Lecyux-​nneɣ ur llin ara d lḥekkam n ddin i geţwaxellaṣen ɣef wayen i xeddmen. Sɛan lɛalaqa iǧehden akk-​d Yahwa yerna ţwaxtaṛen bac ad ksen tajmaɛt n Ṛebbi, am wid n lqern amezwaru. (Lecɣal 20:28) Ṭṭebbiqen ccuruṭ i d-​iḥudd Wedlis Iqedsen, daymi i ssawḍen ad wellhen tajmaɛt w’a d-​lhin yid-​es. Acu kan, ur xeddmen ara ayagi “s tin n bessif, lameɛna seg wul, [yerna] mačči s ṭṭmeɛ, lameɛna s leḥṛaṛa.” (1 Buṭrus 5:1-3) Acu i xeddmen ɣef lǧal-​nneɣ?

Lehhun-​d yid-​neɣ yerna ţḥaraben fell-​aneɣ. Lecyux ţwellihen tajmaɛt, ţḥaraben fell-​as yerna ţɛawanen-​ţ akken aţ-​ţeṭṭef di Yahwa. Imi ẓran belli d Ṛebbi i ten-​iwekklen ɣef ccɣel-​agi ameqran, ur ḥekkmen ara deg-​neɣ; deg wemkan n waya, ţɛawanen-​aɣ akken a naf akteṛ n lehna d lfeṛḥ. (2 Ikurintiyen 1:24) Lecyux-​agi ţnadin ad issinen mkul yiwen si tejmaɛt, am umeksa i d-​ilehhun d yal tixsi seg wulli-​ines.—Lemtul 27:23.

Ţwerrin-​aɣ-​d amek ara nexdem lebɣi n Ṛebbi. Mkul smana, lecyux sseddayen inejmuɛen bac ad sseǧhden liman-​nneɣ. (Lecɣal 15:32) Irgazen-​agi, yeţţaken mliḥ si tezmert-​nsen, ţţilin daɣen d lemtul n lɛali deg uberreḥ. Ţberriḥen yid-​neɣ yerna sselmaden-​aɣ mkul ṣṣenf n ubecceṛ.

Sseǧhaden-​aɣ. Lecyux ţmeslayen yid-​neɣ di Tzeqqa n Tgelda yerna rezzun-​d fell-​aneɣ s axxam bac ad ɛiwnen mkul yiwen deg-​neɣ akken ad yesseǧhed lɛalaqat-​ines d Yahwa. Xeddmen aya bac a ɣ-​ɛiwnen w’a ɣ-​d-​fken afud s Wedlis Iqedsen.—Yeɛqub 5:14, 15.

Ţ-​ţideţ, lecyux qeddcen di tejmaɛt. Lameɛna, amur ameqran seg-​sen sɛan daɣen lxedma yerna ilaq-​asen a d-​lhin ţ-​ţwaculin-​nsen; annect-​a yeṭṭalab-​asen-​d xilla n lweqt. Atmaten-​agi “iqeddcen” s leɛtab uklalen a ten-​nqader.—1 Itisalunikiyen 5:12, 13.

• D acu i d ccɣel n lecyux?

• Amek i ţɛawanen yal yiwen deg-​neɣ?