Proverbio 16:1-33
16 Isagana ti tao ti pampanunot ti pusona,*Ngem aggapu ken Jehova ti isungbatna.*+
2 Ibilang ti tao nga umiso* ti amin a dalanna,+Ngem sukimaten ni Jehova dagiti motibo.*+
3 Italekmo ken Jehova ti aniaman nga aramidem,*+Ket agballiginto dagiti planom.
4 Iturturong ni Jehova ti amin a banag para iti panggepna,Uray dagiti dakes para iti aldaw ti didigra.+
5 Kagura ni Jehova ti asinoman a natangsit ti pusona.+
Sigurado* a madusanto.
6 Maabbongan ti basol babaen ti napudno nga ayat ken kinamatalek,+Ket umadayo ti maysa a tao iti dakes gapu ta agbuteng ken Jehova.+
7 No maragsakan ni Jehova iti aramid ti maysa a tao,Ikappiana kenkuana uray dagiti kabusorna.+
8 Nasaysayaat ti bassit a sanikua nga addaan kinalinteg+Ngem iti dakkel a sapul nga awanan hustisia.+
9 Mabalin nga iplano ti puso ti tao ti aramidenna,Ngem ni Jehova ti mangiturong iti addangna.+
10 Adda koma iti bibig ti ari ti desision ti Dios;+Masapul a saanna a killuen ti hustisia.+
11 Naggapu ken Jehova ti umiso a pagsukatan ken timbangan;Nagtaud kenkuana ti amin a pagtimbang a nakasupot.+
12 Kagura dagiti ari ti dakes nga aramid,+Ta maisaad a sititibker ti trono babaen ti kinalinteg.+
13 Makaay-ayo kadagiti ari ti nalinteg a sasao.
Ipatpategda daydiay agsasao iti pudno.+
14 Ti pungtot ti ari ket kas iti mensahero ni patay,+Ngem lapdan* dayta ti masirib a tao.+
15 Adda biag iti lawag ti rupa ti ari;Ti paborna ket kas iti ulep a mangyeg iti naladaw a tudo.+
16 Adayo a nasaysayaat a gun-oden ti sirib ngem ti balitok!+
Nasaysayaat a pilien ti pannakaawat ngem ti pirak.+
17 Ti kalsada dagiti nalinteg liklikanna ti dakes.
Asinoman a mangsalaknib iti dalanna mataginayonna ti biagna.*+
18 Ti kinapannakkel agturong iti pannakadadael,Ken ti kinatangsit* agtungpal iti pannakatnag.+
19 Nasaysayaat ti napakumbaba* a kadua dagiti naemma+Ngem ti makibingay iti samsam dagiti natangsit.
20 Agballiginto* daydiay mangtarus iti maysa a banag,Ken naragsak daydiay agtaltalek ken Jehova.
21 Maikuna a mannakaawat daydiay masirib ti pusona,+Ken makaguyugoy ti panagsasao* daydiay naasi.+
22 Ti pannakatarus ket ubbog ti biag kadagidiay addaan iti dayta,Ngem madisiplina dagiti maag iti bukodda a kinamaag.
23 Ti puso ti masirib ikkanna ti ngiwatna iti pannakatarus+Ken makaguyugoy ti panagsasaona.
24 Ti makaay-ayo a sasao ket kas iti agtedtedted a diro,Nasam-it iti kararua* ken makapaimbag iti tulang.+
25 Adda dalan a kasla umiso iti maysa a tao,Ngem patay ti pagtungpalanna.+
26 Ti ganas a mangan ti mangtignay iti trabahador nga agtrabaho a sipapasnekTa ti bisinna* ti mangdagdag kenkuana.+
27 Agkali iti dakes ti awan serserbina a tao;+Ti panagsasaona ket kas iti makasinit nga apuy.+
28 Ti manangriribuk* pataudenna ti panagaapa,+Ket ti manangpadakes pagsisinaenna dagiti nasinged nga aggagayyem.+
29 Ti naranggas a tao impluensiaanna ti kaarrubanaKen iturongna iti di umiso a dalan.
30 Ikiremna ti matana bayat nga iplanona ti mangdangran.
Ikaemna ti bibigna bayat nga itungpalna ti dakes a panggepna.
31 Ti uban ket napintas* a korona+No adda iti dalan ti kinalinteg.+
32 Nasaysayaat ti tao a nabannayat nga agpungtot+ ngem ti nabileg a lalaki,Ken ti mangkontrol iti ungetna* ngem ti mangparmek iti maysa a siudad.+
33 Maaramid ti binnunot iti sab-ok,+Ngem aggapu ken Jehova ti tunggal desision.+
Footnotes
^ Wenno “umiso a sungbat.” Lit., “sungbat ti dila.”
^ Lit., “Biang ti tao ti panangurnos iti puso.”
^ Lit., “a nadalus.”
^ Lit., “espiritu.”
^ Lit., “Itulidmo ken Jehova dagiti aramidmo.”
^ Lit., “Ima iti ima.”
^ Wenno “liklikan.”
^ Wenno “kararuana.”
^ Lit., “natangsit nga espiritu.”
^ Lit., “nanumo iti espiritu.”
^ Lit., “Naimbagto.”
^ Wenno “Ken makaay-ayo ti panagsasao.” Lit., “Ken nasam-it ti bibig.”
^ Lit., “ngiwatna.”
^ Wenno “nasikap.”
^ Wenno “nadayag.”
^ Lit., “mangituray iti espirituna.”
