Inagan n Yahwa ţwassnen seg waṭas aya s useḥfeḍ ireṣṣan ɣef Wedlis Iqedsen i ten-​id-​iţṣaḥen deg iɣerbazen-​nsen (llakulat-​nsen). Wid yeţţaken lweqt-​nsen kamel i uberreḥ zemren ad sfaydin s yiwen uselmed amxalef bac a ‘d-​lhin d leqdic-​nsen akken ilaq.’—2 Timutawus 4:5.

Aɣerbaz n inaramen. M’ara ifakk unaram aseggas-​ines amezwaru i gesɛedda di leqdic n lweqt kamel, a s-​iţţunefk uselmed ara yekken seţţ eyyam, di Tzeqqa n Tgelda iqerben axxam-​is neɣ deg wemḍiq nniḍen. Aɣerbaz-​agi yeţwaxdem iwakken ad iɛiwen inaramen ad qerrben akteṛ ɣer Yahwa yerna ad ḥeṛcen deg wayen akk yeɛnan aberreḥ w’ad kemmlen leqdic-​nsen s nnṣaḥa.

Aɣerbaz n iberraḥen n Tgelda. Aɣerbaz-​agi, itekken cehṛayen, yeţwaxdem bac ad ɣren deg-​s inaramen ijeṛṛben mliḥ aberreḥ yerna i gqeblen ad ǧǧen amḍiq ideg i zedɣen bac ad qedcen deg wemkan nniḍen anda iwulem leqdic-​nsen. Am wakken qqaren-​as: “Aql-​i, ceggeɛ-​iyi!” Deg waya cuban Ɛisa Lmasiḥ, yellan d Aberraḥ akk ifazen di ddunit. (Icɛaya 6:8; Yuḥenna 7:29) Wid i gqesden ad beddlen amḍiq, ilaq-​asen tikwal ad ǧǧen kra si leḥwayeǧ i llan kesben, yeɛni ad xedmen ţţawil iwakken aţ-​ţifsus temɛict-​nsen. Uyerna, leɛwayed, liḥala n tegnawt akk-​d lmakla yellan deg wemkan-​agi, uɣur ara ṛuḥen, mxallafent ahat ɣef wayen akk i wulfen. Tikwal daɣen, ilaq-​asen ad lemden lluɣa tajdiṭ. Aɣerbaz-​agi yeţwaxdem i watmaten ţ-​ţyessetmatin izewǧen neɣ ur nezwiǧ ara, yesɛan ger 23 d 65 n sna. Iţɛawan-​iten ad kesben ṣṣifat ara ḥwiǧen anda ara ţţuceggɛen akk-​d lḥirfat swayes ara ten-​issexdem akteṛ Yahwa akk-​d ţ-​ţuddsa-​ines.

Aɣerbaz n Gilɛad ireṣṣan ɣef Wedlis Iqedsen. S tɛibṛanit, ameslay “Gilɛad” lmeɛna-​s “aɛemmuṛ yellan d ccahed.” Segmi i geldi uɣerbaz-​agi di 1943, issufeɣ-​ed akteṛ n 8 000 n yemceggɛen bac ad fken cchada s ubecceṛ-​nsen “alamma d lqern n ddunit.” (Lecɣal 13:47) Asmi i wwḍen wid yeɣran di Gilɛad ɣer tmurt n Biruw, ur telli ula d yiwet n tejmaɛt dinna. Ass-​a, llant wakteṛ n 1 000. Asmi i bdan ţberriḥen yemceggɛen-​nneɣ di Jabun, ur wwiḍen ara ɛecṛa n Inagan i gellan deg-​s. Ass-​a, ɛeddan 200 000. Deg uɣerbaz-​agi, itekken xemsa wagguren, qqaren mliḥ Awal n Ṛebbi. Llakul-​agi yeţţeɛraḍ-​ed inaramen imxulaf, imceggɛen, At Bitil, akk-​d ineqqaden n tɣalayt ţ-​ţlawin-​nsen bac a sen-​d-​iţţunefk uselmed iǧehden swayes ara reṣṣin yerna ara snernin ccɣel n uberreḥ di ddunit kamel.

• Acu i d leqsed n Uɣerbaz n inaramen?

• Anwa i gzemren ad iɣer deg Uɣerbaz n iberraḥen n Tgelda?