Kuna ni Naoko a nadakamat iti rugi no kasano a naisardengna ti agsigarilio, “Naisardengko ti agsigarilio gapu ta naammuak ti kinapudno maipapan kadagiti galad ken panggep ti Dios.” Masarakan iti Biblia dagita a naammuanna. Nupay awan ti ibaga ti Biblia maipapan iti tabako, tulongannatayo a mangtarus iti kuna ti Dios maipapan iti panagsigarilio. * Para iti adu, dayta a pannakaammo ti nakatulong kadakuada tapno maisardengda ti agsigarilio. (2 Timoteo 3:16, 17) Usigentayo ti tallo a pagaammo a dakes nga epekto ti panagsigarilio ken ammuentayo ti kuna ti Biblia kadagita.

Addaan ti tabako iti nikotina a pagaammo unay a makaadikto a droga. Agserbi dayta a mangpaganaygay ken mangpakalma. No agsigarilio ti maysa, nagpartak ken maulit-ulit a mapan iti utekna ti nikotina. Tangay tunggal susop ti sigarilio ket maysa a dosage ti nikotina, ti maysa a mannigarilio a makaibus iti maysa a kaha iti inaldaw ket makalang-ab iti 200 a dosage ti nikotina, napigpigsa nga amang ngem iti aniaman a droga. Makaadikto ti kasta a kanayon a panangsusop iti nikotina. No naadikton, mapasaranna ti withdrawal symptoms no saan a mapennek ti nikotina a sapulen ti bagina.

Tulongannatayo ti Biblia a maaddaan iti umiso a kapanunotan idi kunana: “Dikay aya ammo a no itultuloyyo nga iparang ti bagbagiyo iti asinoman kas ad-adipen tapno agtulnog kenkuana, ad-adipennakayo agsipud ta agtulnogkayo kenkuana?” (Roma 6:16) No kanayon a pampanunoten ti maysa a tao ti panagsigarilio, agbalinen nga adipen ti narugit a bisio. Ngem kayat ti Dios nga agnagan Jehova a makalapsuttayo iti bisio a makadangran iti bagitayo ken kadagiti makadadael iti espiritutayo, kayatna a sawen, ti wagas a panagpampanunottayo. (Salmo 83:18; 2 Corinto 7:1) Gapuna, bayat nga umun-uneg ti panangipateg ken panagraemna ken Jehova, bigbigenna a maikari ni Jehova iti kasayaatan a panagserbina. Saanna a maipaay ti kasayaatan a panagserbi iti Dios no agpapaadipen iti makapapatay a bisio. Dayta ti makatulong iti maysa a mangisardeng iti tarigagay nga agsigarilio.

Naisardeng ni Olaf a taga-Germany ti 16 a tawen a pannakaadiktona iti sigarilio a nangrugi idi agtawen ti 12. Ipapan ni Olaf nga awan ti dakes nga epekto ti panagsigarilio. Ngem iti panaglabas ti tawen naadikton. Kunana: “Naminsan, idi naibusanak iti sigarilio, inurnongko amin a rungrong iti pagarsangan ti sigarilio sa binilutko iti diario. Idi naamirisko, talaga a nakababain.” Kasano a naisardengna ti narugit a  bisio? Kunana: “Kayatko a paragsaken ni Jehova. Ti panagayat ni Jehova kadagiti tattao ken ti namnama nga impaayna ti nangpabileg kaniak a mangisardeng a mamimpinsan iti daytoy a bisio.”

Kuna ti The Tobacco Atlas: “Pinaneknekanen ti siensia a ti panagsigarilio . . . ket makadangran iti amin nga organo ti bagi ken pakaigapuan ti sakit ken ipapatay.” Pagaammo unay a ti panagsigarilio ti pakaigapuan ti di makaakar a sakit a kas iti kanser, sakit ti puso, ken bara. Ngem sigun iti World Health Organization (WHO), ti panagsigarilio ti kangrunaan met a pakaigapuan ti ipapatay gapu iti makaakar a sakit a kas iti sarut.

Babaen ti Biblia a Saona, isursuronatayo ni Jehova a maaddaan iti umiso a panangmatmat iti biag, bagi, ken abilidad nga agpanunot ken agtignay. Imbaga daytoy ti Anakna a ni Jesus idi kinunana: “Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.” (Mateo 22:37) Nalawag a kayat ti Dios nga usaren ken ipategtayo ti biag ken bagitayo. No ad-adu ti maammuantayo maipapan ken Jehova ken kadagiti karina, ayaten ken ipategtayo ti amin nga inaramidna para kadatayo. Daytoy ti mangtignay kadatayo a mangliklik iti aniaman a banag a mangrugit iti bagitayo.

Kuna ni Jayavanth, maysa a doktor a taga-India, a nagsigarilio iti 38 a tawen: “Nabasak kadagiti magasin iti medisina dagiti peggad ti panagsigarilio. Ammok a makadangran dayta isu nga ibagbagak kadagiti pasientek nga isardengda dayta a bisio. Ngem diak maisardeng ti agsigarilio, nupay naminlima wenno namin-innem a daras a kayatkon nga isardeng.” Ania ti nakatulong kenkuana? Kinunana: “Naisardengko ti agsigarilio gapu iti panagadalko iti Biblia ken kayatko a paragsaken ni Jehova.”

Makasabidong ti asuk nga ipugso dagiti mannigarilio ken ti agas-asuk pay laeng a rungrong. Pagtaudan ti kanser ken dadduma pay a sakit no malang-ab dagita nga asuk. Kada tawen, 600,000 ti  matay a saan nga agsigsigarilio a kaaduan ti babbai ken ubbing. Impakdaar ti report ti WHO: “Awan ti natalged a kaadu ti malang-ab nga asuk ti sigarilio.”

Sigun ken Jesus, ti panagayattayo iti pada a tao wenno kaarruba—iti pamilia, gagayyem, ken dadduma nga adda iti aglawlawtayo—ket sumaruno iti panagayattayo iti Dios. Kinunana: “Masapul nga ayatem ti padam a tao a kas iti bagim.” (Mateo 22:39) No ti bisiotayo ket makadangran kadagiti ipatpategtayo, ditay ay-ayaten ti pada a tao. Ti pudno nga ayat tignayennatayo a mangtungpal iti balakad ti Biblia: “Tunggal maysa itultuloyna koma a sapulen, saan a ti bukodna a pagsayaatan, no di ket ti pagsayaatan ti sabali a tao.”—1 Corinto 10:24.

Malagip ni Armen a taga-Armenia: “Impakaasi ti pamiliak nga isardengko ti agsigarilio gapu ta madangranda. Ngem diak maaklon a dakes ti epektona kadakuada.” Imbagana no apay a nagbaliw ti opinionna: “Naisardengko ti agsigarilio gapu iti panagadalko iti Biblia ken panagayatko ken Jehova. Inaklonko met a makadangran dayta kaniak ken kadagiti adda iti aglawlawko.”

Gapu iti panagadalda iti Biblia, naisardeng da Olaf, Jayavanth, ken Armen ti agsigarilio, ti narugit a bisio a makadangran kadakuada ken iti sabsabali. Naisardengda dayta saan laeng a gapu ta ammoda a makadangran, no di ket gapu ta ay-ayaten ken kayatda a paragsaken ni Jehova. Iti 1 Juan 5:3, naipaganetget ti kinapateg ti ayat, kunana: “Daytoy ti kaipapanan ti ayat iti Dios, a tungpalentayo dagiti bilinna; ket kaskasdi a dagiti bilinna saanda a makapadagsen.” Siempre, no dadduma narigat a suroten dagiti prinsipio ti Biblia. Ngem no matignay ti maysa gapu iti ayatna iti Dios, saan a narigat ti agtulnog.

Babaen ti panangisuro iti intero a lubong, tultulongan ni Jehova a Dios ti minilion a tattao a makalapsut iti panangadipen ti tabako. (1 Timoteo 2:3, 4) Babaen ti Pagarianna—ti nailangitan a gobierno nga iturayan ti Anakna a ni Jesu-Kristo—asidegen a pukawen ni Jehova ti naagum a komersio a mangad-adipen iti minilion gapu iti tabako. Pasardengenna ti epidemia a panagsigarilio ken pagbalinenna a perpekto ti bagi ken isip dagiti natulnog a tattao.—Isaias 33:24; Apocalipsis 19:11, 15.

No marigatanka a mangisardeng ti panagsigarilio, dika sumuksuko. Maisardengmo dayta no masursurom nga ayaten ni Jehova ken ipategmo ti kunana maipapan iti panagsigarilio. Maragsakan dagiti Saksi ni Jehova a tumulong kenka tapno maammuam ken mayaplikarmo dagiti prinsipio ti Biblia. No kayatmo a tulongannaka ni Jehova a mangisardeng iti pannakaadikto iti tabako, ikkannaka iti bileg ken determinasion a kasapulam.—Filipos 4:13.