Nasayaat ti biag da Madián ken Marcela idiay Medellín, Colombia. Dakkel ti sueldo ni Madián isu a makapagyanda iti napintas nga apartment. Ngem adda nakatignayanda a mangpanunot no ania a talaga ti prioridadda kas agserserbi iti Dios a ni Jehova. “Idi 2006, immatenderkami iti espesial nga asamblea a ‘Taginayonenyo a Simple ti Matayo.’ Impaganetget ti adu a palawag ti kinapateg ti panangpasimple iti biag tapno ad-adu pay ti maaramidantayo iti panagserbi iti Dios,” kinunada. “Idi agawidkamin, napampanunotmi a saan a simple ti biagmi. Gatangkami la a gatang ket nagdakkelen ti utangmi.”

 Dakkel ti epekto dayta nga asamblea kada Madián ken Marcela isu a rinugianda a pasimplien ti biagda. “Kinissayanmi dagiti paggastuanmi,” kinunada. “Immakarkami iti basbassit nga apartment, inlakomi ti kotsemi, ken gimmatangkami iti motorsiklo.” Saanda metten a mapmapan kadagiti shopping mall tapno saanda a maengganio a gatang a gatang. Ad-adun ti orasda a makisarita kadagiti kaarrubada maipapan iti Biblia. Kanayondan a makikadua kadagiti gagayyemda nga special pioneer a a naregta nga agserserbi ken Jehova a Dios.

 Di nagbayag, inkeddeng da Madián ken Marcela nga ad-adu pay ti aramidenda iti ministerioda isu nga immakarda iti adayo a lugar nga addaan iti bassit a kongregasion nga agkasapulan iti tulong. Tapno maaramidda dayta, immikkat ni Madián iti trabahona. Impagarup ti superbisorna a naperdin ti ulona, isu nga imbaga ni Madián kenkuana: “Nagdakkel ti sueldoyo, ngem naragsakkayo kadi?” Imbaga ti superbisorna a saan, ta adu ti problema a dina masolbar. Imbaga ni Madián kenkuana: “Saan ngarud a ti kaadu ti kuarta ti napateg iti biag no di ket no ania a talaga ti mangparagsak kenka. Ti panangisuro kadagiti tattao maipapan iti Dios ti mangparparagsak kadakami ken baketko isu a kayatmi ti agbalin a naragragsak pay babaen ti panangusarmi iti ad-adu a tiempo iti dayta a trabaho.”

 Talaga a kontento ken naragsak ti biag da Madián ken Marcela gapu ta inyun-unada ti panagserbi iti Dios. Iti napalabas a 13 a tawen, nakapagserbidan kadagiti kongregasion nga agkasapulan iti ad-adu a tulong idiay amianan a laud ti Colombia. Ket ita, maragragsakanda iti pribilehioda nga agserbi kas special pioneer.