Nawku htung yawng gaw n bung ai. Karai Kasang n hkap la ai nawku htung grai law hkra nga ai lam Chyum Laika hta tsun da ai. Hpa majaw Karai Kasang n hkap la ai hte seng nna, madung lam lahkawng nga ai.

Madung lam 1: Shut shai ai karai ni hpe nawku ai lam

 Shut shai ai karai ni hpe, “masu ai hte kaman lila” ngu ai ga si ni hte Chyum Laika hta tsun da ai. (Yeremia 10:3-5; 16:19, 20) Moi na Israela ni hpe, Yehowa a ndai hku matsun wa ai: “Ngai hta kaga Karai Kasang shaje hpe hkum naw hkum ku et.” (Pru Mat 20:3, 23; 23:24) Israela ni gaw karai shaje ni hpe nawku ai shaloi, “Yehowa Israela hpe masin pawt” wa ai.”​—Bu Hkawm 25:3; Jaw Jau 20:2; Tara Agyi 2:13, 14.

 Dai ni na aten hta mung, “Hpara ngu ai ni” hpe nawku ai hte seng nna, Karai Kasang a myit masa gaw n galai shai ai. (1 Korinhtu 8:5, 6; Galati 4:8) Shi hpe nawku mayu ai ni hpe, hpara shaje nawku ai ni hte n kanawn na matu mung, ndai hku matsun wa ai: “Shanhte a kaang na pru nhtawm, Kaga lak lak rai wa mu.” (2 Korinhtu 6:14-17) Nawku htung yawng gaw bung nna, Karai Kasang hkap la ai nga yang, hpa majaw dai zawn matsun wa ai kun?

Madung lam 2: Teng man ai Karai Kasang n ra sharawng ai lam hku nawku dawjau ai lam

 Israela ni gaw shut shai ai nawku htung ni kaw nna yu hkrat wa ai makam masham hte htung lai ni hpe lang nna, kalang lang Yehowa hpe nawku dawjau wa ai. Teng man ai nawku htung hpe shut shai ai nawku htung hte kayau kau nna nawku ai hpe, Yehowa nyet kau ai. (Pru Mat 32:8; Tara Jahprang 12:2-4) Yesu gaw shi a prat hta nga ai nawku htung ning baw ni hpe, shanhte a nawku daw jau ai lam hte seng nna mara shagun wa ai. Shanhte gaw nawku daw jau ai lam hpe ntsa lam madun nna, “jep ai tara hta lawm ai grau akyu rawng ai, ding hpring ai, matsan dum chye ai hte kamsham ai lam hte hpe nanhte lai kau da myit dai” ngu nna hpyi hpun ai ni hpe Yesu tsun wa ai.​—Mahte 23:23.

 Dai ni aten hta mung dai hte maren re. Teng man lam hpe madung da ai nawku htung langai hpe sha Karai Kasang hkap la ai. Dai teng man lam hpe Chyum Laika hta mu lu ai. (Yawhan 4:24; 17:17; 2 Timohti 3:16, 17) Chyum Laika hte nhtan shai ai hku sharin ya nga ai nawku hpung ni gaw, masha ni hpe Karai Kasang hte tsan gang mat hkra galaw nga ma ai. Masum raitim langai Karai, masha si tim wenyi n si ai, htani htana zingri ai zawn re ai sharin achyin ai lam ni gaw, Chyum Laika hta lawm ai ngu nna masha ni sawn la ma ai. Gaja wa nga yang, dai sharin achyin ai lam ni gaw, shut shai ai hpara ni hpe nawku ai nawku htung kaw nna yu hkrat wa ai re. Dai lam ni hpe sharin achyin ya nga ai nawku htung ni gaw, Karai Kasang hpyi shawn ai lam ni a malai, htung lai ni hpe sha madung tawn nga ai majaw, “kaman lila” rai mat ai.​—Marku 7:7, 8.

 Nawku htung hta hpyi hpun ai ni hpe Karai Kasang n ra sharawng ai. (Titu 1:16) Nawku htung ngu ai gaw, htung lai ni hta sha madung tawn ai n re ai sha, shani shagu asak hkrung hkawm sa ai lam hta akyu nga nna, Karai Kasang hte hku hkau wa hkra karum ya ra ai. Ga shadawn, Chyum Laika hta ndai hku tsun da ai: “Ngai gaw naw ku htung shadik ai wa rai nga nngai, nga nna marai langai ngai myit nawn dam ti mung, tinang a shinglet hpe n chye hkang ai hte, tinang a myit hpe hkalem kau yang, dai wa a naw ku htung, kaman lila sha rai nga lu ai. Naw ku htung chyawm gaw, Ru tsang kyin dut hkrum ai jahkrai nmai ni hte, gaida gaina ni hpe kawan katsan yu yu nna, mungkan ga a awu asin re ai hpe koi kau na gaw, Kawa Karai Kasang a man e san seng ai hte ra n rawng ai naw ku htung rai nga ai.” (Yaku 1:26, 27) Awu asin re ai hpe koi kau ngu ai hte seng nna, King James Version Chyum Laika hta “san seng chyoi pra ai nawku htung” ngu ga gale da ai. Hpa majaw nga yang, san seng chyoi pra nna hpyi hpun ai lam n nga ai sha nawku ai majaw re.