Lexbaṛat yessefṛaḥen kkan-d sɣur Yahwa, Ṛebbi aseɛdi, yebɣan ad ilint twaculin ţ-ţiseɛdiyin. (1 Timutawus 1:11) D neţţa i gesbedden zzwaǧ. Zzwaǧ iɛeqden, yeɛni zzwaǧ yeţţuseǧǧlen ɛlaḥsab n lqanun, d lsas n sseɛd n twacult: yeţţak-ed ṭṭmana i imezwaǧen akk-d dderya-nsen. D lwaǧeb ɣef imasiḥiyen ad ţqadaren leqwanen n tmura-nsen deg wayen yeɛnan leɛqed n zzwaǧ.​—Ɣer Luqa 2:1, 4, 5.

 Amek i geḥseb Ṛebbi zzwaǧ? Ɣur Yahwa, zzwaǧ ţ-ţadukli ger wergaz ţ-ţmeṭṭut-is ṭṭul n leɛmeṛ-nsen. Ur yebɣi ara ad myexdaɛen. (Iɛebṛaniyen 13:4) Yekṛeh berru. (Malaxi 2:16) Meɛna, Ṛebbi isemmeḥ i umasiḥi ad yebru w’ad iɛiwed zzwaǧ ma yella yiwen seg imezwaǧen yexdem zzna.​—Ɣer Matta 19:3-6, 9.

 Argaz ţ-ţmeṭṭut-is sɛan lecɣal i sen-yeţţunefken a ten-xedmen di zzwaǧ-nsen w’ad ţţemɛawanen. D ayagi i geqsed Yahwa asmi i ten-id-yexleq. (Laṣel n ddunit 2:18) Imi d argaz i d aqerru n twacult, yesɛa lecɣal iɣef i geţţuwekkel. Yewwi-d a d-yessis lmeḥwiǧat n cci n tmeṭṭut-is d warraw-nsen. Yewwi-d daɣen a sen-iheddeṛ ɣef Ṛebbi w’a sen-isselmed a t-issinen. Ilaq daɣen ad iḥemmel tameṭṭut-is w’ad yili yewǧed ad isebbel iman-is, neɣ kra n leḥwayeǧ, ɣef ddemma-s. Argaz ţ-ţmeṭṭut-is ilaq ad myeḥmalen w’ad ţţemqadaren. Imi irgazen ţ-ţlawin meṛṛa ɣellṭen, ilaq ad ḥefḍen ad ţţemsamaḥen. Ssmaḥ d yiwet ger leḥwayeǧ i d-yeţţawin sseɛd di zzwaǧ.​—Ɣer Ifasusiyen 4:31, 32; 5:22-25, 33; 1 Buṭrus 3:7.

 Ma yeţwaɣ zzwaǧ-nwen, ilaq aţ-ţxedmem aṭas n lmeǧhudat, i sin yid-wen, iwakken mkul yiwen ad yelḥu i wayeḍ s leḥmala. (1 Ikurintiyen 13:4, 5) Awal n Ṛebbi ur iţweṣṣi ara imezwaǧen ad mfaraqen iwakken ad frun iɣeblan i d-ţmagaren wid izewǧen meṛṛa.​—Ɣer Marqus 10:9.

 Yahwa yebɣa aţ-ţiliḍ d aseɛdi. Yefka-yak-d lewṣayat ifazen iwakken aţ-ţestummneḍ s temẓi-k. Yebɣa aţ-ţeţḥessiseḍ i imawlan-ik, i k-yifen ama di lekyasa, ama deg wayen i jeṛṛben di tudert-nsen. (Ikulusiyen 3:20) Yebɣa-yak daɣen aţ-ţfeṛḥeḍ m’ara txeddmeḍ leḥwayeǧ ɣef ddemma-s Neţţa, yellan d Axellaq-ik, akk-d Mmi-s.​—Ɣer Amusnaw 11:9–12:1; Matta 19:13-15; 21:15, 16.

 Ilaq aţ-ţefkem leɛtab i yiman-nwen akken a d-tessisem i dderya-nwen lmakla, tanezduɣt akk-d llebsa. (1 Timutawus 5:8) Lameɛna, iwakken ad ilin d iseɛdiyen, ilaq daɣen a sen-tesseḥfḍem ad ḥemmlen Ṛebbi w’a t-ǧǧen a ten-isselmad. (Ifasusiyen 6:4) Ma teţbegginem-d di tudert-nwen belli tḥemmlem Ṛebbi, ayagi yezmer a d-yeǧǧ deg-sen lateṛ d ameqran. Ma yella ţṛebga i sen-teţţakem treṣṣa ɣef Wedlis Iqedsen, aţ-ţemsel akken ilaq lɛeqliya-nsen.​—Ɣer Asmekti 6:4-7; Lemtul 22:6.

 M’ara nesseǧhad dderya neɣ m’ara ten-neţcekkiṛ, ayagi yeţţaǧǧa-d lateṛ yelhan deg-sen. Arrac ḥwaǧen daɣen ţṛebga d nnhawi. Aselmed-agi ad iḥareb fell-asen w’a ten-yessebɛed ɣef leḥwayeǧ ara sen-yekksen sseɛd. (Lemtul 22:15) D acu kan, m’ara neţṛebbi dderya, ur ilaq ara maḍi a niwɛiṛ neɣ a niqsiḥ yid-sen.​—Ɣer Ikulusiyen 3:21.

 Inagan n Yahwa ssufɣen-d xilla n tektabin bac ad ɛiwnen lwaldin akk-d dderya. Tiktabin-agi reṣṣant ɣef Wedlis Iqedsen.​—Ɣer Ahellil 19:8, 12.