Di malipatan dagiti Saksi ni Jehova iti Pilipinas ti Agosto 2013. Apay? Nairingpas ti maikasangaribu a Kingdom Hall ditoy gapu iti naisangsangayan a programa a panagibangon. Kas iti adu a pagilian, masansan a saan nga umdas ti kuarta dagiti kongregasion iti Pilipinas wenno kurang ti kapadasanda iti konstruksion tapno makaipatakderda nga is-isuda iti permanente a Kingdom Hall-da. Adu idi a tawen nga aggigimongda kadagiti pribado a pagtaengan, bayat a ti dadduma ket kadagiti babassit a patakder a naaramid iti kawayan.

Yantangay agtultuloy ti iyaadu dagiti Saksi ni Jehova iti Pilipinas ken iti adu pay a pagilian, kasapulan dagiti kanayonan a Kingdom Hall. Gapu iti dayta, inyurnos ti Bagi a Manarawidwid dagiti Saksi ni Jehova idi 1999 ti programa a panagibangon kadagiti Kingdom Hall kadagiti napanglaw a pagilian. Babaen iti daytoy nga urnos, dagiti lumugar a Saksi ket makapagkontribusion iti kabaelanda sa mainayon iti dayta a gatad dagiti pondo nga indonar ti dadduma a pagilian. Dagiti nasanayen a trabahador iti konstruksion ket maorganisar kadagiti grupo tapno tumulong kadagiti kongregasion a mangibangon iti bukodda a Kingdom Hall. Idi Nobiembre 2001, nangrugi iti Pilipinas daytoy nga internasional a programa.

Ni Iluminado ket maysa a Saksi idiay Marilao, Bulacan, a nakaibangonan ti maikasangaribu a Kingdom Hall. Kinunana: “Talaga a natagiragsakko ti Nakristianuan a panagkakabsat. Nagadu ti nagboluntario​—lallaki ken babbai, agtutubo ken nataengan. Sangsangkatunos a nagtrabahokami uray main-initankami. Nupay nabannogkami kalpasan ti agmalem a trabaho, makaparagsak a makita ti nairingpasmi a sangsangkamaysa.”

Nasdaaw met dagiti saan a Saksi iti panagregget dagiti boluntario. Kinuna ti makinkua iti trak a nangideliber iti darat ken graba: “Kaslakayo la kuton​—nagadukayo! Agtitinnulongkayo amin. Ita pay laeng a nakakitaak iti kastoy.”

Ti pasdek ket nairingpas dagiti boluntario iti kurang nga innem a lawas sipud idi impatakderda ti estruktura. Babaen ti napardas a panagibangonda iti Kingdom Hall, nabaelan ti kongregasion ti naan-anay a makipaset iti napateg a trabaho a panangikasaba iti naimbag a damag ti Pagarian ti Dios.​—Mateo 24:14.

Ni Ellen, a maysa met a Saksi, kinunana: “Saankamin nga umanay iti daan a Kingdom Hall-mi, ket adu kadakami ti kasapulan idin nga agtugaw iti ruar. Napintas ken mas komportablen ti baro a Kingdom Hall-mi isu nga ad-adda a magunggonaankami kadagiti maawatmi a pannursuro ken pammaregta kadagiti gimongmi.”