LESN 3
Di Gud Nyuuz we Iina di Baibl—A Riili Gad It Kom Fram?
1. A uu gi wi di mesij we iina di Baibl?
Di mesij we iina di Baibl kom fram Gad. Di Baibl mek op a 66 likl buk, an Gad yuuz bout 40 raichos man fi rait dem. Wan a dem raichos man de a did Muoziz, an im rait di fos faiv buk bout 3,500 ier ago. An wan a Jiizas speshal falara dem we niem Jan, im rait di laas buk uova 1,900 ier ago. So evriting we dem raichos man de rait a we Gad tel dem fi rait. Gad yuuz im uoli spirit fi mek dem rait we im waahn dem fi rait. (2 Samuel 23:2) So di mesij we iina di Baibl, a Gad it kom fram.—Riid 2 Timoti 3:16; 2 Piita 1:20, 21.
Wach da vidiyo ya A uu gi wi di mesij we iina di Baibl?
2. Wa a di riizn dem wai wi kyan chos di Baibl?
Evriting we di Baibl se bout di fyuucha, it a-go apm jos so. Man kyaahn du dat. (Joshua 23:14) Onggl Almaiti Gad aluon kyan du dat.—Riid Taitos 1:2, 3.
Neks ting, bikaa di Baibl kom fram Gad, it difrant fram evri ada buk. A uol iip a Baibl de iina nof nof difrant langwij. An tingk bout dis: Iivn duo di Baibl a no skuul teksbuk, an it de bout lang taim, eniting we it se bout kriyieshan, a so it go. Plos, di 40 man dem we rait di Baibl, evriting we dem rait kanek tugeda. Pan tap a dat, di Baibl mek wi nuo ou Gad lov wi, an it av di powa fi chienj wi laif fi di beta. Dem ting de mek wi nuo se di Baibl a Gad Wod.—Riid 1 Tesaluoniyan 2:13.
Wach da vidiyo ya Ou wi kyan nuo se wa iina di Baibl chuu?
3. Wa a di mien ting dem di Baibl taak bout?
Iina di Baibl, wi fain di gud nyuuz bout wa wi lovin Faada av in stuor fi wi. Di Baibl tel wi wa apm wai wi naa liv fi eva nou, an it tel wi we wi lovin Faada a-go du fi mek wi liv iina Paradais pan ort agen.—Riid Revilieshan 21:4, 5.
Plos, di Baibl tel wi wa wi fi du, wa wi no fi du, ou wi fi riizn, an ou wi kyan salv wi prablem dem. Aneda ting, di Baibl tel wi ou Gad diil wid piipl iina di paas, an dat mek wi nuo bout im wiez. So di Baibl kyan elp wi nuo Gad an shuo wi wa wi kyan du fi bi im fren.—Riid Ruoman 15:4; Jiemz 2:23; 4:8.
4. So, ou yu kyan andastan di Baibl?
Wen Jiizas did de pan di ort a tiich piipl, im yuuz wan skripcha afta aneda an eksplien we dem miin. An a di siem wie dem lesn ya a-go elp yu “andastan we Gad Wod se.”—Riid Luuk 24:27, 45.
Notn no swiit laik di gud nyuuz fram Gad, bot som no waahn ier it, an som se it anai dem. Bot no mek dat stap yu. Ef yu waahn fi liv fi eva, yu afi lorn bout Gad.—Riid Jan 17:3.
