Kaja ai akyang ni gaw lawu na lam 3 hta rawt jat wa shangun lu ai:

1. Kaja ai mying. Tinang a kanawn mazum ai lam ntsa madung nna, masha ni gaw tinang hpe kaja ai hku mu wa chye ai. N kaja ai hku mung mu mat chye ai. Tinang hta kaja ai akyang lailen nga yang, masha ni gaw tinang hpe myitsu ai, chye myit ai ngu mu na re. Shanhte hpe kanawn mazum ai zawn, tinang hpe bai kazawn mazum na re. Nang gaw zai ai rai yang, masha ni gaw nang hpe tingkyeng myit rawng ai wa ngu mu mat chye nna bungli n lu ai, kaga ahkaw ahkang ni n lu mat ai baw byin chye ai. “Mazut ai wa rai yang chyawm gaw na hkum hpe chyu sha machyi shangun nga ndai” ngu Chyum Laika hta tsun da ai.​—Ga Shagawp 11:17, JCLB.

2. Kanawn mazum lam. “Dai nlang hte a ntsa e hkum tsup re ai makyit sumri ngu ai tsaw ra ai myit hpe kahtap hpun nga mu” ngu Chyum Laika hta tsun da ai. (Kolose 3:14) Kanawn mazum lam hte seng wa yang, dai chyum daw gaw grai teng ai. Akyang lailen kaja nna kaga ni ntsa atsawm kanawn mazup ai wa hpe, masha ni hkau mayu ma ai. Mazut nna n kaja ai wa hpe kadai mung kanawn mayu na n re.

3. Masha ni tinang a ntsa kanawn mazum ai lam. “Tinang gaw galoi mung kaja ai hku kanawn mazum na nga yang, aten na wa ai shaloi tinang ntsa galoi mung zai ai wa pyi, shi a lailen galai shai wa ai hpe mu lu na re” ngu nna Janihpa ngu ai num kasha langai tsun ai. Tinang maga na zai ai hku kanawn mazum na nga yang, zai ai wa gaw grau sawng wa na re. “Nanhte hteng ya ai dang hte, nanhte hpe hteng ya na ma rin dai” ngu Chyum Laika hta tsun da ai.​—Mahte 7:2.

Madung Lam: Anhte yawng gaw shani shagu masha ni hpe tsun shaga nga ra ai. Masha ni hpe tinang ntsa gara hku mu shangun mayu ai, gara hku kanawn mazum shangun mayu ai ngu ai gaw, tinang a kanawn mazum lam ntsa hta madung ai. Dai Majaw kaja ai akyang lailen nga na matu grai ahkyak ai.

1. Tinang a akyang lailen hpe sawn maram yu u. Tinang hkum tinang ndai hku san u: “Chyeju hte” “Chyeju kaba sai” ngu galoi mung tsun ai kun? Kaga ni hte ga shaga nga ai aten hta laika hti taw ai, phone hte laika sa taw ai baw ni galaw taw ai kun? Kanu kawa, kahpu kanau ni hpe hkungga ai hku kanawn mazum ai kun? Shing nrai, “nta masha she re” nga nna kam ai hku tsun shaga ai kun?

   Chyum Laika hta tsun da ai lam: “Hkungga lara ai hta shada da shagrau hkat mu.”​—Roma 12:10.

2. Bandung ni jahkrat u. Tinang rawt jat na matu ra nga ai lam 3 hpe ka jahkrat u. Ga shadawn, asak 15 ning daram re ai Elitsan ndai hku tsun ai: “Tinang hkrai tsun nga ai hta na, madat ya na matu mung ra ai.” Asak 19 ning re ai Debit gaw nta masha ni, manang ni hte arau nga taw ai aten hta phone hte laika sa taw ai baw n galaw na matu ra ai ngu tsun ai. “Dai hku galaw ai gaw hkungga lam n nga ai hte bung ai. Nanhte hte shaga na malai kaga langai hte she shaga mayu ai ngu tsun nga ai zawn re” ngu shi tsun ai. Asak 17 re ai Awt Wet chyawm gaw, kaga ni ga shaga ai shaloi, ga pyi n htum shi yang n shang shaga na matu ra ai ngu tsun ai. Janihpa gaw asak kaba ai ni hpe hkungga lara ai hte kanawn mazum na matu daw dan da ai. “Moi nga yang, asak kaba ai ni hpe shakram ai daram sha galaw ai. Ngut yang, ramma shada hpang de sha sa mat ai. Raitim, ya gaw asak kaba ai ni hte kaja wa hkau hkra shakut ai. Dai hku galaw ai majaw, ngai na akyang lailen ni grau kaja wa ai” ngu shi tsun ai.

   Chyum Laika hta tsun da ai lam: “Langai hte langai tinang hte seng ai sha n rai, masha gale hte seng ai hpe mung, myit yu nga mu ga.”​—Hpilipi 2:4.

3. Tinang a rawt jat lam hpe san jep u. Shata mi laman, tsun shaga ai lam hte lailen ni hta rawt jat ai lam nga, n-nga hpe san jep u. Shata htum ai shaloi, tinang hkum tinang ndai hku san u: ‘Nye a tsun shaga lam, lailen ni gaw rawt jat wa ai kun? Gara shara hta rawt jat na matu naw ra nga ai kun?’ Ra nga ai lam ntsa madung nna bandung ni kahtap jahkrat u.

   Chyum Laika hta tsun da ai lam: “Masha ni nanhte hpe hkan galaw na, nanhte tsaw myit dai hte maren, nanhte mung dai zawn shanhte hpe hkan galaw mu.”​—Luka 6:31.