Ih. Inagan n Yahwa ţţamnen belli Adlis Iqedsen s lekmal-is d adlis ‘i d-iţţuweḥḥan sɣur Ṛebbi yerna yenfeɛ.’ (2 Timutawus 3:16) Daymi i ţţamnen s sin yeḥricen yellan deg-s, umi i qqaren medden Lɛahd Aqdim akk-d Lɛahd Ajdid. Bac a d-bedren Inagan iḥricen-agi, ssexdamen imeslayen “Tira tiɛibṛaniyin” akk-d imeslayen “Tira tiyunaniyin timasiḥiyin.” Swakka, ur d-ţbegginen ara belli yella weḥric seg Wedlis Iqedsen i geǧǧa zzman neɣ ur neṣliḥ ara ass-a.

 Amceggeɛ Bulus, yellan d amasiḥi, iweḥḥa-yas-d Ṛebbi ad yaru: “Ayen akw yuran si zik, yura i leqraya-nneɣ.” (Iṛumaniyen 15:4) Tira tiɛibṛaniyin deg-sent lumuṛ ideg yella nnfeɛ ar ass-a, gar-asen tiḥkayin yeḍran zik yerna yesɛan azal, akk-d lewṣayat iṣelḥen.

•   Tiḥkayin yeḍran zik yerna yesɛan azal. Tira tiɛibṛaniyin ḥekkunt-ed s ţfaṣil ɣef wamek i d-yexleq Ṛebbi ddunit yerna ḥekkunt-ed swaswa amek i gḥuza ddnub imdanen. Lukan ulac tiḥkayin-agi, tili ur d-neţţaf ara leǧwab yeţqenniɛen ɣef yesteqsiyen am wigi: “Ansi i d-nekka?” neɣ “Acuɣer i neţmeţţat?” (Laṣel n ddunit 2:7, 17) Uyerna, Tira tiɛibṛaniyin sskanayent-ed amek i sen-yelḥa Yahwa i yemdanen i gɛacen lfuṛuḥ neɣ i d-iɛeddan si cceddat, am nekni.—Yeɛqub 5:17.

•   Lewṣayat iṣelḥen. Di snat n tektabin n Wedlis Iqedsen yeţţusemman Lemtul akk-d Umusnaw, yellan di Tira tiɛibṛaniyin, neţţaf lekyasa iṣelḥen i yemdanen di mkul zzman. Tiktabin-agi ţmuddunt-ed lewṣayat iwulmen bac ad yesɛu walbeɛḍ tawacult ţ-ţaseɛdit (Lemtul 15:17), bac ad yesɛu lmizan deg wayen yeɛnan lxedma (Lemtul 10:4; Amusnaw 4:6) neɣ bac ad ifareṣ si temẓi-ines akken ilaq yerna s lekyasa.—Amusnaw 11:9–12:1.

 Si lǧiha nniḍen, nesfayday-ed aṭas seg usenqed n Lqanun i d-yeţţunefken i Musa; Lqanun-agi yella di Tuṛat (yeɛni xemsa tektabin timezwura n Wedlis Iqedsen). Imasiḥiyen ur ţţuḥettmen ara ad ɛicen ɛlaḥsab n Lqanun-agi, meɛna zemren ad afen deg-s imenzayen ifazen ara ten-iɛiwnen ad ilin d iseɛdiyen.—At Lewwi 19:18; Asmekti 6:5-7.