ITI Linteg, agpada dagiti pagaw ken kalapati a maawat kas daton para ken Jehova. Kanayon a madakamat dagitoy dua a billit iti linteg maipapan iti panagidaton ken mabalin a maidaton ti aniaman kadagita. (Lev. 1:14; 12:8; 14:30) Apay a nagsayaat dayta? Ti maysa a rason ket saan a kanayon nga adda dagiti pagaw. Apay?

Dagiti pagaw ket agakar-akar a billit nga agnaed iti Israel bayat dagiti bulan ti kalgaw. Kada Oktubre, agpaabagatanda a mapan kadagiti nasion a madama sadiay ti kalgaw, sa agsublida iti Israel no nalpasen ti tiempo ti lam-ek. (Sol. 2:11, 12; Jer. 8:7) Iti nagkauna nga Israel, marigatan dagiti Israelita a mangidaton iti pagaw no tiempo ti lam-ek.

Nupay kasta, dagiti kalapati ket manmano nga umakar, isu a kanayon nga addada iti Israel iti intero a tawen. Matartaraken met dagiti kalapati. (Idilig ti Juan 2:14, 16.) Sigun iti libro a Bible Plants and Animals, “agtartaraken iti kalapati ti amin a purok ken ili iti Palestina. Iti tunggal balay, adda ti pagaponan dagiti kalapati, wenno abut iti pader a pagumokanda.”​—Idilig ti Isaias 60:8.

Impakita ngarud ni Jehova nga isu ket agpadpada a nadungngo ken nainkalintegan ta inakseptarna kas daton dagiti billit a magun-odan dagiti Israelita iti intero a tawen.