Patien ti adu a sigurado ti masakbayan dagiti edukado ken nabaknang. Para kadakuada, no nangato ti adal ti maysa, agbalin a nasaysayaat nga empleado, nasaysayaat a miembro ti pamilia, ken nasaysayaat a residente. Mamatida met a dakdakkel ti sueldo dagidiay nangatngato ti adalda ken naragragsak dagidiay adu ti kuartana.

Kastoy ti komento ni Zhang Chen a taga-China: “Patiek a no nangato ti adalko, makalung-awkami iti rigat. Ken siempre, no ad-adu ti sueldok, naragragsak ken nanamnam-ay ti biagmi.”

Tapno kano nasaysayaat ti masakbayanda, adu ti ages-eskuela kadagiti sikat nga unibersidad, a mabalin nga iti sabali a pagilian. Gagangay dayta agingga a nalimitaran ti panagbiahe iti sabali a pagilian gapu iti COVID-19. Kastoy ti report ti Organisation for Economic Co-operation and Development idi 2012: “Kadagiti estudiante nga agad-adal iti abrod, 52% ket taga-Asia.”

Kaaduanna nga igaed dagiti nagannak ti agtrabaho tapno mapagadalda dagiti annakda kadagiti eskuelaan iti abrod. Nalagip ni Qixiang a taga-Taiwan: “Saan a nabaknang dagiti nagannakmi, ngem pinagkolehiodakami amin nga uppat nga annakda idiay United States.” Tapno mapagadalda dagiti annakda iti abrod, adu a nagannak, a kas iti nagannak ni Qixiang ti nailumlom iti utang.

Agpayso a makatulong ti edukasion tapno sumayaat ti biag ti maysa. Ngem saan a kanayon a maipaay ti edukasion dagiti banag a namnamaen dagiti estudiante. Kas pagarigan, kalpasan ti adu a tawen a panagsakripisio ken pannakailumlom iti utang, adu ti saan a makabirok iti trabaho a kayatda. Inreport ni Rachel Mui iti Business Times idiay Singapore: “Umad-adu ti bilang dagiti nakagraduar iti kolehio a saan a makabirok iti trabaho.” Kuna ni Jianjie, nga adda doctorate degree-na a taga-Taiwan: “Adu ti mapilitan a mangawat iti trabaho nga awan koneksionna iti inleppasda a kurso.”

Uray dagidiay nakabirok iti trabaho a konektado iti inggraduarda ket mabalin a mariknada latta a saan a kas iti ninamnamada ti nagbanagan ti biagda. Kalpasan a naggraduar ni Niran a taga-Thailand iti maysa nga unibersidad idiay United Kingdom, nakabirok iti trabaho a konektado iti propesion nga inggraduarna. “Kas iti ninamnamak, nakabirokak iti trabaho a dakdakkel ti sueldona gapu iti inleppasko. Ngem gapu ta dakdakkel ti sueldok, masapul met nga agtrabahoak iti ad-adu nga oras. Idi kuan, adu nga empleado ti inikkat ti kompania, ket maysaak kadakuada. Nabigbigko nga awan ti aniaman a trabaho a manggarantia iti nasayaat a masakbayan.”

Uray dagiti nabaknang ken dagiti agkunkuna a nanam-ay ti biagda ket adda latta met problemada iti pamilia, salun-at, ken kuarta. Inamin ni Katsutoshi a taga-Japan, “Adu ti kuartak, ngem saanak a naragsak ta adu ti umap-apal kaniak ken saan a nasayaat ti panangtratoda kaniak.” Kuna ti maysa a babai nga agnagan Lam a taga-Vietnam, “Adu ti agbirbirok iti trabaho a nangato ti sueldona tapno kano saanda nga agproblema iti kuarta. Ngem ti agpayso, baliktad met ti mapaspasamak. Agprobproblemada iti kuarta ken salun-at, mabambannogda, ken madepdepresda.”

Kas ken Franklin, nabigbig ti adu nga adda pay napatpateg ngem iti panangala iti nangato nga edukasion ken kinabaknang. Imbes nga ipokusda ti biagda iti material a bambanag, nagporsegi ti dadduma nga agbalin a naimbag a tao ken tumulong iti sabsabali tapno maaddaanda iti nasayaat a masakbayan. Ngem dayta kadi ti manggarantia iti nasayaat a masakbayan? Sungbatan dayta ti sumaruno nga artikulo.