Di lqern amezwaru, d “imceggɛen akw-​d imeqwranen” di Yarucalim i gellan d asqamu amwellah, yeɛni ţ-​ţarbaɛt tamecṭuḥt i geţţaṭṭafen leqrarat imeqranen yeɛnan akk imasiḥiyen yeţwadehnen n zzman-​nni. (Lecɣal 15:2) Ssawaḍen ad mtafaqen m’ara ṭṭfen ṛṛay. Bac ad leḥqen ɣer waya, ssenqaden Tira Iqedsen yerna ţţaǧǧan ṛṛuḥ n Ṛebbi a ten-​iwelleh. (Lecɣal 15:25) Kifkif daɣen deg wayen yeɛnan Asqamu amwellah n wass-​a.

Ţ-​ţarbaɛt n imasiḥiyen i gessexdam Ṛebbi bac ad yeḍru lebɣi-​s. Imasiḥiyen yeţwadehnen i gellan deg Wesqamu amwellah ţţaken mliḥ lqima i Wawal n Ṛebbi. Ssnen mliḥ amek i glaq ad yeţwaxdem leqdic-​nneɣ d wamek ara frun timsal yeɛnan ddin. Asqamu amwellah yeţnejmaɛ mkul smana iwakken ad iẓer acu-​tent lmeḥwiǧat n Inagan n ddunit meṛṛa. Am wakken i gella ixeddem wesqamu amwellah n lqern amezwaru, Asqamu n wass-​a daɣen yeţţak-​ed lewṣayat ireṣṣan ɣef Wedlis Iqedsen s tebṛatin akk-​d ineqqaden imsebriden. Ayagi yeţɛawan agdud n Ṛebbi ad yeddukkel deg ixemmimen akk-​d lefɛayel. (Lecɣal 16:4, 5) Asqamu amwellah yeţweṣṣi ɣer uberreḥ yerna yelha-​d d usewǧed n lqut n ṛṛuḥ akk-​d uwekkel n watmaten ɣef kra n lecɣal.

Ţ-​ţarbaɛt n imasiḥiyen i geţţaǧǧan ṛṛuḥ n Ṛebbi a ten-​iwelleh. Asqamu amwellah yeţnadi lwelha n Yahwa, Agellid Ameqran, akk-​d Ɛisa, Aqerru n tejmaɛt. (1 Ikurintiyen 11:3; Ifasusiyen 5:23) Wid yellan deg Wesqamu-​yagi ur ḥsiben ara iman-​nsen d iqerra ɣef wegdud n Ṛebbi. Nutni akk-​d imasiḥiyen nniḍen yeţwadehnen ţeddun “anda yedda izimer”, yeɛni Ɛisa. (Aweḥḥi 14:4) Yeţţeɛǧab-​as mliḥ lḥal i Wesqamu amwellah m’ara neţẓalla ɣef lǧal-​is.

• Anwa i gellan deg wesqamu amwellah di lqern amezwaru?

• Amek i geţnadi Wesqamu amwellah n wass-​a lwelha n Ṛebbi?