Chyum Laika a jahtum na daw hku nga yang, 666 ngu ai gaw nammukdara kaw na dawng pru wa ai nrung shi hte baw sanit tu ai matse labye a amying shing nrai, nambat hpe tsun mayu ai re. (Shingran 13:​1, 17, 18) Dai matse labye gaw, “baw lakung shagu, amyu baw shagu, ga baw amyu shagu hte mungdan shagu” hpe uphkang nga ai mungkan ting hta nga ai mung masa lam hpe tsun ai re. (Shingran 13:7) 666 ngu ai mung masa lam gaw, Karai a man hta tsep kawp awng dang na n re ai lam dan dawng ai. Gara hku nna kun?

  Amying hkam langai sha n re. Karai Kasang gaw amying ni hpe lachyum hte nawng jaw ai. Ga shadawn, “shagrau sha-a hkrum ai wa” ngu lachyum nga ai Abram hpe “masha amyu myu a kawa” ngu nna Karai Kasang ga sadi jaw ai shaloi, “masha amyu baw law law a kawa” ngu lachyum nga ai Abraham ngu nna amying galai kau ya ai. (Ningpawt 17:5) Dai hte maren, matse labye hpe mung shi a laklai ai akyang lailen ni hpe madun ai hku nna, 666 ngu Karai Kasang amying jaw da ai re.

  Nambat kru ngu ai gaw hkum tsup ai lam n nga ai hpe tsun ai. Chyum Laika hta nambat ni hpe masat dingsat ni hku nna lang ai. Nambat sanit gaw hpring tsup ai (sh) hkum tsup ai hpe tsun mayu ai re. Sanit hta langai yawm ai kru gaw, Karai a myi hta n hkum tsup ai (sh) mara kap ai ngu ai re. Dai nambat hpe Karai Kasang a hpyen ni hte matut mahkai nna mung lang ai.​—1 Hkawhkam Labau 20:6; Daniela 3:1.

  Masum lang tsun ai gaw ahkyak shatai tsun ai re. Chyum Laika hta lama ma hpe ahkyak shatai tsun mayu ai shaloi, masum lang tsun ai. (Shingran 4:8; 8:​13) Dai majaw, mung masa lam ni gaw Karai Kasang a myi hta tsep kawp awng dang na n re ai hpe 666 ngu ai nambat gaw madun nga ai. Mung masa lam ni gaw Karai a Mungdan sha lu galaw ya ai agrin mat na simsa lam hte shimlum lam hpe n lu jaw ai.

Matse labye a masat dingsat

 Matse labye hpe “mau mahka” nna nawku ai du hkra hkan nang ai ni gaw, “matse labye a masat dingsat” hpe hkap la ai ni re ngu nna Chyum Laika hta tsun da ai. (Shingran 13:​3, 4; 16:2) Shanhte gaw mungdan hte de a masat dingsat (sh) hpyen luksuk hpe shagrau nna nawku ma ai. Laika buk langai (The Encyclopedia of Religion) hta: “Myu tsaw myit gaw dai ni aten hta nawku dawjau lam langai zawn shingkang ka-up wa ai” ngu nna tsun da ai. a

 Hkra lata hta (sh) lahtan hta matse labye a masat dingsat hpe gara hku shakap da ai kun? (Shingran 13:16) Nye a tara ni hpe ‘nanhte a lata hta kumla tai nga na matu hkawn da nna, nanhte a lahtan hta masat dingsat laika tai nga na’ nga nna Israela masha ni hpe Yehowa tsun wa ai. (Tara Jahprang 11:18) Dai gaw, shanhte a lata ni hte lahtan hta kaja wa gyit hkawn da na matu tsun ai n re ai sha, Karai a tara ni hte maren galaw hkawm sa nna, sawn sumru ra ai hpe tsun mayu ai re. Dai hte maren, matse labye a masat dingsat hpe shakap ai ngu tsun ai shaloi, 666 ngu ai ga si hpe, maksam zawn htu da ai hpe tsun mayu ai n re. De a malai, mung masa lam a shingkang ka-up ai hpe hkam la ai hpe tsun mayu ai re. Matse labye a masat dingsat hpe hkam la ai ni gaw, Karai Kasang a hpyen ni tai mat ma ai. ​—Shingran 14:​9, 10; 19:19-​21.