Proverbio 15:1-33
15 Ti naalumamay* a sungbat pabaawenna ti pungtot,+Ngem ti nagubsang* a sao rubrobanna ti unget.+
2 Ti dila ti masirib umiso ti panangusarna iti pannakaammo,+Ngem ti ngiwat ti maag ibagana ti kinamaag.
3 Adda dagiti mata ni Jehova iti amin a lugar,Kitkitaenna ti dakes ken ti naimbag.+
4 Ti kalmado a dila* ket kayo ti biag,+Ngem ti tiritir a panagsasao mangyeg iti pannakapaay.*
5 Ti maag saanna a raemen ti disiplina ni amana,+Ngem ti masirib awatenna ti panangilinteg.*+
6 Adu ti gameng iti balay ti nalinteg a tao,Ngem mangyeg iti riribuk ti apit* ti dakes a tao.+
7 Ti bibig ti masirib agiwaras iti pannakaammo,+Ngem saan a kasta ti puso ti maag.+
8 Kagura ni Jehova ti daton dagiti dakes,+Ngem maragsakan iti kararag dagiti nalinteg.+
9 Kagura ni Jehova ti dalan ti dakes a tao,+Ngem ay-ayatenna daydiay mangsurot iti kinalinteg.+
10 Agparang a dakes* ti disiplina iti daydiay mangpanaw iti naimbag a dalan,+Ngem matayto ti asinoman a manggura iti pannubngar.+
11 No makita ni Jehova dagidiay adda iti Tanem* ken iti lugar ti pannakadadael,*+
Ad-adda a makitana ti linaon ti puso dagiti tattao!+
12 Ti mananglais saanna nga ayaten daydiay mangilinlinteg* kenkuana.+
Saanto nga agkonsulta kadagiti masirib.+
13 Ti naragsak a puso paragsakenna ti rupa,Ngem makapaupay* ti naladingit a puso.+
14 Ti mannakaawat a puso agbirok iti pannakaammo,+Ngem ti ngiwat dagiti maag mangan* iti kinamaag.+
15 Dakes ti amin nga aldaw daydiay agrigrigat,+Ngem inaldaw nga agpiesta daydiay naragsak* ti pusona.+
16 Nasaysayaat daydiay bassit ti sanikuana nga agbuteng ken Jehova+Ngem daydiay adu ti kinabaknangna a madandanagan.*+
17 Nasaysayaat ti putahe a natnateng a napakuyogan iti ayat+Ngem ti nalukmeg* a baka a napakuyogan iti gura.+
18 Ti managpungpungtot a tao rubrobanna ti riri,+Ngem daydiay nabannayat nga agpungtot pagkalmaenna ti riri.+
19 Ti dalan ti sadut ket kas iti siitan nga alad,+Ngem ti dalan ti nalinteg ket kas iti patag a kalsada.+
20 Ti masirib nga anak paragsakenna ti amana,+Ngem ti maag a tao laisenna ti inana.+
21 Maragsakan ti saan a masirib* iti kinamaag,+Ngem nalinteg ti pannagna ti tao a nauneg ti pannakatarusna.+
22 Mapaay dagiti plano no awan ti panagsasarita,*Ngem adda maitungpal no adu ti mamalbalakad.*+
23 Naragsak ti tao a mangted iti umiso a sungbat,*+Ken anian a nagsayaat ti sao iti umiso a tiempo!+
24 Ti dalan ti biag ket agpangato iti daydiay addaan pannakatarus,+Tapno mailiklik iti Tanem* iti baba.+
25 Rakrakento ni Jehova ti balay dagiti napangas,+Ngem taginayonennanto ti muhon ti balo a babai.+
26 Kagura ni Jehova dagiti panggep ti dakes a tao,+Ngem maragsakan iti makaay-ayo a sasao.+
27 Daydiay sinasaur ti panguartaanna mangyeg iti riribuk* iti sangakabbalayanna,+Ngem agtultuloyto nga agbiag daydiay manggura iti pasuksok.+
28 Ti puso ti nalinteg agpanunot nga umuna sakbay a sumungbat,*+Ngem ti ngiwat ti dakes a tao ibagana ti dakes a bambanag.
29 Adayo ni Jehova kadagiti dakes,Ngem denggenna ti kararag dagiti nalinteg.+
30 Ti naraniag a mata* paragsakenna ti puso;Ti naimbag a damag patibkerenna* dagiti tulang.+
31 Daydiay dumngeg iti makaited-biag a pannubngarKet makipagnaed kadagiti masirib.+
32 Ti di mangikankano iti disiplina dina ipatpateg ti biagna,*+Ngem ti dumngeg iti pannubngar gumun-od iti pannakaawat.*+
33 Ti panagbuteng ken Jehova mangisuro iti kinasirib,+Ket mapadayawan ti napakumbaba.+
Footnotes
^ Wenno “nasakit.”
^ Wenno “naemma.”
^ Wenno “Ti makaagas a dila.”
^ Lit., “mangrebba iti espiritu.”
^ Wenno “pannubngar.”
^ Wenno “sapul.”
^ Wenno “nakaro.”
^ Wenno “ken iti Abaddon.”
^ Wenno “mangtubtubngar.”
^ Wenno “marba ti espiritu.”
^ Wenno “agsapul.”
^ Wenno “naimbag.”
^ Wenno “mariribukan.”
^ Lit., “napakan iti kulluong.”
^ Lit., “awanan iti puso.”
^ Wenno “kompidensial a saritaan.”
^ Wenno “mammagbaga.”
^ Lit., “iti sungbat ti ngiwatna.”
^ Wenno “pannakaibabain.”
^ Wenno “siaannad a sumungbat; agpanunot sakbay nga agsao.”
^ Wenno “Ti naragsak nga ikikita.”
^ Lit., “palukmegenna.”
^ Wenno “kararuana.”
^ Lit., “puso.”
