Mungkan ting na asuya ni gaw, langai hte langai tsan tsan nga na matu hte masha law law n hpawng na matu hpyi shawn da ai. Yehowa Sakse Ni gaw asuya a ga hpe madat na matu hte matut nna shimlum let arau nawku dawjau lu na matu dawdan da ai. Dai hku galaw lu na matu, Zoom zawn re ai video matut mahkai mai ai app ni hpe lang nga ai.

Nawku zuphpawng ni hpe ayan galaw lu hkra Zoom account ni hpe alu gumhpraw ni hte mari la na matu Uphkang hpung gaw ahkang jaw wa ai. Account langai gaw dola gumhpraw 15-20 shing nrai, dai hta grau hpu ai majaw, n lu mari lang ai nawku hpung ni a matu grai madi shadaw ya lu wa ai. Dai nawku hpung ni gaw, masha kachyi mi sha mai matut mahkai nna, shimlum lam n nga ai gumhpraw n jaw ra ai app ni hpe lang wa ma ai. Raitim, uhpung a Zoom account ni hpe lang ai nawku hpung ni gaw zuphpawng langai hpra hpe shimlum let masha law law hte lu galaw nga ai. Ya aten hta mungdan 170 jan hta nga ai nawku hpung 65,000 gaw dai account ni hpe lang nga ai.

Indonisha mungdan, Sulawesi zunlawng dingdung, Manado mare hta nga ai Kiragi nawku hpung gaw, manu jahpu n jaw ra ai video matut mahkai mai ai app lang ai hpe jahkring kau nna uhpung a Zoom account hpe lang wa ai. Hpunau Hadi Santoso ndai hku tsun ai: “Zuphpawng galaw nga ai laman chyahkring hkring bai n shang ra ai majaw, electronic jak rai ni hpe nau n chye lang ai hpunau nauna ni pyi zuphpawng hpe atsawm lu lung nga sai.”

Ikwedaw mungdan, Guyagi mare hta nga ai Guyakeni Oste Nawku hpung na myitsu salang Lesta Hihung ndai hku tsun ai: “Nawku hpung nkau hta nga ai hpunau nauna ni gaw gumhpraw nau n nga ai majaw, nawku hpung ting zuphpawng lu lung ai Zoom license hpe n lu mari ai. Ya, uhpung kaw na madi shadaw ya ai Zoom account hpe lang lu ai majaw, masha law law hpe zuphpawng saw shaga lu nga sai.”

Zambia mungdan, Lusaka mare hta nga ai Inwerere Dingdung Nawku Hpung na Myitsu salang Jonsan Mawanza ndai hku ka wa ai: “‘Uhpung kaw na lajang ya ai ndai Zoom lamang gaw hpunau nauna shada da grau nihtep wa ai ngu hkamsha shangun ai sha n-ga, Yehowa anhte hpe tsawra nna lanu lahku ai ngu mung hkamsha shangun ai’ ngu hpunau nauna ni tsun ma ai.”

Uhpung a dai account ni hpe hkye mawai bungli a matu jaw da ai alu gumhpraw hte mari da ai re. Dai alu gumhpraw ni gaw mungkan grup bungli a matu shawang myit hte bang da ai alu ni re. Dai alu law law hpe donate.pr2711.com hku nna bang da ai re. Mungkan ting na hkye mawai bungli a matu madi shadaw ya ai nang bang ai alu a matu grai chyeju dum ga ai.—2 Korinhtu 8:14.