Lɛibad ad ɛicen i lebda ɣef lqaɛa: deg Wedlis Iqedsen i neţţaf lexbaṛ-agi yessefṛaḥen. (Ahellil 37:29) Deg Wedlis Iqedsen llant 66 n tektabin timecṭaḥ. Ṛebbi yessexdem azal n 40 yergazen yesɛan liman bac a tent-arun. Xemsa tektabin timezwura d Musa i tent-iketben, azal n 35 leqrun aya. Ma ţ-ţaneggarut, d amceggeɛ Yuḥenna i ţ-yuran, akteṛ n 19 leqrun ayagi. Wi ten-ilan ixemmimen i ketben yergazen-agi deg Wedlis Iqedsen? D ixemmimen n Ṛebbi, mačči d ayla-nsen. Ṛebbi yessexdem ṛṛuḥ-is iqedsen bac ad yehdeṛ yid-sen. (2 Camwil 23:2) Ihi, sɣur Yahwa i d-yekka Wedlis Iqedsen.​—Ɣer 2 Timutawus 3:16; 2 Buṭrus 1:20, 21.

 Wali bidyu Sɣur menhu i d-ikka Wedlis Iqedsen?

 Neẓra belli sɣur Ṛebbi i d-yekka Wedlis Iqedsen axaṭer ayen akk i d-yeqqar d wayen i d-yeţciri iḍerru-d swaswa, yerna ur iɣelleṭ ara. Ulac amdan i gzemren ad yexdem ayagi. (Yacuɛa 23:14) Ḥaca Ṛebbi, Bab n Tezmert, i gzemren ad iẓer d acu i geţṛaǧun lɛibad d wayen ara yeḍrun ɣer zdat.​—Ɣer Icɛaya 42:9; 46:10.

 Taktabt ara d-yekken sɣur Ṛebbi ur tezmir ara aţ-ţili am tektabin nniḍen. Ihi, Adlis Iqedsen mačči am tektabin nniḍen: d imelyaṛen i geţwaferqen seg-s s tmeyyatin n lluɣat. Adlis Iqedsen ţ-ţaktabt n zik. Ɣas akken, yeɛdel akk-d tussna (lɛilm). Ur yemxallaf ara wayen i ketben yergazen i t-yuran. a Ala Ṛebbi n ṣṣeḥ, Ṛebbi yeččuṛen d leḥmala, i gzemren a ɣ-d-yefk lexbaṛ yeččuṛen d leḥmala yellan deg Wedlis Iqedsen. Ar ass-a, mazal-it yezmer ad iṣeggem tudert n lɣaci. Ayagi meṛṛa yeţqenniɛ imelyan  n lɛibad belli Adlis Iqedsen d Awal n Ṛebbi.​—Ɣer 1 Itisalunikiyen 2:13.

 Eɛni imi i gɛedda lweqt, yuɣal yeţţuḥerref Wedlis Iqedsen? Iţafţaren iqdimen n Wedlis Iqedsen, yesɛan kteṛ n 2 000 iseggasen, ţţaken-d ţţbut belli tira-yagi i d-yekkan sɣur Ṛebbi wwḍent-ed ɣur-neɣ swaswa akken i llant di tazwara. (Icɛaya 40:8) Ṛebbi ur iɛemmed ara ad yeţţuḥerref Wawal-is.​—Ɣer Ahellil 12:7, 8; 1 Buṭrus 1:24, 25.

 Wali bidyu Amek ara neḍmen belli Adlis Iqedsen sɣur Ṛebbi i d-ikka?

 Aṭas i d-yehdeṛ Wedlis Iqedsen ɣef lexbaṛ-agi yessefṛaḥen: Ṛebbi yesɛa yiwen n lmeqsud ack-it i yemdanen. Yessefhem-ed belli lɛibad sṛuḥen, si tazwara n Ttarix, lemzeyya i sen-yeţţunefken ad ɛicen di lǧennet. Meɛna, yessefhem-ed daɣen belli, yiwen wass, ad uɣalen ad ɛicen di lǧennet ɣef lqaɛa.​—Ɣer Aweḥḥi 21:4, 5.

 Deg Wedlis Iqedsen llan leqwanen, imenzayen akk-d lewṣayat. Llant deg-s daɣen teḥkayin i d-yesskanayen amek i sen-ileḥḥu Ṛebbi i lɛibad. S teḥkayin-agi, nezmer a nẓer ayen i geţxemmim Ṛebbi d wayen is i geţḥussu. Ihi, Adlis Iqedsen yezmer a k-iɛiwen aţ-ţissineḍ Ṛebbi. Yessefham-ed amek i tzemreḍ aţ-ţuɣaleḍ d aḥbib-is.​—Ɣer Ahellil 19:8, 12; Yeɛqub 2:23; 4:8.

 Tareẓẓit-agi a k-tɛiwen aţ-ţfehmeḍ Adlis Iqedsen axaṭer tesselmad akken i gella Ɛisa yesselmad. Ɛisa yeţţader-ed ifyar n Tira Iqedsen, mbeɛd yeţɛawan wid i s-d-yeţḥessisen akken “ad fehmen” lmeɛna-nsen.​—Ɣer Luqa 24:27, 45.

 Acḥal i ɣ-ɛeǧben lexbaṛat-agi yessefṛaḥen i d-yekkan sɣur Ṛebbi! Ɣas akken, llan kra ur sen-d-tewqiɛ ara lmeɛna deg-sen. Wiyaḍ ur bɣin ara maḍi a sen-slen. Meɛna, ur feččel ara. Siwa ma teţnadiḍ aţ-ţissineḍ Ṛebbi ara tizmireḍ aţ-ţesɛuḍ asirem n tudert n dayem.​—Ɣer Yuḥenna 17:3.