SHANING law law hta, Daniela laika buk kaw lawm ai Hkawhkam Belashaza gaw, galoi mung n nga ga ai wa re ngu Chyum Laika hpe mara tam ai ni hkrak tsun ma ai. (Dan 5:1) Lamu ga sawk sagawn ai ni gaw, shi kaja wa asak hkrung wa ai hpe madi madun lam n mu ai majaw, shanhte dai zawn kam ai re. Raitim, 1854 hta gaw galai shai mat ai. Hpa majaw kun?

Dai shaning hta, J. G. Taylor ngu ai British sumtsan kasa gaw, ya dingda Iraq kaw nga ai moi Ura mare na hten run nga ai arai nkau hpe tam sawk sagawn wa ai. Langchyi kaba nga ai shara hta, shi gaw laika ka da ai ga tawng law law hpe mu wa ai. Dai ga tawng ni gaw lekma 4 (10 cm) daram galu nna, chyuni hpawm (cuneiform) laika hku nna tawk ka da ai. Dai ga tawng ni kaw na langai hta ka da ai lam kaw, Babelon Hkawhkam Nabonidus hte shi a kasha kaba htum Belashaza hpe asak galu na matu akyu hpyi ya ai ga lawm ai. Belashaza asak hkrung wa ai hpe sakse madun ai ndai lam hpe mara tam ai ni pyi myit hkrum wa ai.

Raitim, Chyum Laika hta, Belashaza nga wa ai hpe sha n-ga, hkawhkam re ai hpe mung tsun da ai. Mara tam ai ni gaw dai hpe mung n kam ma ai. Ga shadawn, tsaban 19 hta, Inglik hpungtang hpaji du William Talbot ndai hku ka wa ai: “Bel-sar-ussur [Belashaza] gaw shi kawa Nabonidus hte arau uphkang wa ai. Raitim, dai lam gaw madi madun lam loi mi pyi n nga ai.”

Dai mara tam ai lam hpe hparan lu wa ai. Kaga ga tawng ni hta ka da ai laika ni kaw, Belashaza a kawa hkawhkam Nabonidus gaw, kalang mi hta shaning na na Babelon kaw nna tsan ai shara de sa mat ai ngu ka da ai. Shi n nga ai laman hta hpa byin wa ai kun? “Nabonidus kaga mungdan de sa ai shaloi, shi gaw shi a tingnyang hte hpyen dap hpe Belashaza kaw kamhpa let ap da ai” ngu laika buk langai (Encyclopaedia Britannica) hta ka da ai. Belashaza gaw dai aten laman, Babelon hta arau uphkang ai wa hku nna uphkang wa ai. Dai majaw, “Daniela laika hta lawm ai Belashaza hpe hkawhkam hku nna shaga da ai gaw” htap htuk ai ngu, lamu ga sawk sagawn hpaji du hte amyu ga hpaji du re ai Alan Millard tsun wa ai.

Karai a mayam ni a matu, Daniela laika hta lawm ai madi madun lam gaw kamhpa mai nna, Karai Kasang shung ya wa ai hpe Chyum Laika nan sakse madun nga ai.​—2 Tm 3:17.