Ebanghelio ni Mateo 13:1-58
-
DAGITI ILUSTRASION MAIPAPAN ITI PAGARIAN (1-52)
-
Ti nagmula (1-9)
-
No apay a nagusar ni Jesus kadagiti ilustrasion (10-17)
-
Nailawlawag ti ilustrasion maipapan iti tao a nagmula (18-23)
-
Ti trigo ken ruot (24-30)
-
Ti bukel ti mustasa ken ti lebadura (31-33)
-
Mausar dagiti ilustrasion kas kaitungpalan ti padto (34, 35)
-
Nailawlawag ti ilustrasion maipapan iti trigo ken ruot (36-43)
-
Ti nailemmeng a gameng ken dagiti nasayaat a perlas (44-46)
-
Ti iket (47-50)
-
Baro ken daan a gameng (51, 52)
-
-
Saan a namati ken Jesus dagiti kailianna (53-58)
13 Iti dayta nga aldaw, rimmuar ni Jesus iti dayta a balay ket nagtugaw iti igid ti baybay.
2 Gapu ta inaribungbongan ti adu a tattao, naglugan iti bangka ket nagtugaw bayat a nakatakder dagiti tattao iti igid ti baybay.+
3 Adu a banag ti insurona kadakuada babaen kadagiti ilustrasion.+ Kinunana: “Adtoy! Maysa a tao ti napan nagmula.+
4 Bayat nga agiwarwaris iti bin-i, nagdisso ti dadduma iti igid ti dalan, ket tinuktok dagiti billit.+
5 Nagdisso met ti dadduma iti kabatuan a bassit laeng ti dagana ket alistoda a nagtubo ta narabaw ti daga.+
6 Ngem idi naginit, nalaylay ken nagangoda ta saanda pay a nakaramut.
7 Adda met dagiti nagdisso kadagiti siitan a mula, ket linapdanda ti panagdakkel dagiti bin-i.+
8 Nagdisso ti dadduma iti nasayaat a daga, ket adda dagiti nagbunga iti mamin-100, adda met 60, ken adda 30.+
9 Asinoman nga adda lapayagna, dumngeg koma.”+
10 Immasideg dagiti adalan ket insaludsodda: “Apay nga agus-usarka kadagiti ilustrasion iti panangisurom kadakuada?”+
11 Insungbatna: “Naited kadakayo ti gundaway a mangtarus kadagiti sagrado a palimed+ maipapan iti Pagarian ti langit, ngem saan kadakuada.
12 Ta asinoman nga addaan, ad-adunto pay ti maited kenkuana ket aglaplapusananto; ngem ti asinoman nga awanan, maalanto uray ti adda kenkuana.+
13 Daytoy ti makagapu nga agus-usarak kadagiti ilustrasion no isurok ida; ta kumitkitada ngem awan ti makitada, dumdumngegda ngem awan ti mangngeg ken matarusanda.+
14 Matungtungpal kadakuada ti padto ni Isaias, a nagkuna: ‘Dumngegkayto ngem awan ti maawatanyo, ken kumitakayto ngem awan ti makitayo.+
15 Ta timmangken ti puso daytoy nga ili. Adda lapayagda ngem saanda a makangngeg. Inkidemda dagiti matada tapno saanda a makakita ken inapputda dagiti lapayagda tapno saanda a makangngeg. Gapuna, awan ti maawatan ti pusoda ken saanda a kayat ti agbalbaliw tapno paimbagek ida.’+
16 “Ngem naragsakkayo ta makakita dagiti matayo ken makangngeg dagiti lapayagyo.+
17 Ta pudno kunak kadakayo, kayat ti adu a propeta ken nalinteg a tattao a makita dagiti makitkitayo ngem saanda a nakita,+ ken kayatda a mangngeg dagiti mangmangngegyo ngem saanda a nangngeg.
18 “Denggenyo ngarud ti ilustrasion maipapan iti tao a nagmula.+
19 No dumngeg ti maysa iti sao maipapan iti Pagarian ngem saanna a matarusan, umay daydiay managdakdakes+ ket alaenna ti naimula iti pusona; daytoy ti bin-i a naimula iti igid ti dalan.+
20 Ti met naimula iti kabatuan ket daydiay dimngeg iti dayta a sao ken naragsakan a nangawat iti dayta.+
21 Ngem gapu ta saan a nakauneg ti ramutna, saan a nakapagbayag. Ket no agrigat wenno maidadanes gapu iti sao ti Dios, nalaka laeng a maitibkol.
22 Ti met naimula iti nagbabaetan dagiti siitan a mula ket daydiay dimngeg iti sao. Ngem nalapdan ti sao gapu iti pakaringgoran iti daytoy a sistema ti bambanag*+ ken iti kinabaknang a mangal-allilaw iti adu isu a saan a nagbunga dayta.+
23 Ti met naimula iti nasayaat a daga ket daydiay dimngeg iti sao ken natarusanna. Adda nagbunga iti mamin-100, adda met 60, ken adda 30.”+
24 Nangted pay ni Jesus iti sabali nga ilustrasion, ket kinunana: “Ti Pagarian ti langit ket mayarig iti tao a nagimula kadagiti nasayaat a bin-i iti talonna.
25 Bayat a matmaturog dagiti tattao, immay ti kabusorna ket nangimula kadagiti ruot iti nagbabaetan dagiti trigo sa pimmanaw.
26 Idi dimmakkel ken nagdawa dagiti mula, dimmakkel met dagiti ruot.
27 Gapuna, immay dagiti adipen dayta a tao ket kinunada, ‘Apo, saan aya a nasasayaat a bin-i ti immulam iti talonmo? Naggapgapuan ngarud dagiti ruotna?’
28 Insungbatna, ‘Maysa a kabusor ti nangaramid iti daytoy.’+ Kinuna dagiti adipenna, ‘Kayatmo kadi a parutenmi dagita?’
29 Insungbatna, ‘Saan, amangan no maparutyo met dagiti trigo.
30 Bay-anyo nga aggiddanda a dumakkel agingga iti panagani, ket ibagakto kadagiti paraani: Parutenyo nga umuna dagiti ruot, reppetenyo sa puoranyo; kalpasanna, anienyo dagiti trigo ken ikabilyo iti kamarinko.’”+
31 Nangted manen iti sabali nga ilustrasion, ket kinunana: “Ti Pagarian ti langit ket mayarig iti bukel ti mustasa nga immula ti maysa a tao iti talonna.+
32 Daytoy ti kabassitan iti amin a bukel, ngem inton dumakkel, agbalin a kadakkelan iti amin a nateng ken agbalin a kayo ket agapon dagiti billit kadagiti sangana.”
33 Daytoy pay ti ilustrasion nga imbagana: “Ti Pagarian ti langit ket mayarig iti lebadura nga inlaok ti maysa a babai iti tallo a dadakkel a sukat ti arina agingga nga immalsa ti intero a masa.”+
34 Nagusar ni Jesus kadagiti ilustrasion idi imbagana dagitoy kadagiti tattao. Kinapudnona, kanayon nga agusar iti ilustrasion no isurona ida,+
35 tapno matungpal ti impadto ti propeta: “Agsaoakto kadagiti ilustrasion; ibagakto kadakuada dagiti banag a saanda pay a naammuan manipud idi un-unana.”*+
36 Kalpasan a pinagawid ni Jesus dagiti tattao, simrek iti balay. Immasideg dagiti adalanna ket kinunada: “Ilawlawagmo man kadakami ti ilustrasion maipapan kadagiti ruot iti talon.”
37 Kinunana: “Ti nangimula kadagiti nasayaat a bin-i ket ti Anak ti tao;
38 ti talon ket ti lubong.+ Dagiti met nasayaat a bin-i ket dagiti annak ti Pagarian, ngem dagiti ruot isu dagiti annak daydiay managdakdakes.+
39 Ti kabusor a nangimula kadagiti ruot isu ti Diablo. Ti panagani ket ti panungpalan daytoy a sistema ti bambanag,* ken dagiti paraani isu dagiti anghel.
40 Gapuna, no kasano a naurnong ken napuoran dagiti ruot, kastanto met iti panungpalan daytoy a sistema ti bambanag.*+
41 Ibaonto ti Anak ti tao dagiti anghelna, ket urnongen ken ikkatendanto manipud iti Pagarianna ti amin a pakaigapuan ti pannakaitibkol ken dagiti tattao nga agar-aramid iti dakes.
42 Maipuruakdanto iti umap-apuy nga urno+ ket agsangit ken agngaretngetdanto.
43 Iti dayta a tiempo, agraniagto dagiti nalinteg a kas iti init+ iti Pagarian ni Amada. Asinoman nga adda lapayagna, dumngeg koma.
44 “Ti Pagarian ti langit ket mayarig iti gameng a nailemmeng iti talon, a nasarakan ti maysa a tao ket inlemmengna. Gapu iti ragsakna, inlakona ti amin nga adda kenkuana ket ginatangna dayta a talon.+
45 “Ti Pagarian ti langit ket mayarig pay iti komersiante nga agbirbirok kadagiti nasayaat a perlas.
46 Idi nakabirok iti maysa a perlas a nangato ti kalidadna, dagus nga inlakona ti amin nga adda kenkuana ket ginatangna dayta.+
47 “Mayarig pay ti Pagarian ti langit iti iket a naiwayat iti baybay a makaala iti amin a kita ti ikan.
48 No mapnon ti iket, maisang-at iti igid ti baybay. Agtugaw dagiti mangngalap ket pilienda dagiti nasayaat nga ikan+ sa ikargada iti tiklis, ngem ibellengda dagiti saan a nasayaat.+
49 Kastanto ti panungpalan daytoy a sistema ti bambanag.* Paglasinento dagiti anghel dagiti dakes ken nalinteg a tattao
50 ket ipuruakdanto dagiti dakes iti umap-apuy nga urno ket agsangit ken agngaretngetdanto.
51 “Naawatanyo kadi ti kaipapanan amin dagitoy?” Insungbat dagiti adalan: “Wen, Apo.”
52 Gapuna, kinuna ni Jesus: “No kasta, ti tunggal mannursuro a nasursuruan maipapan iti Pagarian ti langit ket mayarig iti maysa nga ulo ti sangakabbalayan, a mangiruar kadagiti daan ken baro a banag iti pagidulinanna iti gameng.”
53 Idi naibagan ni Jesus dagitoy nga ilustrasion, pimmanawen iti dayta a lugar.
54 Idi nakaawiden iti ilina,+ napan iti sinagoga tapno isurona dagiti tattao. Nasdaawda ket kinunada: “Nangalaan daytoy a tao iti siribna ken pannakabalinna nga agaramid kadagiti milagro?+
55 Saan aya a daytoy ti anak daydi karpintero?+ Saan aya a ni Maria ti inana, ket da Santiago, Jose, Simon, ken Judas ti kakabsatna?+
56 Saan aya nga agnanaed met ditoy dagiti kakabsatna a babbai? Nangalaanna ngarud kadagitoy nga abilidadna?”+
57 Gapuna, naitibkolda gapu kenkuana.+ Ngem kinuna ni Jesus: “Mapadayawan ti maysa a propeta iti sadinoman ngem saan nga iti ilina ken iti pamiliana.”+
58 Bassit laeng a milagro ti inaramidna sadiay gapu ta awan ti pammatida kenkuana.
Footnotes
^ Wenno mabalin a, “panangrugi ti sangatauan.”
