Shadu ai lam: Yehowa Sakse Ni gaw, Yesu hpe nkam sham ai majaw, Christmas poi n galaw ai re.

 Teng man ai lam: Anhte ni gaw Hkristan ni re. Yesu Hkristu a majaw sha, hkye hkrang hkrum na re ngu, anhte kam sham ai.​—Kasa 4:12.

 Shadu ai lam: Christmas poi n galaw na matu, sharin ya nna, dinghku hta myit garan hkra galaw nga ai.

 Teng man ai lam: Anhte a dinghku hpe anhte grai lanu lahku ga ai. Grau kahkyin gumdin ai dinghku byin wa na matu, Chyum Laika hpe jailang ai.

 Shadu ai lam: Gam jaw gam ya kam ai, mungkan ntsa simsa lam hte Karai Kasang a myiman lu lam ngu ai “Christmas namchyim” hpe nanhte sum mat sai.

 Teng man ai lam: Anhte ni gaw, gam jaw gam ya kam ai ni, simsa lam nga ai ni byin na matu, shani shagu shakut nga ai. (Ga Shagawp 11:12; Roma 12:18) Ga shadawn, anhte zuphpawng ni galaw ai lam hte hkaw tsun lam ni hta, “jahpu n ya ai sha nanhte lu la mu ai rai nna jahpu nhpyi ai she jaw ya mu” ngu ai Yesu a ga hte maren galaw ga ai. (Mahte 10:8) Dai hta n ga, mungkan ting simsa lu na matu, Karai Kasang A Mungdan sha, anhte a myit mada shara re ai lam hpe mung, tsun dan ga ai.​—Mahte 10:7

•   Yesu gaw, shi shangai ai nhtoi hpe poi galaw na n htet da ai. Si ai nhtoi hpe myit dum poi galaw na matu sha htet da ai.​—Luka 22:19, 20.

•   Yesu a kasa ni hte moi na sape ni Christmas poi n-galaw ma ai. New Catholic Encyclopedia ngu ai laika buk hta ndai hku tsun ai: “Yesu shangai ai poi hpe C.E 243 hpang de she galaw ma ai.” Dai gaw, Yesu a kasa ni si mat ai hpang, shaning latsa jan na jang she galaw ai.

•   Yesu a shangai nhtoi hpe Chyum Laika hta n mu lu ai. December 25 hta shangai ai lam hte seng nna hpa sakse mung n nga ai.

•   Christmas poi galaw ai hpe, Karai Kasang n ra ai ngu anhte kam ai. Hpa majaw nga yang, Christmas poi gaw, shut shai ai nawku htung lai len ni kaw na yu hkrat wa ai majaw re.​—2 Korinhtu 6:17.

 Masha law law gaw, Christmas poi gaw shut shai ai nawku htung kaw na yu hkrat wa nna, Chyum Laika sakse mung n nga ai hpe chye ninglen matut galaw ma ai. Shanhte ndai hku tsun chye ai: Christmas poi n-galaw nna, masha ni nju ai baw gaw n kam byin ai.

 Chyum Laika hta, “chye ginghka ai myit” hpe jailang nna myit na matu, anhte hpe n-gun jaw da ai. (Ga Shagawp 3:21, 22) Teng man ai lam hpe, manu shadan na matu mung sharin ya ai. (Yawhan 4:23, 24) Masha ni anhte hpe gara hku mu mada ai lam ahkyak n la tim, n ju n dawng hkrum ai nga yang pyi, Chyum Laika Tara ni hpe matut hkan sa na re.

 Anhte gaw, Christmas poi n-galaw ai raitim, Christmas poi galaw ai, kaga masha ni a ahkaw ahkang hpe n-gawn nsawn n galaw ai. Kaga masha ni Christmas poi galaw ai hpe mung, dingbai dingna njaw ai.