1, 2. Siasino ti sumagmamano kadagiti tattao nga imbilang ni Jehova kas nasinged a gagayyemna?

ANIA a kita ti tao ti piliem a pakigayyeman? Nalabit kayatmo a pakikaduaan ti tao a kapadam iti kapanunotan, interes, ken prinsipio. Ken sigurado a magustuam dagiti nagsayaat ti kualidadda, kas iti tao a mapagtalkan ken naasi.

² Iti historia, adda dagiti tattao a pinili ti Dios kas nasinged a gagayyemna. Kas pagarigan, ni Jehova imbilangna ni Abraham kas gayyemna. (Isaias 41:8; Santiago 2:23) Kinuna ti Dios a ni David ket ‘maysa a lalaki a naanamongan iti pusona’ agsipud ta isu ti kita ti tao nga ipatpateg ni Jehova. (Aramid 13:22) Ket iti imatang ni Jehova, “makaay-ayo unay” ni Daniel.—Daniel 9:23.

3. Apay nga adda dagiti tattao nga ibilang ni Jehova kas gayyemna?

³ Apay nga imbilang ni Jehova a gayyemna da Abraham, David, ken Daniel? Bueno, kinunana ken Abraham: “Immimdengka iti timekko.” (Genesis 22:18) No kasta, kaay-ayo ni Jehova dagidiay sipapakumbaba nga agtungpal iti pagayatanna. “Agtulnogkayo iti timekko,” kinunana kadagiti Israelita, “ket agbalinakto a Diosyo, ket dakayo agbalinkayto nga ilik.” (Jeremias 7:23) No agtulnogka ken ni Jehova, agbalinka met a gayyemna!

4, 5. Kasano a maipakita ni Jehova ti pigsana maigapu kadagiti adipenna?

⁴ Panunotem no ania ti kaipapanan ti panagbalin a gayyem ti Dios. Kuna ti Biblia nga agsapsapul ni Jehova kadagiti gundaway “tapno ipakitana ti pigsana maigapu kadagidiay a ti pusoda naan-anay kenkuana.” (2 Cronicas 16:9) Kasano a maipakita ni Jehova ti pigsana maigapu kenka? Ti maysa a pamay-an ket nadakamat iti Salmo 32:8, a kastoy ti mabasatayo a kuna ni Jehova: “Pagbalinenkanto nga addaan iti pannakatarus ket isuroka iti dalan a rebbeng a papanam. Mangipaayakto iti balakad a ti matak situturong kenka.”

⁵ Anian a makaliwliwa nga ebkas ti pammateg ni Jehova! Idalan ken saluadannaka bayat nga iyaplikarmo ti balakadna. Sidadaan ti Dios a mangsaranay kenka tapno madaeram dagiti suot ken pannubok a sumangbay iti biagmo. (Salmo 55:22) Isu a no agserbika ken ni Jehova iti amin a pusom, makapagtalekka a kas iti salmista a nagkuna: “Insaadko ni Jehova iti sanguanak a patinayon. Agsipud ta isu adda iti makannawanko, saanakto a mapagdiwengdiweng.” (Salmo 16:8; 63:8) Wen, matulongannaka ni Jehova nga agbiag iti wagas a makaay-ayo kenkuana. Ngem kas pagaammom, adda maysa a kabusor ti Dios nga agtarigagay a manglapped kenka.

6. Ania ti inkarit ni Satanas maipapan kadagiti tattao?

⁶ Inlawlawag ti Kapitulo 11 daytoy a libro no kasano a kinarit ni Satanas a Diablo ti kinasoberano ti Dios. Ni Satanas inakusaranna ti Dios iti panagulbod ken imparipiripna a di nainkalintegan ti di panangpalubos ni Jehova kada Adan ken Eva a mangikeddeng a bukbukodda no ania ti umiso ken di umiso. Kalpasan a nagbasol da Adan ken Eva ken idi umad-adun dagiti tattao ditoy daga, pinagduaduaan ni Satanas ti motibo dagiti amin a tao. “Agserserbi kenka dagiti tattao, saan a gapu ta ay-ayatendaka,” inkarit ni Satanas. “Ikkannak iti gundaway, ket maitallikudko kenka ti uray siasino.” Ti salaysay maipapan iti lalaki nga agnagan Job ipakitana a kasta ti pagarup  ni Satanas. Siasino ni Job, ken kasano a nairaman iti karit ni Satanas?

7, 8. (a) Apay a naisalsalumina ni Job idi kaaldawanna? (b) Kasano a pinagduaduaan ni Satanas ti motibo ni Job?

⁷ Nagbiag ni Job agarup 3,600 a tawenen ti napalabas. Naimbag a tao ni Job, ta kinuna ni Jehova: “Awan asinoman a kas kenkuana iti daga, maysa a lalaki nga awan pakababalawanna ken nalinteg, agbuteng iti Dios ken sumiasi iti dakes.” (Job 1:8) Ni Job ket makaay-ayo iti Dios.

⁸ Pinagduaduaan ni Satanas ti motibo ni Job nga agserserbi iti Dios. Ti Diablo kinunana ken ni Jehova: “Saan aya a sika nangikabilka iti alad iti aglikmutna [ni Job] ken iti aglikmut ti balayna ken iti aglikmut ti tunggal banag nga adda kenkuana iti intero nga aglawlaw? Ti aramid dagiti imana binendisionam, ket dagiti met laeng dinguenna nagwaras a sisasaknap iti daga. Ngem, kas pamaliwan, iyunnatmo ta imam, pangngaasim, ket sagidem ti isuamin nga adda kenkuana ket kitaem no saannakanto nga ilunod ita mismo a rupam.”—Job 1:10, 11.

9. Kasano a tinaming ni Jehova ti karit ni Satanas, ken apay?

⁹ No kasta, inrason ni Satanas nga agserserbi ni Job iti Dios gapu kadagiti maaw-awatna a parabur. Inkarit pay ti Diablo a no masuot ni Job, tallikudanna ti Dios. Kasano a tinaming ni Jehova ti karit ni Satanas? Tangay pinagduaduaan ni Satanas ti motibo ni Job, ni Jehova pinalubosanna ti Diablo a mangsuot ken ni Job. Iti kasta, nalawag a mapaneknekan no ni Job ket pudno met laeng nga ay-ayatenna ti Dios wenno saan.

10. Ania dagiti suot a dimteng ken ni Job, ket ania ti reaksionna?

¹⁰ Di nagbayag, ni Satanas sinuotna ni Job iti nadumaduma a pamay-an. Natakaw ti dadduma kadagiti animal ni Job, ken natay dagiti dadduma. Napapatay ti kaaduan kadagiti adipenna. Pimmanglaw ni Job gapu iti daytoy. Kalpasanna, dimteng ti sabali pay a didigra idi pinatay ti maysa a bagyo dagiti sangapulo nga annakna. Ngem iti laksid dagitoy a nakaro a didigra, “saan a nagbasol ni Job wenno nangipabiang iti aniaman a banag a di umiso iti Dios.”—Job 1:22.

11. (a) Ania pay ti inkarit ni Satanas maipapan ken ni Job, ket ania ti inaramid ni Jehova? (b) Ania ti reaksion ni Job nupay nakaptan iti naut-ot a sakit?

 ¹¹ Saan a simmardeng ni Satanas. Impagarupna la ketdi a nupay maibturan ni Job ti pannakapukaw dagiti sanikua, adipen, ken annakna, tallikudanna ti Dios no kapten ti sakit. Ni Jehova pinalubosanna ni Satanas a mangipalak-am ken ni Job iti nakaar-ariek ken naut-ot a sakit. Ngem uray kasta ti napasamak, saan a napukaw ti pammati ni Job iti Dios. Sititibker ketdi a kinunana: “Agingga a mauyos ti biagko saankonto nga ikkaten kaniak ti kinatarnawko!”—Job 27:5.

12. Kasano a sinungbatan ni Job ti karit ti Diablo?

¹² Saan nga ammo ni Job a ni Satanas ti mangparparigat kenkuana. Gapu ta awan ti ammo ni Job maipapan iti panangkarit ti Diablo iti kinasoberano ni Jehova, impagarupna a ti Dios ti nagtaudan dagiti didigra a dimteng kenkuana. (Job 6:4; 16:11-14) Ngem nagtalinaed latta a natarnaw ken ni Jehova. Ket ti kinamatalek ni Job pinaneknekanna a saan a pudno ti akusasion ni Satanas nga agserserbi laeng ni Job iti Dios gapu iti bukodna a pagimbagan!

13. Ania ti napasamak gapu iti kinamatalek ni Job iti Dios?

¹³ Ti kinamatalek ni Job ti nalawag a sungbat ni Jehova iti makainsulto a karit ni Satanas. Pudno unay, ni Job ket gayyem ni Jehova, ket ginunggonaan ti Dios gapu iti kinamatalekna.—Job 42:12-17.

14, 15. Apay a maikunatayo a nairaman ti amin a tao iti karit ni Satanas mainaig ken ni Job?

¹⁴ Saan laeng a ni Job ti nakaiturongan ti isyu nga imbangon ni Satanas maipapan iti kinatarnaw iti Dios. Nairamanka met. Nalawag daytoy iti sasao ni Jehova a nailanad iti Proverbio 27:11: “Agmasiribka, anakko, ket pagrag-oem ti pusok, tapno makaipaayak iti sungbat iti daydiay mangrurrurod kaniak.” Dagitoy a sasao, a naisurat ginasut a tawen kalpasan ti ipapatay ni Job, ipakitana a ni Satanas um-umsienna pay laeng ti Dios ken ak-akusaranna dagiti adipenna. No agbiagtayo iti wagas a makaay-ayo ken ni Jehova, tumultulongtayo a  mangsungbat kadagiti natiri nga akusasion ni Satanas, ket iti kasta maparagsaktayo ti puso ti Dios. Ania ti makunam iti dayta? Saan kadi a nagsayaat a pribilehio ti makiraman a mangsungbat kadagiti akusasion ti Diablo, nupay adda masapul a balbaliwam iti biagmo?

¹⁵ Laglagipem a kinuna ni Satanas: “Isuamin nga adda iti maysa a tao itednanto maigapu iti kararuana.” (Job 2:4) Iti panangibagana iti sasao a “maysa a tao,” imbatad ni Satanas a saan laeng a ni Job ti nakaiturongan ti akusasionna no di ket amin a tao. Nagpateg dayta a punto. Pinagduaduaan ni Satanas ti kinatarnawmo iti Dios. Kayat ti Diablo a sukirem ti Dios ken sumiasika iti nalinteg a dana no tumaud dagiti pakarigatan. Ania ti mabalin nga aramiden ni Satanas tapno maibanagna daytoy?

16. (a) Ania dagiti pamay-an nga us-usaren ni Satanas iti panangikagumaanna a mangitallikud kadagiti tattao iti Dios? (b) Kasano a mabalin nga usaren met ti Diablo dagitoy a pamay-an kenka?

¹⁶ Kas nailawlawag iti Kapitulo 10, nadumaduma a pamay-an ti us-usaren ni Satanas iti panangikagumaanna a mangitallikud kadagiti tattao iti Dios. Iti maysa a bangir, dumarup “a kasla leon a ngumerngernger, nga agsapsapul iti alun-onenna.” (1 Pedro 5:8) Gapuna, mabalin nga impluensiaan ni Satanas dagiti gagayyem ken kakabagiam wenno dadduma pay a mangbusor iti panangikagumaam nga agadal iti Biblia ken mangyaplikar kadagiti masursurom. * (Juan 15:19, 20) Iti sabali a bangir, ni Satanas “pagbalbalinenna ti bagina a kasla anghel ti lawag.” (2 Corinto 11:14) Mabalin nga agusar ti Diablo kadagiti nasikap a pamay-an tapno maallilaw ken maisiasika iti nadiosan a wagas ti panagbiag. Mabalin nga usarenna met ti pannakaupay, a nalabit ipariknana kenka a saanka a maikari iti imatang ti Dios. (Proverbio 24:10) Agtignay  man ni Satanas a kasla “leon a ngumerngernger” wenno kasla “anghel ti lawag,” maymaysa ti ikarkaritna: Ibagbagana a no maipasangoka kadagiti suot wenno sulisog, tallikudam kano ti Dios. Kasanom a masungbatan ti karitna ken mapaneknekan ti kinatarnawmo iti Dios, kas ken Job?

17. Ania ti kangrunaan a makagapu a tungpalentayo dagiti bilin ni Jehova?

¹⁷ Masungbatam ti karit ni Satanas no agbiagka iti wagas a makaay-ayo iti Dios. Ania ti ramanen daytoy? Sumungbat ti Biblia: “Masapul nga ayatem ni Jehova a Diosmo buyogen ti isuamin a pusom ken isuamin a kararuam ken isuamin a bikasmo.” (Deuteronomio 6:5) Bayat nga umun-uneg ti panagayatmo iti Dios, mapatanormo ti nasged a tarigagay a mangtungpal kadagiti bilinna. Insurat ni apostol Juan: “Daytoy ti kaipapanan ti ayat iti Dios, a tungpalentayo dagiti bilinna.” No ay-ayatem ni Jehova iti amin a pusom, mariknam a “dagiti bilinna saanda a makapadagsen.”—1 Juan 5:3.

18, 19. (a) Ania ti dadduma kadagiti bilin ni Jehova? (Kitaem ti kahon a napauluan iti “ Liklikam Dagiti Kagura ni Jehova.”) (b) Kasanotay nga ammo a saan nga ipaaramid ti Dios ti ditay kabaelan nga aramiden?

¹⁸ Ania dagiti bilin ni Jehova? Karaman kadagitoy dagiti aramid a masapul a liklikantayo. Kas pagarigan, kitaem ti kahon a napauluan iti “ Liklikam Dagiti Kagura ni Jehova.” Nailista dita dagiti aramid a nalawag a kondenaren ti Biblia. No kitaem, kasla awan pagdaksan ti dadduma kadagita nga aramid. Ngem no utobem dagiti naisitar a teksto, maamirismo a nainsiriban gayam dagiti linteg ni Jehova. Nalabit a ti panangbalbaliw kadagiti dati nga aramidmo ti karirigatan a karit a naipasango kenka. Ngem dakkel a pannakapnek ken ragsak ti itden kenka ti panagbiag iti wagas a makaay-ayo iti Dios. (Isaias 48:17, 18) Ken kabaelam dayta. Kasanotay nga ammo?

¹⁹ Saan nga ipaaramid ni Jehova ti ditay kabaelan nga aramiden. (Deuteronomio 30:11-14) Ad-adda nga ammona ti kabaelantayo ken ti ditay kabaelan nga aramiden. (Salmo  103:14) Maysa pay, maipaayannatayo ni Jehova iti kired nga agtulnog kenkuana. Insurat ni apostol Pablo: “Ti Dios matalek, ket saannanto nga ipalubos a masulisogkayo iti labes ti kabaelanyo nga itured, no di ket maigiddan iti pannakasulisog aramidennanto met ti dalan a pagruaran tapno mabalinanyo nga ibturan dayta.” (1 Corinto 10:13) Tapno makapagibturka, mabalin nga ipaayannaka pay ketdi ni Jehova iti “pannakabalin a nalablabes ngem ti gagangay.” (2 Corinto 4:7) Kalpasan ti panangibtur ni Pablo iti adu a pakasuotan, naikunana: “Ta iti amin a bambanag addaanak iti bileg gapu iti daydiay mangmangted kaniak iti pannakabalin.”—Filipos 4:13.

20. Ania dagiti nadiosan a kualidad a nasken a patanorem, ken apay a napateg dagitoy?

²⁰ Siempre, saan laeng a panangliklik kadagiti banag a kagura ni Jehova ti ramanen ti panangay-ayo kenkuana. Nasken met nga ayatem dagiti banag a makaay-ayo kenkuana. (Roma 12:9) Saan kadi a kaay-ayom a kadua dagidiay kapadam iti kapanunotan, paginteresan, ken prinsipio? Kasta met ni Jehova. Sursuruem ngarud nga ayaten dagiti banag a napateg ken ni Jehova. Nadakamat ti dadduma kadagitoy iti Salmo 15:1-5, a pakabasaantayo iti maipapan kadagidiay ibilang ti Dios a  gagayyemna. Dagiti gagayyem ni Jehova iparangarangda ti aw-awagan ti Biblia a “bunga ti espiritu.” Ramanenna dagiti kualidad a kas iti “ayat, rag-o, talna, mabayag a panagitured, kinamanangngaasi, kinaimbag, pammati, kinaalumamay, panagteppel.”—Galacia 5:22, 23.

21. Ania ti tumulong kenka a mangpatanor kadagiti nadiosan a kualidad?

²¹ Ti regular a panagbasa ken panagadal iti Biblia ket tumulong kenka a mangpatanor kadagiti nadiosan a kualidad. Ket ti panangammo kadagiti bilin ti Dios tulongannaka a mangitunos iti pampanunotmo iti panunot ti Dios. (Isaias 30:20, 21) No naun-uneg ti panagayatmo ken ni Jehova, napigpigsa met ti tarigagaymo nga agbiag iti wagas a makaay-ayo iti Dios.

22. Ania ti maibanagmo no agbiagka iti wagas a makaay-ayo iti Dios?

²² Nasken ti panagregget tapno makapagbiagka iti wagas a makaay-ayo ken ni Jehova. Ti Biblia iyarigna ti panangbalbaliw iti biagmo iti pananguksob iti daan a personalidad ken panangikawesmo iti baro a personalidad. (Colosas 3:9, 10) Ngem maipapan kadagiti bilin ni Jehova, insurat ti salmista: “Iti panangsalimetmet kadakuada adda dakkel a gunggona.” (Salmo 19:11) Mapaneknekamto met a makagunggona unay ti panagbiag iti wagas a makaay-ayo iti Dios. No aramidem dayta, masungbatam ti karit ni Satanas ken maparagsakmo ti puso ni Jehova!