen.+
13 Iti pangadaywen bassit, nakakita iti adda bulbulongna a kayo a higos, ket napanna kinita no adda bungana. Ngem idi naasitganna, puro bulong ti nakitana, ta saan pay idi a panagbubunga ti higos.
14 Isu nga imbagana: “Awan koman a pulos ti mangan iti bungam.”+ Nangngeg dayta dagiti adalanna.
15 Idi makadanondan idiay Jerusalem, simrek iti templo ket pinapanawna dagiti aglaklako ken aggatgatang, ken binalintuagna dagiti lamisaan dagiti agsuksukat iti kuarta ken dagiti tugaw dagiti aglaklako iti kalapati.+
16 Pinaritanna met ti asinoman nga adda awitna a lumasat iti templo.
17 Insurona pay kadakuada: “Saan kadi a naisurat, ‘Ti balayko ket maawaganto iti balay a pagkararagan para iti amin a nasion’?+ Ngem pinagbalinyo a kueba dagiti mannanakaw.”+
18 Idi nadamag dayta dagiti panguluen a papadi ken eskriba, implanoda no kasanoda a patayen;+ ta mabutengda kenkuana gapu ta masmasdaaw ken magusgustuan ti amin a tattao ti pannursurona.+
19 Idi lumlumneken ti init, rimmuarda iti siudad.
20 Kabigatanna, idi magmagnada, nakitada a nalaylayen ti kayo a higos manipud kadagiti ramutna.+
21 Nalagip ni Pedro ti imbaga ni Jesus, ket kinunana: “Rabbi, kitaem! Nalaylayen ti kayo a higos nga inlunodmo.”+
22 Imbaga ni Jesus kadakuada: “Mamatikayo iti Dios.
23 Pudno kunak kadakayo a ti asinoman a mangibaga iti daytoy a bantay, ‘Umaliska ket tumpuakka iti baybay,’ ken saan a pulos nga agduadua no di ket mamati a pumayso ti imbagana, mapasamakto dayta.+
24 Isu a kunak kadakayo nga amin nga ikararag ken dawatenyo, patienyo a naawatyon dagita, ket sigurado a maaddanto kadakayo.+
25 Inton agtakderkayo nga agkararag, pakawanenyo ti asinoman a nakabasol kadakayo, tapno ni Amayo idiay langit pakawanennanto met dagiti basolyo.”+
26 * ——
27 Napanda manen idiay Jerusalem. Bayat a magmagna iti templo, immay dagiti panguluen a papadi, eskriba, ken panglakayen
28 ket kinunada: “Nangalaam iti autoridadmo a mangaramid kadagitoy a banag? Wenno asino ti nangted kenka iti autoridad a mangaramid kadagitoy a banag?”+
29 Insungbat ni Jesus: “Adda met saludsodek kadakayo. Sungbatandak, ket ibagak kadakayo no naggapuan ti autoridadko a mangaramid kadagitoy a banag.
30 Naggapu kadi idiay langit ti panangbautisar ni Juan+ wenno naggapu kadagiti tattao? Sungbatandak.”+
31 Isu a kinunada iti maysa ken maysa: “No ibagatayo, ‘Naggapu idiay langit,’ kunananto, ‘Apay ngarud a saanyo a pinati?’
32 Ngem ibagatayo kadi, ‘Naggapu kadagiti tattao’?” Mabutengda ngamin kadagiti tattao ta mamatida amin a talaga a propeta ni Juan.+
33 Isu nga insungbatda ken Jesus: “Saanmi nga ammo.” Kinuna ni Jesus kadakuada: “Diak met ngarud ibaga no naggapuan ti autoridadko a mangaramid kadagitoy a banag.”
