მათეს სახარება 21:1—46
21 როცა ისინი იერუსალიმის სიახლოვეს ზეთისხილის მთაზე მდებარე ბეთფაგეს მიადგნენ, იესომ ორი მოწაფე გაგზავნა+
2 და დააბარა: „აი ამ სოფელში წადით; როგორც კი შეხვალთ, დაინახავთ დაბმულ ვირსა და ჩოჩორს. აუშვით და მომიყვანეთ.
3 თუ ვინმე რამეს გეტყვით, უთხარით, უფალს სჭირდება-თქო და მაშინვე გამოგატანენ“.
4 ეს მოხდა, რათა შესრულებულიყო წინასწარმეტყველის პირით ნათქვამი:
5 «უთხარით სიონის ასულს: „აი, მოდის შენთან შენი მეფე,+ რბილი ხასიათისა;+ ვირზე ზის, ჩოჩორზე, სახედრის ნაშიერზე“».+
6 წავიდნენ მოწაფეები და ისე მოიქცნენ, როგორც იესომ დაარიგა.+
7 მოიყვანეს ვირიცა და ჩოჩორიც, ზედ თავიანთი მოსასხამები დაუფინეს და ისიც შეჯდა.+
8 ბევრი თავის მოსასხამს უფენდა გზაზე,+ ზოგი კი ტოტებს აჭრიდა ხეებს და გზაზე უფენდა.
9 მის წინ და მის უკან მიმავალნი ხმამაღლა გაიძახოდნენ: „გევედრებით, იხსენი დავითის ძე!+ კურთხეულია იეჰოვას* სახელით მომავალი!+ გევედრებით, იხსენი იგი, ზეციერო!“+
10 შევიდა იესო იერუსალიმში და მთელ ქალაქში აურზაური ატყდა, კითხულობდნენ, ეს ვინ არისო.
11 მასთან მყოფი ხალხი ამბობდა: „ეს წინასწარმეტყველი იესოა+ გალილეის ქალაქ ნაზარეთიდან!“
12 იესო ტაძარში შევიდა და გარეთ გაყარა ყველა, მყიდველიცა და გამყიდველიც; ფულის გადამცვლელებს მაგიდები აუყირავა და მტრედების გამყიდველებს — სკამები.+
13 უთხრა მათ: „დაწერილია, ჩემი ტაძარი სამლოცველო ადგილი გახდებაო,+ თქვენ კი ყაჩაღების ბუნაგად გიქცევიათ!“+
14 ტაძარში მასთან უსინათლოები და კოჭლები მივიდნენ და მანაც განკურნა ისინი.
15 როცა უფროსმა მღვდლებმა და მწიგნობრებმა იხილეს სასწაულები, მან რომ მოახდინა, და ბავშვები, რომლებიც ტაძარში ხმამაღლა გაიძახოდნენ, გევედრებით, იხსენიო დავითის ძე,+ აღშფოთდნენ+
16 და ჰკითხეს მას: „გესმის, რას ამბობენ?“ «მესმის, — მიუგო იესომ. — ნუთუ არ წაგიკითხავთ: „ბავშვები და ჩვილები შეგასხამენ ხოტბას“?»+
17 დატოვა იქაურობა, ბეთანიაში წავიდა და ღამე იქ გაათია.+
18 დილაადრიან, როცა ქალაქში ბრუნდებოდა, მოშივდა.+
19 გზაზე ლეღვის ხე დაინახა და ახლოს მივიდა, მაგრამ ფოთლების გარდა მასზე ვერაფერი რომ ვერ ნახა,+ უთხრა: „აღარასოდეს გამოგეღოს ნაყოფი!“+ ლეღვი მაშინვე გახმა.
20 ეს რომ მოწაფეებმა დაინახეს, გაკვირვებულებმა იკითხეს: „ასე უცბად რამ გაახმო ლეღვი?“+
21 იესომ მიუგო: „ჭეშმარიტებას გეუბნებით: თუ რწმენა გექნებათ და არ დაეჭვდებით, მარტო იმას კი არ გააკეთებთ, რაც ამ ლეღვს დავმართე, არამედ ამ მთასაც რომ უთხრათ, აიწიე და ზღვაში ჩავარდიო, ასეც მოხდება;+
22 ყველაფერს, რასაც კი ლოცვაში რწმენით ითხოვთ, მიიღებთ“.+
23 იესო ტაძარში იყო და ხალხს ასწავლიდა, როცა მივიდნენ მასთან უფროსი მღვდლები და ხალხის უხუცესები და ჰკითხეს: „რა უფლებით აკეთებ ამას? ვინ მოგცა შენ ამის უფლება?“+
24 იესომ მიუგო: „მეც გკითხავთ ერთ რამეს და, თუ მიპასუხებთ, მეც გეტყვით, რა უფლებით ვაკეთებ ამას.
25 საიდან ჰქონდა იოანეს ნათლობის უფლება — ზეციდან თუ კაცთაგან?“ მათ მსჯელობა დაიწყეს: „თუ ვიტყვით, ზეციდანო, ის გვეტყვის, მაშ, რატომ არ ერწმუნეთო,+
26 მაგრამ, თუ ვიტყვით, კაცთაგანო, ხალხისა უნდა გვეშინოდეს, რადგან იოანე ყველას წინასწარმეტყველად მიაჩნია“.
27 ბოლოს უთხრეს იესოს: „არ ვიცით“. მანაც მიუგო: „მაშინ არც მე გეტყვით, რა უფლებით ვაკეთებ ამას“.
28 «ამაზე რას ფიქრობთ? ერთ კაცს ორი შვილი ჰყავდა. მივიდა ერთთან და უთხრა: „შვილო, წადი დღეს ვენახში იმუშავე!“
29 მან მიუგო, არ წავალო, მაგრამ მერე ინანა და წავიდა.
30 მივიდა მეორესთან და იგივე უთხრა. მან მიუგო, კი ბატონო, წავალო, მაგრამ არ წავიდა.
31 ამ ორიდან რომელმა შეასრულა მამის ნება?» მათ უთხრეს: „პირველმა“. მაშინ იესომ უთხრა: „ჭეშმარიტებას გეუბნებით: მებაჟეები და მეძავები თქვენზე უწინ დაიმკვიდრებენ ღვთის სამეფოს,
32 რადგან იოანე მოვიდა და სიმართლის გზა გიჩვენათ, მაგრამ არ ერწმუნეთ მას, ხოლო მებაჟეები და მეძავები ერწმუნნენ.+ თქვენ კი, თუმცა დაინახეთ ეს, მაინც არ მოინანიეთ და არ ერწმუნეთ.
33 მოისმინეთ სხვა იგავი: ერთმა მიწათმფლობელმა ვენახი გააშენა,+ ღობე შემოავლო, საწნახელი ამოკვეთა, კოშკი ააგო+ და მევენახეებს იჯარით მისცა, თვითონ კი შორს გაემგზავრა.+
34 რთველი რომ მოახლოვდა, მევენახეებს მონები გაუგზავნა თავისი წილის მისაღებად,
35 მაგრამ მევენახეებმა შეიპყრეს მისი მონები, ერთს სცემეს, მეორე მოკლეს, მესამე კი ჩაქოლეს.+
36 კიდევ გაგზავნა მონები, ამჯერად უფრო მეტი, მაგრამ მათაც ასევე მოექცნენ.+
37 ბოლოს თავისი ძე გაუგზავნა, ამბობდა, ჩემს ძეს მაინც მოექცევიანო პატივისცემით.
38 ის რომ დაინახეს, მევენახეებმა ერთმანეთს გადაულაპარაკეს, ეს მემკვიდრეა,+ მოდი მოვკლათ და მის მემკვიდრეობას დავეპატრონოთო.
39 შეიპყრეს, ვენახიდან გაათრიეს და მოკლეს.+
40 როცა ვენახის პატრონი მოვა, რას უზამს ამ მევენახეებს?“
41 მათ უთხრეს: „ამ ბოროტებისთვის დაუნდობლად დახოცავს მათ, ვენახს კი ისეთ მევენახეებს ჩააბარებს, რომლებიც დროულად მისცემენ მოსავალს“.
42 იესომ უთხრა მათ: «ნუთუ არასოდეს წაგიკითხავთ წმინდა წერილებში: „მშენებლების მიერ დაწუნებული ქვა კუთხის თავში დასადებ ქვად იქცა;+ ეს იეჰოვას* წყალობით მოხდა და მართლაც საოცრებაა“?!+
43 ამიტომ გეუბნებით: წაგერთმევათ ღვთის სამეფო და მიეცემა ერს, რომელიც შესაფერის ნაყოფს გამოიღებს.
44 ვინც ამ ქვაზე დაეცემა, დაიმტვრევა,+ ხოლო ვისაც ის დაეცემა, გასრესს».+
45 ეს იგავები რომ მოისმინეს, უფროსი მღვდლები და ფარისევლები მიხვდნენ, რომ იესო მათზე ლაპარაკობდა.+
46 მათ მისი შეპყრობა სურდათ, მაგრამ ხალხისა ეშინოდათ, რადგან წინასწარმეტყველად მიაჩნდათ იგი.+
