N galai shai ai. Shaning hkying hku na ai aten laman hta Chyum Laika hpe, hten za loi ai arai ni hpe jailang nna bai ka wa ma ai raitim, lata hte ka ai moi na Chyum Laika ni hte shingdaw yu ai shaloi madung tengman lam gaw maren sha re ai hpe mu lu ai.

 Lata hte ka ai moi na Chyum Laika ni hpe hkying hku mu tam wa sai. Dai hta na nkau gaw n bung ai ni lawm taw ai majaw bai ka ai shaloi, shut wa ai lam nga ai hpe chye lu ai. Raitim, ga yan a lachyum hpe galai shai mat hkra shut taw ai baw gaw nau n nga ai. Mu tam wa ai kaw na lak lak lai lai shut taw nga ai lam gaw, Chyum Laika shiga hpe galai shai kau mayu ai ni a dingsang ka bang tawn da ai ga si ni re.

1.   1 Yawhan 5:7 hpe moi na Chyum Laika ga gale Chyum nkau mi hta “sumsing lamu hta Kawa, Mungga, Chyoi Pra ai Wenyi ngu ai sakse hkam masum nga nna dai masum hte gaw langai sha rai nga ai” ngu nna ka da ai. Raitim, kam mai ai lata hte ka ai moi na Chyum Laika ni gaw, madung laika hta dai ga si ni n lawm ai hpe madun dan nga ai. Hpang de she bai jat bang da ai ga si ni re. a Dai majaw kam mai ai prat dep ga gale Chyum ni hta dai ga si ni n lawm sai.

2.   Lata hte ka ai moi na Chyum Laika ni hta Karai Kasang a amying hpe hkying lam hku mu lu ai. Raitim, ga gale Chyum law law hta Karai Kasang a mying ningsang a shara hta “Karai Kasang” (sh) “Madu” ngu nna galai bang kau ma ai.

 Ya aten, lata hte ka ai moi na Chyum Laika law law hpe mu tam da sai majaw, shut ai lam ni nga n nga tam na matu grau loi mat sai. b Dai ni aten lang nga ai Chyum Laika hpe lata hte ka ai moi na Chyum Laika ni hte shingdaw nna hti yu ai shaloi, Chyum Laika a tup hkrak tengman ai hte seng nna hpa mu lu ai kun?

•   Hebre Chyum Laika (“Ga Shaka Dingsa” ngu masha law malawng shaga) hte seng nna chyum hpaji du William Henry Green ndai hku tsun ai: “Chyum Laika zawn tup hkrak jaw hkra bai ka da ai moi na kaga laika, hpa mung n nga ai ngu na tsep kawp lu tsun ai.”

•   Hkristan Grik Chyum Laika (sh) Ga Shaka Ningnan hte seng nna chyum hpaji du Fredrick Bruce ndai hku ka wa ai: “Grik, Roma laika ka ai sara ni a laika ni hta na, Ga Shaka Ningnan a matu madi madun na sakse gaw grau nna tup hkrak tengman ai. Raitim, Grik, Roma laika ni a tup hkrak tengman ai lam, nga ai n nga ai hte seng nna kadai mung san jep ai lam n nga ma ai.”

•   Lata hte ka ai moi na Chyum Laika ni hte seng nna grai ningtawn ai hpaji ninghkring kaba Sir Frederic Kenyon gaw ndai hku tsun ai. “Chyum Laika hpe lata kaw lang nna, ndai gaw lai mat wa sai tsaban ni hta ahkyak ai madung lam n mat ai sha masha ban prat mi hte prat mi ka wa ai Karai Kasang a tengman ai Mungga nan re ngu nna kadai mung gwi gwi lu tsun ai.”

•   Karai Kasang a amyu masha ni galaw wa ai mara kaba ni a lam hpe Ju (Jew) hte Hkristan Chyum Laika bai ka ai ni gaw tup hkrak jaw ai hku sha bai ka wa ma ai. c (Bu Hkawm 20:12; 2 Samuela 11:​2-4; Galati 2:​11-​14) Dai zawn sha, Ju masha ni madat mara lam n nga wa ai hpe mara shagun da ai, masha a myit mang ai lam hta madung tawn ai myit jasat ni hpe madun dan ai chyum daw ni hpe mung jaw ai hku sha bai ka wa ma ai. (Hosea 4:2; Malahki 2:​8, 9; Mahte 23:​8, 9; 1 Yawhan 5:​21) Ndai labau ni hpe tup hkrak bai ka wa ai hpe yu yang, Chyum Laika hpe bai ka ai ni gaw kam mai ai ni, Karai Kasang a chyoi pra ai Mungga hpe manu shadan ai ni re ai hpe dan len shangun nga ai.

•   Shawng nnan kaw nna, Chyum Laika hpe chyoi pra ai wenyi a shadut ya hkrum ai hte ka na matu galaw ya wa ai Karai Kasang gaw, Chyum Laika a tup hkrak tengman ai lam hpe matut nna makawp maga ya na n re i? d (Esaia 40:8; 1 Petru 1:​24, 25) Karai Kasang gaw moi prat na masha ni hpe sha n-ga, ya aten hta nga ai anhte ni hpe mung Chyum Laika kaw na akyu hkamsha shangun mayu ai. (1 Korinhtu 10:11) “Anhte shakut sharang nga lu nna, Chyum laika ni a shangwi shapyaw ai ga a majaw myit mada shara nga lu u ga, shawng e ka da ai lam shagu gaw, anhte hpe sharin achyin ya na matu, ka da nga sai.”​—Roma 15:4.

•   Yesu hte shi a sape ni gaw bai ka tawn da ai lata hte ka ai moi na Hebre Chyum Laika ni a tup hkrak tengman ai lam hpe kam ai myit hte la kap wa ai.​—Luka 4:​16-​21; Kasa 17:​1-3.