“Karai Kasang hta mying nga ai, n nga ai hpe anhte atsawm n chye ga ai. Nga yang mung Karai Kasang a mying gaw hpa re ai hpe ningmu shai nga ma ai.”—Sara Ningtawn Dew. Hkaniham, Magam Gun.

“Ngai gaw Yehowa rai nga nngai; dai nye a amying shingteng rai nga ai” nga nna Karai Kasang nan tsun wa ai. (Esaia 42:8) Hebre ga hte “Yehowa” ngu ai mying gaw, “shi byin wa shangun ai” ngu lachyum nga ai.—Ningpawt 2:4.

Karai Kasang gaw Yehowa ngu ai shi a amying hpe shaga shangun mayu ai. Chyum Laika hta ndai hku tsun da ai: “Shi [Yehowa] a amying ningsang hpe kajai gumhkawng mu; shi a up hkang ai lam, amyu baw ni hpe shana ya mu; shi amying ningsang galu kaba nga ai hpe, chye shangun mu.”—Esaia 12:4.

Karai Kasang a amying hpe Yesu mung akyu jashawn wa ai. Yehowa hpe Yesu akyu hpyi ai shaloi ndai hku tsun ai: “Na a mying ningsang hpe ngai shanhte e shachye shachyang ma se ai.” Yesu gaw sape ni hpe hpa majaw Karai Kasang a mying chye hkra tsun dan ai rai kun? “Nang ngai e tsaw ra ai n-gaw nwai myit gaw, shanhte hta a nga nga u ga mung, ngai shanhte hta a nga nga na matu mung” re ngu nna shi matut tsun wa ai.—Yawhan 17:26.

“Karai Kasang a mying n chye ai nga yang, shi hpe marai hkum langai hku nna hku hkau lu na n re. Karai Kasang hpe n mu lu ai atsam ngu nna sha chye da ai wa gaw, shi hpe tsawra lu na n rai” nga nna magam gun Wawta Lawri ka wa ai.

Bita gaw nawku jawng bat shagu sa lung ai. Raitim, Karai Kasang hte hku hkau ai ngu nna shi n hkamsha ai. Shi ndai hku tsun dan ai: “Karai Kasang a mying gaw Yehowa re ngu nna chye dat ai shaloi, Karai Kasang gaw shi nan ngai hpe sa shachyen ai ngu nna hkamsha ai. Moi aten hta shi a lam tsawmra na ga da tim, ya she shi hpe mu dat ai zawn hkamsha ai. shi hpe marai hkum langai hku mu wa nna, gau ngwi ngwi hku hkau wa ai.”

Yehowa gaw shi a mying hpe akyu jashawn ai ni hte hku hkau mayu ai myit nga ai. Chyum Laika hta ndai hku ga sadi jaw da ai: “Na a amying chye ai ni nang hta hpa nga nna, Yehowa e, nang hpe tam ai ni hpe, nang kau da ndai n rai.” (Shakawn 9:10) Karai Kasang gaw shi a mying ningsang akyu jashawn ai ni hpe shaman chyeju jaw ai Karai mung re. Chyum Laika hta ndai hku tsun da ai: “Dai Madu a amying nsang hpe shaga ai masha kadai mung, hkye hkrang la ai kaw du lu na ra ai.”—Roma 10:13.