კანონი 4:1—49
4 «ისრაელებო, დაიცავით ის წესები და სამართალი, რომელიც გასწავლეთ, რათა იცოცხლოთ+ და დაიმკვიდროთ მიწა, რომელსაც იეჰოვა, თქვენი მამა-პაპის ღმერთი, გაძლევთ.
2 არაფერი დაუმატოთ და არაფერი მოაკლოთ იმ სიტყვას,+ რომელსაც გიბრძანებთ, რათა დაიცვათ იეჰოვას, თქვენი ღვთის, მითითებები.
3 თქვენი თვალით ნახეთ, რა მოიმოქმედა იეჰოვამ ფეორის ბაალის გამო. იეჰოვამ, თქვენმა ღმერთმა, მოსპო ყველა, ვინც ფეორის ბაალს თაყვანი სცა.+
4 მაგრამ თქვენ, ვინც იეჰოვას, თქვენს ღმერთს, უერთგულეთ, ყველანი ცოცხლები ხართ.
5 მე გასწავლეთ წესები და სამართალი,+ როგორც იეჰოვამ, ჩემმა ღმერთმა, მიბრძანა, რათა დაიცვათ იმ მიწაზე, რომელსაც დაიმკვიდრებთ.
6 ზედმიწევნით დაიცავით და შეასრულეთ ეს წესები,+ რათა დაინახოს ხალხმა, რომ ბრძენნი და გონიერნი ხართ,+ და თქვან, ეს დიდი ერი ნამდვილად ბრძენი და გონიერიაო.+
7 რომელ დიდ ერთან არიან ასე ახლოს მათი ღმერთები, როგორც ჩვენთანაა იეჰოვა, ჩვენი ღმერთი, ყოველთვის, როცა ვუხმობთ?!+
8 რომელ დიდ ერს აქვს იმ კანონების მსგავსი სამართლიანი წესები და კანონები, რომელთაც მე გაძლევთ დღეს?!+
9 იფრთხილეთ და დაუკვირდით საკუთარ თავს, რომ არ დაგავიწყდეთ ის, რაც თქვენი თვალით იხილეთ, და მთელი ცხოვრება გულში გქონდეთ ჩაბეჭდილი. ამის შესახებ თქვენს შვილებს და შვილიშვილებსაც მოუყევით.+
10 იმ დღეს, როცა იეჰოვას წინაშე იდექით ხორებთან, იეჰოვამ მითხრა: „შემიკრიბე ხალხი, რომ გადავცე ჩემი სიტყვები,+ რათა მთელი ცხოვრება თავადაც სწავლობდნენ ჩემდამი შიშს+ და თავიანთ ვაჟებსაც ასწავლიდნენ“.+
11 თქვენ მოუახლოვდით მთას და მის ძირას დადექით. იწვოდა მთა, ცას სწვდებოდა ცეცხლი; შავი ღრუბელი და სიბნელე ჩამოწოლილიყო.+
12 ცეცხლიდან დაგელაპარაკათ იეჰოვა.+ მისი ხმა გესმოდათ, მაგრამ ვერაფერს ხედავდით,+ მხოლოდ ხმა გესმოდათ.+
13 შეთანხმება დაგიდოთ+ და ათი მცნების+ დაცვა გიბრძანათ. მან ეს მცნებები ორ ქვის ფილაზე დაგიწერათ.+
14 მაშინ მიბრძანა იეჰოვამ, რომ თქვენთვის წესები და სამართალი მესწავლებინა, რათა დაგეცვათ იმ მიწაზე, რომლის დასაპატრონებლადაც მიდიხართ.
15 იმ დღეს, როცა იეჰოვა ხორებთან ცეცხლის შუაგულიდან დაგელაპარაკათ, არანაირი გამოსახულება არ გინახავთ; ამიტომ ფრთხილად იყავით,
16 რომ არ მოიქცეთ უკეთურად და არ გაიკეთოთ არანაირი ქანდაკება, არც კაცისა, არც ქალისა,+
17 არც ცხოველისა, რაც მიწაზე ბინადრობს, არც ფრინველისა, რაც ცაში დაფრინავს,+
18 არც იმისა, რაც მიწაზე დახოხავს, და არც არანაირი თევზისა, რაც წყალშია, მიწის ქვემოთ.+
19 როცა ზეცისკენ აღაპყრობთ თვალს და დაინახავთ მზეს, მთვარესა და ვარსკვლავებს, ცის მთელ ლაშქარს, არ ცდუნდეთ, მათ წინაშე პირქვე არ დაემხოთ და თაყვანი არ სცეთ.+ ისინი იეჰოვამ, თქვენმა ღმერთმა, ცისქვეშეთში ყველა ხალხს მისცა.
20 იეჰოვამ თქვენ რკინის საწრთობი ღუმლიდან, ეგვიპტიდან, გამოგიყვანათ, რათა მისი ხალხი, მისი საკუთრება, გამხდარიყავით,+ და გახდით კიდეც.
21 თქვენ გამო განმირისხდა იეჰოვა+ და დაიფიცა, რომ ვერ გადავლახავდი იორდანეს და ვერ შევიდოდი მადლიან მიწაზე, რომელსაც იეჰოვა, თქვენი ღმერთი, გაძლევთ დასამკვიდრებლად.+
22 მე ამ მიწაზე მოვკვდები. მე ვერ გადავლახავ იორდანეს,+ მაგრამ თქვენ გადალახავთ და დაიმკვიდრებთ იმ მადლიან მიწას.
23 იფრთხილეთ, რომ არ დაივიწყოთ შეთანხმება, რომელიც იეჰოვამ, თქვენმა ღმერთმა, დაგიდოთ;+ არ გაიკეთოთ ქანდაკება, არაფერი იმის მსგავსი, რაც იეჰოვამ, თქვენმა ღმერთმა, აგიკრძალათ.+
24 იეჰოვა, თქვენი ღმერთი, შთამნთქმელი ცეცხლია,+ არ იწყნარებს ორგულობას.+
25 იმ მიწაზე შვილები და შვილიშვილები შეგეძინებათ და დიდხანს იცხოვრებთ; მაგრამ, თუ უკეთურად მოიქცევით და გაიკეთებთ რაიმე ქანდაკებას,+ ბოროტებას ჩაიდენთ იეჰოვას, თქვენი ღვთის, თვალში და შეურაცხყოფთ მას,+
26 ცასა და დედამიწას ვიმოწმებ დღეს, რომ მალევე მოისპობით იმ მიწიდან, რომელსაც იორდანის გადალახვის შემდეგ დაიმკვიდრებთ. ვერ იქნებით დღეგრძელნი, მოისპობით.+
27 იეჰოვა ხალხებში გაგფანტავთ,+ და იქ, სადაც იეჰოვა გაგფანტავთ, ცოტანი გადარჩებით.+
28 იქ დაუწყებთ თაყვანისცემას ადამიანის ხელით შექმნილ ხისა და ქვის ღმერთებს,+ რომლებიც ვერ ხედავენ, არ ესმით, ვერ ჭამენ და არც ყნოსვა შეუძლიათ.
29 თუ ძებნას დაუწყებთ იქ იეჰოვას, თქვენს ღმერთს, იპოვით კიდეც,+ ოღონდ მთელი სულითა და გულით თუ მოძებნით მას.+
30 როცა გასაჭირში ჩაცვივდებით და ეს სიტყვები თქვენზე შესრულდება, მაშინ დაუბრუნდებით იეჰოვას, თქვენს ღმერთს, და დაუჯერებთ მას.+
31 თქვენი ღმერთი იეჰოვა გულმოწყალე ღმერთია.+ არ მიგატოვებთ, არ მოგსპობთ და არ დაივიწყებს თქვენს მამა-პაპასთან ფიცით დადებულ შეთანხმებას.+
32 გაიხსენეთ წარსული დღეები, რა მოხდა თქვენამდე, იმ დღიდან მოყოლებული, რაც ღმერთმა დედამიწაზე ადამიანი შექმნა; გამოიკითხეთ ცის ერთი კიდიდან მეორე კიდემდე. ნუთუ მომხდარა რაიმე ამაზე დიდებული ან გსმენიათ მსგავსი რამ?!+
33 მოუსმენია თქვენ გარდა სხვა ხალხს ცეცხლიდან ღვთის ხმა და დარჩენილა ცოცხალი?!+
34 ან, თუ დაუხსნია ღმერთს თავისთვის სხვა ხალხი სასჯელებით, სასწაულებით,+ ომით,+ ძლიერი ხელით,+ გაწვდილი მკლავით და შიშის მომგვრელი საქმეებით,+ რაც იეჰოვამ, თქვენმა ღმერთმა, თქვენ თვალწინ ეგვიპტეში თქვენთვის მოიმოქმედა?!
35 მან ეს ყველაფერი იმიტომ გახილვინათ, რომ გცოდნოდათ: იეჰოვაა ჭეშმარიტი ღმერთი+ და სხვა არავინაა მის გარდა.+
36 ზეციდან გაგაგონათ თავისი ხმა, რომ გამოესწორებინეთ; დედამიწაზე გახილვინათ დიდი ცეცხლი და იმ ცეცხლიდან მოისმინეთ მისი სიტყვები.+
37 შეიყვარა თქვენი მამა-პაპა, ამოგირჩიათ თქვენ, მათი შთამომავლობა,+ და თავისი ძლევამოსილებით გამოგიყვანათ ეგვიპტიდან.
38 განდევნა თქვენზე გაცილებით დიდი და ძლიერი ერები, რათა შეეყვანეთ მათ მიწაზე და მოეცა თქვენთვის ის მიწა მემკვიდრეობად, რაც ასეც არის.+
39 ამიერიდან იცოდეთ და არასოდეს დაგავიწყდეთ, რომ იეჰოვაა ჭეშმარიტი ღმერთი მაღლა ზეცაში და დაბლა მიწაზე;+ მის გარდა სხვა არავინაა.+
40 დაიცავით მისი წესები და მცნებები, რომელთაც დღეს გიბრძანებთ, რათა ხელი მოგემართოთ თქვენ და თქვენს ვაჟებს და დღეგრძელნი იყოთ იმ მიწაზე, რომელსაც თქვენი ღმერთი იეჰოვა გაძლევთ».+
41 მაშინ გამოყო მოსემ სამი ქალაქი იორდანის აღმოსავლეთით.+
42 ვისაც მოძმე შემოაკვდება,+ რომელიც არ სძულებია, მან ამ ქალაქებიდან ერთ-ერთს უნდა შეაფაროს თავი, რომ იცოცხლოს.+
43 რეუბენელებისთვის ასეთი ქალაქია ბეცერი,+ რომელიც ზეგანზე მდებარე უდაბნოში მდებარეობს, გადელებისთვის — გალაადის რამოთი+ და მენაშელებისთვის+ — ბაშანის გოლანი.+
44 ეს არის კანონი,+ რომელიც მოსემ ისრაელებს დაუწესა.
45 ეს არის მითითებები*, წესები და სამართალი, რომლებიც მოსემ გადასცა ისრაელებს, როცა ეგვიპტიდან გამოვიდნენ,+
46 იორდანის მხარეში, ველზე ბეთ-ფეორის წინ,+ ხეშბონში,+ იმ მიწაზე, სადაც ამორეველთა მეფე სიხონი ცხოვრობდა, რომელიც მოსემ და ისრაელებმა დაამარცხეს ეგვიპტიდან გამოსვლის შემდეგ.+
47 დაეპატრონნენ ამ მიწას და ბაშანის მეფის, ოგის,+ მიწას, ამორეველთა ორივე მეფის მიწებს იორდანის აღმოსავლეთით,
48 არნონის+ ხევის პირას მდებარე აროერიდან სიონის, იგივე ხერმონის, მთამდე,+
49 მთელ არაბას იორდანის აღმოსავლეთით, არაბის ზღვამდე*, ფისგის ფერდობებამდე.+
სქოლიოები
^ დედანში ეს სიტყვა ნათქვამის გამეორების, შეხსენების აზრს ატარებს.
^ იგივე მარილოვანი ზღვა, მკვდარი ზღვა.
