Biag ti Pamilia ken Pannakigayyem
Adu ti marigatan a maaddaan iti nasayaat a relasion iti pamilia ken gagayyem. Kitaem ti dadduma a makatulong a prinsipio ti Biblia tapno sumayaat ti relasionmo iti dadduma.
SAAN LA A TI BAGIM TI PANUNOTEM
PRINSIPIO TI BIBLIA: “Sapulenyo dagiti pagimbagan ti dadduma, saan la a dagiti bukodyo a pagimbagan.”—Filipos 2:4.
TI KAIPAPANANNA: Sumayaat ti relasiontayo iti dadduma no ti kangrunaan a panunotentayo ket ti maitedtayo kadakuada, imbes a ti maitedda. No ti bagim laeng ti panunotem, madadaelmo ti relasionmo iti dadduma. Kas pagarigan, ti agimbubukodan nga asawa ket posible a di agmatalek iti asawana. Awan met ti mayat a makigayyem iti tao a kanayon a mangipannakkel iti sanikua wenno ammona. Kas iti ibaga ti libro a The Road to Character, “umadu ti problema dagiti tattao no ti la bagida ti pampanunotenda.”
TI MABALINMO NGA ARAMIDEN:
-
Tulongam ti dadduma. Kanayon nga agtalek ken agtinnulong dagiti nasayaat nga aggayyem. Ipakita ti dadduma a panagadal a manmano a madepres ken sumayaat ti rikna dagiti tattao a tumultulong iti dadduma.
-
Ipakita ti empatia. Nadeskribir ti empatia kas ti pannakarikna iti saem a marikrikna ti sabali. No adda empatiam, saanka nga agsao iti makapainsulto, kayatna a sawen, dagiti makasair ken inaangaw a sasao a mangpasakit iti rikna ti sabali.
No ipakitam ti empatia, agbalinka met a nakonsiderar iti sabsabali. Makatulong ngarud ti empatia tapno saanka a mangidumduma ken magayyemmo ti nagduduma ti kultura ken dimmakkelanda.
-
Makikaduaka iti dadduma. No ad-adu ti tiempom a makikadua iti dadduma, ad-adda a maam-ammom ida. Masapul a makaparegta ti pannakisaritam iti dadduma tapno maaddaanka kadagiti pudno a gayyem. Isu a dumngegka a naimbag. Ipakitam nga interesadoka kadagiti pakaseknan dagiti gagayyemmo. Sigun iti nabiit pay a panagadal, “talaga a naragragsak dagiti tattao no makaparegta ti panagsasaritada.”
PILIEM A NAINSIRIBAN DAGITI PAKIGAYYEMAM
PRINSIPIO TI BIBLIA: “Dagiti dakes a kakadua dadaelenda dagiti nasayaat nga ugali.” —1 Corinto 15:33.
TI KAIPAPANANNA: Dakkel ti impluensia kenka dagiti pakikadkaduaam—naimbag man wenno dakes. Ibaga dagiti sociologist a dakkel ti epektoda iti biagmo. Kas pagarigan, kunada a no dagiti mannigarilio wenno mayat a makidiborsio ti pakikadkaduaam, dakdakkel ti posibilidad nga agbalinka a kas kadakuada.
TI MABALINMO NGA ARAMIDEN: Makigayyemka kadagiti addaan kadagiti kualidad ken prinsipio a magusgustuam wenno kayatmo a tuladen. Kas pagarigan, makikaduaka kadagiti tattao a naannad, nadayaw, naparabur, ken managpadagus.
DADDUMA PAY A PRINSIPIO TI BIBLIA
Buyaem dagiti naibatay iti Biblia a video a makatulong kadagiti naasawaan, tin-edyer, ken ubbing a mangpasayaat iti biag ti pamiliada
LIKLIKAN DAGITI MAKAPASAKIT A SASAO.
“Ti di pinampanunot a sasao ket kas kadagiti duyok ti espada.”—PROVERBIO 12:18.
AGBALINKA A NAPARABUR.
“Rumang-ayto ti naparabur a tao.”—PROVERBIO 11:25.
TRATUEM DAGITI TATTAO ITI KAYATMO A PANANGTRATODA KENKA.
“Aramidenyo . . . kadagiti tattao ti amin a kayatyo nga aramidenda kadakayo.”—MATEO 7:12.
Baka Kayatmo Met ti
AGRIINGKAYO!
Ania ti Nasayaat a Gayyem?
Para iti kaaduan, napateg ti maaddaan iti nasayaat a gagayyem. Kasanoka nga agbalin a nasayaat a gayyem? Usigen daytoy nga artikulo ti 4 a makatulong a prinsipio ti Biblia.
