Dinghku num, la ni gaw, kasha lu wa ai shaloi grai pyaw ai zawn, myitru myit tsang lam ni mung hkrum chye ai. Kanu kawa n nan tai ai ten hta, ma hpe bau maka na matu, aten htum nna kade daram myit pu ba ai hpe nang chye wa na. Hkam sha lam ni galai shai wa nna, n lu yup ai ten ni na wa jang, shada da mara mu wa chye ai. Ma hpe bau maka let, dinghku ngang grin na matu mung, nan galaw ra na re. Dai lam ni hpe hparan lu na matu, Chyum ga matsun ni gaw nang hpe hpaji lu jaw ai.

CHYUM LAIKA TSUN AI LAM: “Tsaw ra ai myit gaw galu kaba nga ai, sumnung shingdi nga ai; . . . tinang a akyu n tam ai, sin pawt la htet n nga ai, mara n tam nga ai.” (1 Korinhtu 13:4, 5) Nang kanu byin hpang ai ten hta, ma hpe chyu gawn lajang nga na re. Dai shaloi, na madu wa gaw, shi ntsa na a tsawra myit yawm mat sai ngu hkam sha na re. Dai majaw, shi hpe mung malap da n mai ai. Ma hpe rau gawn lajang na matu, shi hpe myit galu let, tsawra myit hte tsun dan mai ai.

“Lasha ni e, chye chyang ai hku hkan nna . . . numsha hte rau kanawn mazum nga mu.” (1 Petru 3:7) Madu jan gaw, shi a aten law malawng hpe ma a matu sha, jailang na hpe chye na da ra ai. Shi a lit nnan ni a majaw, hkiba lit li ai, myit kaji ai (sh) myit daw ai mung byin chye ai. Kalang lang, nang hpe pyi pawt chye ai. Dai shaloi, “myit galu ai wa gaw n-gun ja ai wa hta . . . grau kaja nga ai” ngu ai Chyum ga hpe dum let, dai masa sim sa mat hkra shakut u. (Ga Shagawp 16:32) Madu jan a ra rawng ai lam hpe hpaji rawng ai hte karum ya u.​—⁠Ga Shagawp 14:29.

NANG GALAW MAI AI LAM:

• Kawa Ni: Madu jan hpe karum ai hku nna, shani sha n ga, shana mung ma hpe jawm woi ya u. Madu jan hte ma a matu, aten grau lu jaw hkra, kaga lam ni hta aten shayawm u

• Kanu Ni: Ma hte seng nna, madu wa a karum shingtau ai hpe hkap la u. Ma hpe atsawm n chye gawn lajang yang, shi hpe mara hkum shagun. Gara hku galaw ra na hpe, tsawra myit hte atsawm madun ya u

CHYUM LAIKA TSUN AI LAM: “Shan lahkawng gaw hkum shan langai sha tai lu na ma ra ai.” (Ningpawt 2:24) Nanhte a dinghku hta, ma lu tim, nan gaw “hkum shan langai sha” naw rai nga ai hpe dum u. Nanhte a dinghku ngang grin hkra, lam shagu hta shakut u.

Madu jan ni, madu wa a karum madi shadaw ya ai hpe chyeju dum u. Dai gaw, nan lahkawng hpe grau tsawra shangun na re. (Ga Shagawp 12:18) Madu wa ni, tinang a madu jan hpe kade daram tsawra ai, manu shadan ai lam tsun dan u. Dinghku kata madu jan galaw wa ai ni hpe shakawn ya u.​—⁠Ga Shagawp 31:10, 28.

“Kadai mung tinang akyu n re ai sha, kaga wa a akyu sha tam nga mu.” (1 Korinhtu 10:24) Ningrum ningtau a matu, kaja dik ai hpe sha ayan galaw u. Rau shaga na matu, shakawn ya na matu, shada da madat ya na matu aten jaw u. Num, la kanawn mazum ai lam hta tinggyen myit hkum rawng. Ningrum ningtau a ra rawng ai hpe myit ya u. “Madu wa gaw htung hte maren madu jan hte kanawn u ga, madu jan mung dai hte maren madu wa hte rai u ga” ngu tsun da ai. (1 Korinhtu 7:3-5) Dai majaw, dai lam hpe nan lahkawng dan dan leng leng bawng ban u. Nan a myit galu ai hte chye na ya ai myit a majaw, dinghku gaw grau ngangkang wa na re.

NANG GALAW MAI AI LAM:

• Nan lahkawng a matu aten san da u

• Ningrum ningtau hpe, tsawra ai lam madun ai hku nna laika kadun sa ai, kumhpa kaji kajaw jaw ai zawn re ai ni galaw u

CHYUM LAIKA TSUN AI LAM: “Nang hpe hpaji byeng-ya jaw lu ai chyoi pra ai Chyum laika ni hpe ma kaji prat kaw nna nang chye nga nit dai hpe mung, a dum nga let, nang sharin la nna myit tawng da ai lam ni hta, a grin nga u.” (2 Timohti 3:15) Ma hpe gara hku sharin ya na hpe myit da u. Ma gaw, kanu a hkritung kaw na pyi, mau na zawn sharin la lu ai atsam nga ai. Na nsen hpe matsing lu ai. Dai hta n-ga kabu ai, yawn hkyen ai hte pawt sin dawng ai ni pyi, shi ntsa akyu byin chye ai. Ma chyangai ten kaw na laika hti dan u. Shi n chye na tim, kaba wa ai shaloi, laika hti sharawng ai ma tai wa na.

Ma asak kade kaji tim, Karai Kasang lam ni tsun dan ai hpe na lu ai. Ma hpe, na kyu hpyi nsen, na shangun u. (Tara Jahprang 11:19) Ma hte ginsup nga ai aten hta pyi, Karai hpan da ai lam ni tsun dan u. (Shakawn 78:3, 4) Dai hku galaw yang, shi kaba wa ai shaloi, nang Yehowa hpe tsawra ai lam, shi chye wa nna, shi mung, tsawra wa na re.

NANG GALAW MAI AI LAM:

• Ma hpe sharin na hpaji jaw ya rit ngu laksan akyu hpyi u

• Ma hpe chye shangun mayu ai lam ni hpe, chyahkring hkring tsun dan u. Rai yang she, ma chyangai ten kaw na sharin la lu na