Algengar spurningar

Af hverju tala sumir illa um votta Jehóva?

Margir vita einfaldlega ekki nógu vel hverju vottar Jehóva trúa. Öðrum líkar kannski ekki að þeir skuli boða fagnaðarerindið meðal almennings. En staðreyndin er sú að þeir gera þetta vegna þess að þeim er annt um náungann og þeir vita að „hver sem ákallar nafn Drottins verður hólpinn“. — Rómverjabréfið 10:13.

Eru vottar Jehóva kristnir? Eru þeir bókstafstrúar? Eru þeir klofningshópur?

Vottar Jehóva eru kristnir því að þeir byggja kenningar sínar á Biblíunni. En þeir tilheyra engum af stóru kirkjudeildunum, svo sem lútersku eða kaþólsku kirkjunni, því að sumar kenningar þessara kirkjudeilda eiga sér ekki stoð í Biblíunni. Til dæmis kennir Biblían ekki að Guð — sjálfur persónugervingur kærleikans —  kvelji fólk að eilífu í logum vítis. Hún kennir ekki heldur að maðurinn sé með ódauðlega sál eða að kristnir menn eigi að blanda sér í stjórnmál. — Prédikarinn 9:5, 10; Jóhannes 15:19; 17:14; Rómverjabréfið 6:23. *

Íslenska alfræðiorðabókin segir að bókstafstrú sé „strangtrúarstefna meðal mótmælenda“. Í The World Book Encyclopedia segir að sum bókstafstrúarsamtök hafi „tekið félagslega og pólitíska afstöðu á grundvelli bókstafstúlkunar sinnar á Biblíunni“. Þessi skilgreining á ekki við votta Jehóva. Eins og nefnt var áður halda þeir sig utan við stjórnmál og þröngva skoðunum sínum hvorki upp á aðra með pólitískum aðferðum eða á nokkurn annan hátt. Þeir ræða öllu heldur við fólk, oftast maður við mann, og færa sannfærandi rök fyrir máli sínu eins og frumkristnir menn gerðu. — Postulasagan 19:8.

Vottar Jehóva eru ekki andófshópur innan annars trúfélags eða hópur sem hefur klofið sig frá öðru trúfélagi og myndað nýtt.

Hvernig eru samkomur vottanna?

Samkomurnar, sem eru öllum opnar, eru í eðli sínu biblíunám. Oft geta viðstaddir tekið þátt í umræðum. Ein af vikulegu samkomunum, Boðunarskólinn, þjálfar safnaðarmeðlimi í kennslutækni, upplestri og heimildaleit. Á annarri samkomu er fluttur hálftíma fyrirlestur um efni sem höfðar gjarnan til fólks sem er ekki vottar. Á eftir honum fer að jafnaði fram biblíunám  þar sem stuðst er við tímaritið Varðturninn. Samkomurnar byrja og enda með söng og bæn. Engin fjáröflunarstarfsemi fer fram og engir samskotabaukar eru látnir ganga á milli samkomugesta. — 2. Korintubréf 8:12.

Hvernig fjármagna Vottar Jehóva starfsemi sína?

Starf þeirra er fjármagnað með frjálsum framlögum. Vottarnir taka ekki gjald fyrir að skíra fólk, gifta og jarða eða fyrir nokkra aðra trúarlega þjónustu. Þeir borga ekki tíund. Hver sem vill leggja eitthvað að mörkum getur sett framlag sitt í bauk sem er á lítt áberandi stað í ríkissalnum. Vottar Jehóva framleiða sjálfir biblíuritin sem þeir nota en það heldur kostnaðinum í lágmarki. Ríkissalir þeirra og deildarskrifstofur eru án íburðar og eru að mestu leyti byggð af sjálfboðaliðum.

Þiggja vottar Jehóva læknismeðferð?

Já, þeir sækjast eftir bestu læknismeðferð sem þeir geta fengið fyrir sig og sína. Margir vottar vinna jafnvel á heilbrigðissviðinu sem hjúkrunarfræðingar, bráðaliðar, læknar og skurðlæknar. Vottar Jehóva hafna hins vegar blóðgjöfum. „Haldið yður frá . . . blóði,“ segir í Biblíunni. (Postulasagan 15:28, 29) Það er athyglisvert að æ fleiri læknar telja meðferð án blóðgjafar bestu læknismeðferð sem völ er á því að þá er hægt að sneiða hjá margs konar áhættu sem fylgir blóðgjöfum.

[Neðanmáls]

[Rammi/mynd á bls. 7]

ÞAR RÍKIR GAGNKVÆM VIRÐING

Bærinn Bejucal de Ocampo í Suður Mexíkó er dálítið óvenjulegur. „Meirihluti íbúa er vottar Jehóva,“ segir í frétt í dagblaðinu Excélsior. Blaðið bætir við: „Þar ríkir gagnkvæm virðing í trúarlegum og pólitískum efnum . . . Íbúarnir hafa tekið söng og biblíulestur fram yfir drykkjuskap og reykingar. Og þeir virða yfirvöld.“

Dagblaðið sagði að þrátt fyrir ólík trúarbrögð í bænum hafi ekki „risið upp trúardeilur eða komið til árekstra“. Þar sagði einnig: „Fjandskapur fyrirfinnst ekki og nágrannar heilsast þrátt fyrir ólíkar trúarskoðanir . . . Hver fjölskylda er frjáls til að stunda trú sína og það hindrar bæjarbúa ekki í að búa saman í friði og spekt. Það kippir sér enginn upp við að vottar Jehóva séu mjög áberandi í Bejucal.“ Og börnin þeirra ,klæða sig sómasamlega, þeim gengur vel í skóla og þau hegða sér vel í tímum,‘ sagði kennari í unglingaskóla í bænum. Kennarinn er ekki vottur.