Tira tiyunaniyin timasiḥiyin bedrent-​ed aṭas n tikkal Bar-​Naba (Barnabas) akk-​d wemceggeɛ Bulus, yellan d ineqqaden imsebriden i grezzun ɣef tjemmuyaɛ n lqern amezwaru. Ayɣer i llan xeddmen akka? Axaṭer ţḥebbiṛen seg wul ɣef lfeṛḥ n watmaten-​nsen imasiḥiyen. Bulus yenna: “Eyya an-​nuɣal s atmaten-​nneɣ [...] an-​nwali amek i ţţilin.” (Lecɣal 15:36) Yella yewǧed ad iddu acḥal d wacḥal akken ad iṛuḥ a ten-​isseǧhed. D annect-​a daɣen i d leqsed n ineqqaden imsebriden n lweqt-​nneɣ.

Ţţasen-​d iwakken a ɣ-​sseǧhden. Mkul aneqqad n tɣalayt yesteklef s wazal n ɛecrin n tjemmuyaɛ. Sin iberdan i useggas, isɛedday d mkul yiwet seg-​sent smana. Ayen akk i ssnen d wayen i jeṛṛben, ama d nutni ama ţ-​ţulawin-​nsen (ma yella zewǧen), iṣleḥ-​aɣ mliḥ. Ḥemmlen ad issinen imeẓyanen d imeqranen yerna ḥemmlen ad berrḥen yid-​neɣ w’ad ḥedṛen m’ara nɣer Adlis Iqedsen d walbeɛḍ. Rezzun nutni d lecyux ɣef kra n watmaten ţ-​ţyessetmatin n tejmaɛt iwakken a sen-​fken lemɛawna i sen-​iwulmen. Deg inejmuɛen akk-​d yegrawen, xeddmen-​d lxeṭbat i ɣ-​isseǧhaden.—Lecɣal 15:35.

Ţḥebbiṛen ɣef mkul yiwen seg-​neɣ. Ineqqaden n tɣalayt ţɛawanen atmaten ţ-​ţyessetmatin di tjemmuyaɛ bac ad sɛun lɛalaqat iǧehden d Yahwa. Ţnejmaɛen nutni d lecyux akk-​d iqeddacen imɛawnen akken ad ẓren s anda i telḥeq tejmaɛt, akken daɣen a sen-​fken lewṣayat bac ad steklfen akken ilaq s lecɣal i sen-​iţţunefken. Ţɛawanen inaramen a d-​awin akteṛ n lfayda deg uberreḥ. Ḥemmlen ad issinen ijdiden yerna ţnadin ad ẓren amek i ţnernin di leḥwayeǧ n ṛṛuḥ. Yal yiwen seg-​sen yeţţak seg wul si lǧehd-​is yerna “ixeddem yid-[neɣ] ɣef ddemma-[nneɣ].” (2 Ikurintiyen 8:23) Ilaq-​aɣ a ten-​neţɛanad di liman-​nsen akk-​d lɛalaqat i sɛan d Ṛebbi.—Iɛebṛaniyen 13:7.

• Ayɣer i rezzun ineqqaden n tɣalayt ɣef tjemmuyaɛ?

• Amek i tzemreḍ a d-​tesfaydiḍ si tmerziwt-​nsen?