“Hkam sharang ai myit gaw masha ni hpe ngwi pyaw simsa shangun ai.”—Hkam Sharang Ai Myit Nga Ai Lam Npawt Tara Hte Seng Ai YUNESAKO A Ndau Shana Ai Lam, 1995.

 Hkam sharang ai myit n nga yang, kaga ni hpe n hkungga ai, nju ndawng wa chye ai. Dai zawn hkamsha lam nga wa yang, nju ndawng ai ga ni tsun wa na, lailen hte madun wa na, dawsa ai lam ni byin wa na.

 Hkam sharang ai myit nga ai hte seng nna masha ni a ningmu n bung ai. Hkam sharang chye ai wa byin na matu, kaga ni hpa mi galaw tim myit hkrum ra ai, n-gun jaw ra ai ngu, nkau mi shadu ma ai. Nkau rai yang, Chyum Laika a ningmu nga ma ai. Kaga wa a tsang madang hte makam masham hpe myit n hkrum yang pyi, shi a wanglu wanglang lata lu ai ahkang hpe hkungga ai.

 Dai ni aten hta, hkam sharang ai myit nga hkra Chyum Laika gaw karum ya lu ai kun?

Hkam sharang ai myit hte seng nna Chyum Laika tsun ai lam

 Hkam sharang ai myit nga na matu Chyum Laika hta ndai hku n-gun jaw da ai: “Nanhte a rap ra ai lam hpe masha yawng chye wa mu ga.” (Hpilipi 4:5, NWT) Masha ni hpe myit tau ya chye na matu, sumnung shingdi ai hku, rap ra ai hku kanawn mazum chye na matu n-gun jaw nga ai re. Ndai hpaji jaw ga hpe hkan sa ai ni gaw, marai langai ngai a akyang lailen tsang madang ni hpe myit hkrum nna hkan galaw ai baw n nga tim, shi lata da ai hte maren galaw ai hpe gaw n hkum pat ai.

 Raitim, Karai Kasang gaw, shinggyim masha ni a matu akyang lailen tsang madang ni hpe masat da ya ai. Chyum Laika hta ndai hku tsun ai: “Masha wa e, mai kaja ai lam, [Karai Kasang] nang hpe madun dan nit dai.” (Mihka 6:8) Dai zawn lam matsun jaw ai gaw, shinggyim masha ni hpe kaja htum prat lu shangun mayu ai majaw re.—Esaia 48:17, 18.

 Kaga ni hpe jeyang na ahkang Karai Kasang anhte hpe n jaw da ai. Chyum Laika hta ndai hku tsun da ai: “Karai Kasang chyu sha tara jaw ai wa hte jeyang lu ai wa rai nga ai. . . . Na a htingbu wa hpe jeyang ai wa nang gaw kadai wa, rai nga ndai ngu nna nang myit nga n ta?” (Yaku 4:12, JCLB) Karai Kasang gaw anhte langai hpra hpe wanglu wanglang lata na ahkang jaw da ai zawn, lu wa na akyu hpe mung tinang nan lit la ra na re.—Tara Jahprang 30:19.

Hkungga ai lam hte seng nna Chyum Laika hta tsun da ai lam

 “Nlang hte hpe hkungga lara di mu” ngu Chyum Laika hta tsun da ai. (1 Petru 2:17) Dai majaw, Chyum Laika tsang madang hte maren nga na matu lata ai ni gaw, masha yawng hpe hkungga ai hku kanawn mazum ai. Shanhte a makam masham, prat hkrun lam gara hku mi raitim hkungga ai. (Luka 6:31) Raitim, kaga ni a ningmu, kamsham ai lam, dawdan ai lam yawng hpe myit hkrum ai ngu ai lachyum gaw n re. Kaga ni hpe n hkungga ai, zai ai hku kanawn mazum na malai, Yesu a lailen hpe dang lu ai made kasi la na re.

 Ga shadawn, kalang mi hta num langai hte Yesu hkrum ai. Dai num hte kanawn nga ai wa gaw, shi a madu wa n re. Dai num a prat hkrun lam, shi nawku ai hpung hpe Yesu myit n hkrum ai raitim, shi hpe hkungga ai hku Yesu tsun shaga wa ai.—Yawhan 4:9, 17-24.

 Yesu zawn sha, Hkristan ni mung, tinang a makam masham lam madat mayu ai ni hpe, “hkungga lara” let sanglang dan na matu jin jin rai nga ai. (1 Petru 3:15, NWT) Raitim, kaga ni hpe tinang hkam la da ai lam ni hpe hkap la na matu n mai shadut ai lam, Hkristan ni hpe Chyum Laika hta lam matsun da ai. Hkristu a hpang hkan ai ni gaw, “ga law ga la n mai nga ai sha” makam masham n bung ai ni hte hpawn, “yawng mayawng a man e shingdi ai” ni byin na matu tsun nga ai re.—2 Timohti 2:24.

Nju ndawng ai hte seng nna Chyum Laika hta tsun da ai lam

 “Masha yawng mayawng hte ngwi pyaw lu” na matu Chyum Laika hta tsun da ai. (Hebre 12:14) Kaga ni hte htuk hkra nga na matu shakut ai ni gaw, nju ndawng ai myit hpe ninghkap ai. Tinang a tsang madang hte maren nga let, kaga ni hte htuk hkra nga na matu shakut ai. (Mahte 5:9) Tinang a ntsa hta n kaja ai ni hpe pyi, tsawra myit hte kanawn mazum na matu Hkristan ni hpe Chyum Laika hta n-gun jaw da ai.—Mahte 5:44.

 Kaga ni hpe sari jahpoi ai, kaga ni hpe jamjau jaw ai lailen ni hpe Karai Kasang “n dawng” ai, “matsat” ai lam Chyum Laika hta tsun da ai. (Ga Shagawp 6:16-19) Raitim, n kaja ai lailen ni hpe tsep kawp n ra ai hkamsha lam hpe madun dan matu, “n dawng” ngu ai ga si hpe lang da ai re. N kaja ai prat hkrun lam hpe galai shai nna, Karai a tsang madang hte maren nga mayu ai ni hpe, Karai Kasang gaw sharawng awng let mara raw ya ai, karum ya ai ngu Chyum Laika hta tsun da ai.—Esaia 55:7.

Hkam sharang ai myit hte hkungga ai myit nga ai hte seng ai chyum daw ni

 Titu 3:2: “Myit ngwi myit pyaw rawng nna, masha yawng hte hpe lam shagu hta sumnung ai myit madun dan mu ga.”

 Mahte 7:12: “Masha ni nanhte hpe hkan galaw na, nanhte tsaw matsaw hte maren, nanhte mung dai hku shanhte hpe hkan galaw mu.”

 Yawshu 24:15: “Gara hpe mahtang jaw jau na gaw, dai ni jang lata Ia mu.”

 Kasa 10:34: “Karai Kasang masha myi man n tau ai.”

 Habaku 1:12, 13: ‘[Karai Kasang gaw] n hkru n hkra ai hpe n yu ai.’

 Roma 12:19: “Karai Kasang a pawt sindawng na hpe ala nga mu: kaning rai nme law, dai [Yehowa] a tsun ai gaw, Matai htang na ahkang ngai chyu lu nngai, ngai tai na we ai, nga nna ka da nga ai.”

 Yehowa Karai Kasang gaw kadai hpe mung matai htang na ahkang n jaw da ai. Masat da ai aten hta shi nan jeyang ya na re. Grau chye mayu yang, “Tara Rap Ra Lam Lu Na Matu Hpyi Shawn Ai Nsen Hpe Kadai Madat Ya Na Kun?” (Myen) sumhpa hpe yu u.