Llan lɛibad yeṣfan di ddyanat meṛṛa. Lɛibad-agi yeţwali-iten Ṛebbi yerna yeţḥebbiṛ fell-asen; wagi d lexbaṛ yessefṛaḥen. Lameɛna, aṭas n yir leḥwayeǧ i geţwaxedmen s yisem n ddin. (2 Ikurintiyen 4:3, 4; 11:13-15) Ayen i gḍerrun ass-a yesskanay-ed belli llant ddyanat i gţekkin di rrebrab, deg usenger n ccetlat akk-d lgirrat. Kra n yemḍebbren n ddyanat ţqehhiren arrac imecṭaḥ yerna kra seg yemḍebbren-agi ţekksen fell-asen sser. Wid yeţţamnen s Ṛebbi seg wulawen-nsen tesseḥzan-iten mliḥ liḥala-yagi.​—Ɣer Matta 24:3-5, 11, 12.

 Ddin n ṣṣeḥ yeţţarra lɛezz i Ṛebbi; ma d ddyanat n lekdeb xeddment leḥwayeǧ ur s-neţţeɛǧab ara. Sselmadent tiktiwin (ixemmimen) ur nelli ara deg Wedlis Iqedsen, am lekdubat ɣef Ṛebbi neɣ ɣef lmeyytin. Lameɛna, Yahwa yebɣa ad issinen lɛibad tideţ ɣef wayen i t-yeɛnan.​—Ɣer Ḥizqiyal 18:4; 1 Timutawus 2:3-5.

 Ṛebbi ur t-ţkellixent ara ddyanat i d-yeqqaren belli ḥemmlent-eţ, nutenti, di tin n ṣṣeḥ, d ddunit n Cciṭan i ḥemmlent. (Yeɛqub 4:4) Deg Wedlis Iqedsen, ddyanat n lekdeb s lǧemla ţţusemmant “Babil tameqwrant.” Acuɣer? Axaṭer ddin n lekdeb yennulfa-d mbeɛd Aḥemmal n waman, i d-yeḍran di zzman n Nuḥ, deg yiwet n temdint yeţţusemman Babil (Babilun). Ur yeţɛeṭṭil ara Ṛebbi ad yekkes ɣef tikkelt ddyanat i gxeddɛen imdanen, i ten-yeţmeḥḥinen daɣen.​—Ɣer Aweḥḥi 17:1, 2, 5, 16, 17; 18:8.

 Yahwa ur iteţţu ara lɛibad yeṣfan, yemzerbaɛen di ddyanat n lekdeb n ddunit meṛṛa. S uselmed i sen-yesselmad tideţ, ijemmeɛ-iten-id ɣer ddin n ṣṣeḥ.​—Ɣer Mixa 4:2, 5.

 Yahwa yeţḥebbiṛ ɣef wid i gḥemmlen tideţ akk-d lxiṛ. Yeṭṭalab-asen a d-ffɣen si ddyanat n lekdeb mebla leɛḍil. Win yeţḥibbin Ṛebbi yewǧed ad ibeddel tikli akken a s-yeɛǧeb.​—Ɣer Aweḥḥi 18:4.

 Di lqern amezwaru, lɛibad yeṣfan iɛǧeb-asen mliḥ lḥal asmi i slan i lexbaṛat yessefṛaḥen i ţberriḥen yemceggɛen. S lemɛawna n Yahwa, ḥefḍen amek ara sɛun tamɛict i ten-yessefṛaḥen akteṛ, i ten-yeţɛawanen daɣen akken ad sɛun lmeqsud akk-d usirem di tudert-nsen. Ǧǧan- aɣ-d lemtel n lɛali: mi slan s lexbaṛat-agi yessefṛaḥen, uɣalen fkan i Yahwa amkan amenzu di tudert-nsen.​—Ɣer 1 Itisalunikiyen 1:8, 9; 2:13.

 Yahwa yesteṛḥib s wid akk yeǧǧan ddin n lekdeb iwakken ad uɣalen d iɛeggalen n twacult-is, yeɛni d iqeddacen-is. Ma tqebleḍ ayagi, aţ-ţuɣaleḍ d aḥbib-is, aţ-ţeqqleḍ d aɛeggal n twacult-is yeččuṛen d leḥmala w’a k-d-tṣaḥ tudert n dayem.​—Ɣer Marqus 10:29, 30; 2 Ikurintiyen 6:17, 18.

 Qrib ad yessenger Ṛebbi ddyanat n lekdeb. Wagi d lexbaṛ issefṛaḥen! Ddunit irkelli aţ-ţethenni si lemḥayen-is. Ur ţţuɣalent ara maḍi ddyanat n lekdeb ad ɣurrent neɣ ad bḍunt lɛibad. Taxelqit meṛṛa, ama deg igenwan ama di lqaɛa, aţ-ţeɛbed Ṛebbi awḥid di tdukli.​—Ɣer Aweḥḥi 18:20, 21; 21:3, 4.