LESN 4
Uu A Jiizas Krais?
1. Ou Jiizas laif staat?
Wa a som a Jiizas wiez we did mek it iizi fi piipl taak tu im an waahn fi de roun im?—MATYU 11:29; MAAK 10:13-16.
Bifuor Jiizas did baan pan di ort, im did liv iina evn az wan ienjel. (Jan 8:23) Jiizas a di fos wan we Gad mek, an im get fi elp mek evriting els. Outa evribadi els, Jiizas a di onggl wan we a Gad aluon mek im, an dats wai im a Gad wan speshal Son. (Jan 1:14) Somtaim di Baibl taak bout Jiizas an kaal im “di Wod.” Yu nuo wa mek? Bikaaz Jiizas a Gad speshal Mesinja.—Riid Koloshan 1:15, 16.
2. A wa mek Jiizas did kom pan di ort?
Jiizas kom pan di ort bikaa Gad sen im fi dem chrii riizn ya: (1) fi tiich piipl di chuut bout Gad, (2) fi shuo wi ou wi fi liv fi pliiz Gad iivn wen it aad, an (3) fi gi op im porfek laif fi set piipl frii.—Riid Matyu 20:28.
3. Wa mek wi did niid sumadi fi set wi frii?
Wen Gad did mek di fos man, Adam, im tel im se ef im sin, im a-go ded. So ef Adam neva sin, im wudn ded, an wi wudn en op a ded iida. So riili, piipl a get sik an piipl a ded—a no dat Gad did waahn fi wi. (Genesis 2:16, 17; 5:5) Bot rait nou, sin an det uol wi laik ou wan kriminal uol sumadi we dem kidnap. Ef a kriminal kidnap sumadi, moni afi pie fi set dem frii so dat dem no ded. Sin an det komiin laik kriminal we kyapcha wi. (Exodus 21:29, 30) So ef sitn no pie fi set wi frii fram sin an det, wi no av no uop, an aal a wi—wi kaana daak.—Riid Ruoman 5:12; 6:23.
So uu kuda riili set wi frii fram sin an det, duo? Wen eni wan a wi ded, wi onggl en op pie fi wi uona sin. Bot fi wi det no set naida wiself nar nobadi els frii fram sin an det kaa wi no porfek.—Riid Ruoman 3:23.
4. Wa mek Jiizas kom ded fi wi?
Jiizas a did wan porfek sumadi. Im a neehn sina, so im neehn av no sin fi ded fa. Bot im kom ded fi fi wi sin so dat wi no afi ded. So dat shuo umoch Gad lov wi wen im “gi op im wan dege-dege Bwai Pikni” fi kom ded fi wi. An a bikaa Jiizas did lov wi tu wai im du wa im Faada se an kom ded fi wi sin.—Riid Jan 3:16; Ruoman 5:18, 19.
Wach da vidiyo ya Wa mek Jiizas kom ded fi wi?
5. Wa Jiizas a du nou?
Wen Jiizas did de pan di ort, im du nof gud tingz, laik im iil di sik, an im riez op piipl we did ded. Aal a dem sitn de gi wi a likl prips a wa Jiizas a-go du iina di fyuucha fi aal a di piipl dem we a du we Gad se dem fi du. (Matyu 15:30, 31; Jan 5:28) Afta Jiizas ded, Gad bring im bak tu laif az a iivn muo powaful ienjel. (1 Piita 3:18) Den Jiizas wiet pan Gad fi gi im di rait fi ruul az King uova di uol ort. (Iibruu 10:12, 13) Rait ya nou, Jiizas a ruul az King iina evn, an da gud nyuuz de a wa im falara dem a tel piipl aal uova di worl bout.—Riid Matyu 24:14; Revilieshan 11:15.
Suun suun, Jiizas a-go yuuz im powa fi get rid a aal sofarin an aal a di wikid piipl dem we kaaz it. Aal uu chos iina Jiizas an du wa im se a-go enjai a swiit laif we nais kyaahn don wen dis ya ort ya a Paradais agen.—Riid Luuk 23:42, 43.
