Sigun iti report ti United Nations:

•   Manipud Oktubre 7 agingga iti Oktubre 23, 2023, nasuroken a 6,400 ti napapatay ken 15,200 ti nadangran iti gubat ti Gaza ken Israel. Sibilian ti kaaduan kadagita. Kanayonanna, ginasut a ribu ti kapilitan a nangpanaw iti lugarda.

•   Idi Septiembre 24, 2023, addan 9,701 a sibilian a napapatay ken 17,748 a nadangran idiay Ukraine gapu iti panaggubat ti Russia ken Ukraine.

 Ania a namnama ti ipaay ti Biblia kadagiti biktima ti gubat?

 Ipakpakauna ti Biblia a ti Dios ‘pasardengennanto dagiti gubat iti intero a daga.’ (Salmo 46:9) Usarenna ti nailangitan a gobierno, wenno pagarian, a mangsukat iti amin a gobierno ti tao. (Daniel 2:44) Mangipaayto ti Pagarian ti Dios iti bang-ar kadagiti tattao.

 Kitaem ti aramidento ni Jesu-Kristo, ti Ari ti Pagarian ti Dios:

•   “Ispalennanto dagiti napanglaw nga agpatpatulong, agraman dagiti marigrigat ken ti asinoman nga awan katulonganna. Maasianto kadagiti marigrigat ken napanglaw, ket ispalennanto ti biag dagiti napanglaw. Isalakannanto ida iti pannakairurumen ken iti kinaranggas.”—Salmo 72:12-14.

 Babaen ti Pagarian, naan-anayto nga ikkaten ti Dios ti ladingit ken panagrigrigat a resulta ti gubat ken kinaranggas.

•   “Punasennanto ti amin a lua kadagiti matada, ken awanton ni patay. Awanto metten ti panagladingit wenno panagsangit wenno ut-ot. Dagiti dati a bambanag ket limmabasen.”—Apocalipsis 21:4.

 Asidegen a balbaliwan ti Pagarian ti Dios dagiti mapaspasamak ditoy daga. Impakpakauna ti Biblia dagiti “gubat iti nadumaduma a lugar” a makitkita ken madamdamagtayo ita. (Mateo 24:6) Ipakita dagitoy ken ti dadduma pay a pasamak nga agbibiagtayon iti “maudi nga al-aldaw” ti panangituray ti tao.—2 Timoteo 3:1.