Shatan ai ga nkau mi gaw, na a amying hten na matu dingsang jahpyak tsun ai ga ni re. Kaji kajaw sha shatan ai raitim, hkra machyi shangun ai. Grau nna gaw, tinang hte hku hkau ai wa tsun ai shaloi re!​—Shakawn 55:12-14.

“Manang langai gaw ngai na lam tsun hkawm ai hpe chye kau dat ai. Kaga masha ni tsun yang, ngai dai daram hkamsha na n re. Dai majaw grai myit n pyaw ai! Hpa majaw shi dai hku tsun ai hpe ngai n chye na ai.”​—Eshale.

Tengman lam: Hku hkau ai manang langai (sh) kaga kadai mi rai rai, nang hte seng nna shatan taw ai hpe chye dat yang myit n pyaw ai.

Masha ni gaw lam amyu myu a majaw shatan ai ga ni chye tsun ai. Ndai lam ni hpe yu yu ga:

Kaja wa myit lawm ai majaw. Masha ngu ai gaw, htingbu manaw manang ni hte nga ai baw re. Dai majaw langai hte langai a lam hpe tsun jahta chye ma ai. Chyum Laika hta anhte hpe “masha gale hte seng ai hpe mung, myit yu nga mu” nga nna n-gun jaw da ai.—Hpilipi 2:4.

“Tsun Jahta chyai ai hta myit lawm dik htum lam langai gaw kaga masha ni a lam hpe tsun ai re!”—Biyanka.

“Masha ni a lam hpe ngai chye mayu ai. Chye wa ai lam hpe masha ni hte bai tsun jahta mayu ai. Myit pyaw na matu sha re. Kaga hpa yaw shada lam mung n nga ai.”—Keti.

Lagawn ai majaw. Chyum Laika prat hta na masha nkau mi gaw “amu ningnan lama ma a lam, hkai chyai ai hte madat mara let, nhtoi shalai nna nga nga ma ai.” (Kasa 17:21) Dai ni aten mung dai zawn galaw ai masha ni nga ai!

“Hpa n re ai lam ni hpe myit lawm na zawn, masha ni gaw tsun chye ma ai.”—Joanna.

Manawn ai majaw. Chyum Laika hta anhte hpe tinang hkum tinang kaga ni hte shingdaw ai lam n galaw na matu sadi jaw da ai. (Galati 6:4) Raitim, masha nkau mi gaw kaga masha ni hpe manawn ai majaw shatan ai ga ni shabra ai.

“Shatan ai ga hpe madat yu yang, dai hku tsun ai wa gaw kaning re ai wa re hpe chye lu ai. Shatan hkrum ai wa a ntsa, shi kade daram manawn nga ai hpe mung mu lu ai. N teng ai shiga ni hpe hkan tsun ai shaloi, tinang gaw shanhte hta grau ai ngu nna hkamsha chye ma ai.”—Hpi.

Tengman lam: Shatan ai ga hpe nang ra ai raitim, n ra ai raitim, masha ni gaw na a lam hpe sha n-ga, kaga ni a lam hpe mung tsun taw nga na sha re.

N shatan hkrum na matu nang koi lu na gaw n raitim, shatan hkrum ai shaloi gara hku bai htang na hpe gaw nang lata mai ai. Na a lam ni n teng ai hku shiga chyam bra taw nga ai hpe nang chye mat ai nga yang, yawm htum lam 2 hpe galaw mai ai.

Galaw Mai Ai Lam 1: Dai hpe n chye masu su kau u. Chyam bra taw nga ai shiga gaw nau n ahkyak ai nga yang, kaja htum hparan ai lam gaw, dai hpe n chye masu su kau ai re. “Pawt sindawng hkra myit hkum gadun” ngu ai Chyum Laika a hpaji jaw ga hpe hkan sa u.—Hpaji 7:9.

“Kalang mung n mu ga ai la kasha langai hte ngai sumtsaw byin taw ai ngu nna shiga pru taw ai. Dai shiga gaw n mai byin ai majaw, dai hku sha mani nna tawn kau ai.”—Elit.

“Kaja ai mying lu da ai gaw shatan ai ga ni hpe koi yen kau lu ai kaja htum laknak re. Tinang a lam hpe n kaja ai hku tsun taw ai nga yang pyi, tinang gaw mying kaja lu tawn da ai nga yang masha kachyi mi sha dai hpe kam na re. Tinang hta mying kaja nga hkra galaw yang awng dang lu na re.”—Elisan.

Hpaji jaw ai lam: (1) Nang hte seng nna tsun ai lam hte (2) nang gara hku hkamsha ai lam hpe ka da u. Myit simsa mat nna dai lam hpe a loi sha malap kau lu na re.​—Shakawn 4:4.

Galaw Mai Ai Lam 2: Shatan ai ga hpe tsun hpang ai wa kaw sa nna, myiman hkrum hparan hkat u. Masa nkau hta, chyam bra taw nga ai shiga ni gaw grai sawng ai ngu na nang hkamsha ai nga yang, shatan ai ga hpe tsun hpang ai wa hte hparan na matu ra na re.

“Shatan ai wa hpang de sa nna hparan ai shaloi, shatan ai ga gaw hpang jahtum hta, shatan hkrum nga ai wa kaw sha bai du mat ai ngu ai hpe shanhte chye mat na re. Dai hta n-ga, byin taw nga ai manghkang mung hkoi mat na re.”—Elit.

Na a lam hpe shatan ai wa hte garai n hparan shi yang, lawu na Chyum Laika npawt tara ni hpe atsawm dinglik yu nna, ga san ni hpe tinang hkum tinang san yu u.

• “Naw n sagawn yu ai, ga htan ai wa gaw, Angawk ai mara hte kaya kahpa hkrum na ra ai.” (Ga Shagawp 18:13) ‘Ngai na ai lam yawng gaw jaw ai kun? Nye a lam shatan taw ai ngu nna ngai hpe sa tsun ai dan ai wa gaw shi na shut wa ai gaw n mai byin ai kun?’

• “Na la na matu lawan nga u ga; ga tsun na matu hkum tin nga u ga, masin pawt na matu mung, hkum tin nga u ga.” (Yaku 1:19) ‘Ya aten gaw, shatan ai wa hpang de sa nna hparan na matu kaja htum aten rai kun? Manghkang hparan na matu nye myit ni zim sai kun? Shing nrai, nye myit ni loi zim mat ai aten du hkra chyahkring mi la kau yang grau kaja na kun?’

• “Masha ni nanhte hpe hkan galaw na, nanhte tsaw matsaw hte maren, nanhte mung dai hku shanhte hpe hkan galaw mu.” (Mahte 7:12) ‘Ngai mahtang she shatan ai wa rai yang gaw, ngai kaw gara hku sa nna hparan na hpe ra na rai? Manghkang hpe gara zawn masa hte ngai bawngban mayu ai kun? Gara ga si ni, gara lailen ni gaw kaja htum rai na kun?’

Hpaji jaw ai lam: Shatan ai wa hpang de garai n sa shi yang, tinang tsun mayu ai lam ni hpe ka da u. Bat mi bat lahkawng daram la yu u. Nang ka tawn da ai hpe bai hti yu ai shaloi, nang galai shai mayu ai nga yang, na a kanu kawa (sh) kung hpan ai manang langai hte bawngban nna shi kaw na hpaji hpyi u.

Tengman lam: Prat hta hkrum taw nga ai lam amyu myu zawn sha, shatan ai ga ni hpe mung nang koi yen lu na n re. Raitim, shatan ai ga gaw na a myit hpe n lu hkang ai!