Uqbel 1931, nella neţţusemma “Inelmaden n Wedlis Iqedsen.” Deg useggas-​nni, nefka i yiman-​nneɣ isem n Inagan n Yahwa. Aṭas i genwan belli d isem n ddin ajdid. Meɛna, akteṛ n 2 700 iseggasen ɣer deffir, Ṛebbi awḥid n ṣṣeḥ yella isemma yakan i iqeddacen-​is “inagan-​iw.”—Icɛaya 43:10-12.

Isem-​agi isskanay-​ed anwa i d Ṛebbi-​nneɣ. Isem n Ṛebbi, yeɛni Yahwa, yella yeţwakteb luluf n tikkal deg iţafţaren n zik n Wedlis Iqedsen. Di xilla n ṭrejmat, kksen isem-​agi, rran deg wemkan-​is imeslayen am “Ameɣlal” neɣ “Ssid”. Acu kan, di lluɣat timezwura, Ṛebbi n ṣṣeḥ ibeggen-​ed iman-​is i Musa s yisem-​is, yeɛni Yahwa. Ssyin yenna-​yas: “D wagi i d isem-​iw, i dayem.” (Tuffɣa 3:15) Akka, isbeggen-​ed belli yemxallaf ɣef iṛebbiten akk n lekdeb. S zzux i nreffed isem imqeddes n Ṛebbi.

Isem-​agi yeţwerri-​d acu i d ccɣel-​nneɣ. Xilla n tlawin tunṣiḥin d yergazen unṣiḥen i gumnen s Yahwa yerna i d-​icehhden fell-​as; amezwaru deg-​sen d Habil. Skud ţɛeddin leqrun, skud ţţilin wid i d-​irennun ɣer terbaɛt-​agi n ‘waṭas n inagan’, gar-​asen Nuḥ, Abṛaham, Ṣara, Musa, Dawed akk-​d wiyaḍ. (Iɛebṛaniyen 11:4–12:1) Inigi yezmer a d-​icehhed deg wexxam n ccṛeɛ belli flan ur yexdim acemma. Akken ula d nekni, neţnadi a d-​nehdeṛ tideţ ɣef Ṛebbi.

Ɛisa daɣen d inigi. Adlis Iqedsen isemma-​yas “inigi unṣiḥ [...] aḥeqqani.” (Aweḥḥi 3:14) Neţţa s timmad-​is yenna-​d belli isbeggen-​ed isem n Ṛebbi i lɣaci yerna ‘icehhed-​ed ɣef tideţ.’ (Yuḥenna 17:26; 18:37) Ihi, ilaq-​asen i inelmaden n Ɛisa ad refden isem n Ṛebbi w’a t-​mlen i medden. D annect-​a i xeddmen Inagan n Yahwa.

• Ayɣer i fkan Inelmaden n Wedlis Iqedsen i yiman-​nsen isem n “Inagan n Yahwa”?

• Acḥal aya segmi i gesɛa Yahwa inagan ɣef lqaɛa?

• Anwa i d Inigi yakk ameqran n Yahwa?