PUDNO unay dagita a sasao! Ti biag iti daytoy a lubong ket napno iti “tuok ken ladingit.” Nalabit pampanunotem, ‘Posible ngata ti maaddaan iti makapnek a biag ita?’

Alaentay a pagarigan ni Maria. Kanayon idi a naganaygay, ngem ita ta agtawenen iti 84, dandanin di makapanaw a bukodna iti balay. Aktibo pay laeng ti panunotna, ngem nakapuyen ti bagina. Kasano ngarud a maibagana a makapnek ti biagna?

Sika ngay? No dadduma, mabalin a salsaludsodem iti bagim no makapnek met laeng ti biagmo. Mabalin a maulit-ulit, makabannog, ken narigat ti trabahom. Nalabit awan ti mangap-apresiar iti panagreggetmo wenno trabahom. Uray nasayaat ti kasasaadmo, mabalin a pakadanagam ti maipapan iti masanguanan. No dadduma mabalin a maladingitan wenno maupayka. Mabalin a problemado ti pamiliam. Nalabit natay ti ipatpategmo. Alaentay a pagarigan ni André a nakasingsinged ken tatangna. Ngem kellaat a nagsakit ket natay. Para ken André, saannan a mailiwliwag ti ladingitna.

Aniaman ti pakarigatantayo, masapul a maammuantayo daytoy: Talaga kadi a posible ti makapnek a biag? Maammuantayo ti sungbat no usigentayo ti panagbiag ti maysa a lalaki, ni Jesu-Kristo, agarup 2,000 a tawen ti napalabasen. Nupay naipasango iti adu a pakasuotan, talaga a makapnek ti biagna. Agbalin met a makapnek ti biagtayo no tuladentayo ti ulidanna.