Jawng hpaji hte seng nna anhte a ningmu gaw, Chyum Laika npawt tara ni hta madung tawn ai. Lawu na Chyum Laika npawt tara ni hpe, gara hku akyu jashawn na hte seng nna, Yehowa Sakse langai hpra gaw Chyum Laika hte shaman da ai myit nsam hte maren, dawdan lam ni jahkrat ga ai. a

•  Jawng Hpaji Gaw Ahkyak

•  Jawng Hpaji Hpe Rap Ra Ai Hku Mu Mada Ging

•  Madang Tsaw Hpaji Gaw Akyang Lailen Hte Nawku Dawjau Lam Hpe Shoihpa Jaw Chye

•  Yehowa Sakse Ni Hta Sunday School Nga Ai Kun?

 Jawng hpaji gaw, “hpaji madung hte chye ginghka ai myit rawng” wa hkra karum ya ai. Dai atsam ni nga na matu mung, Chyum Laika hta n-gun jaw da ai. (Ga Shagawp 2:​10, 11; 3:​21, 22) Yesu mung shi hpang hkan ai ni hpe, shi sharin ya wa ai lam ni hpe bai sharin ya chye na matu, n-gun jaw wa ai. (Mahte 28:19, 20) Dai majaw, Yehowa Sakse ni gaw shanhte a nawku hpung hta nga ai masha ni hpe laika ka chye, hti chye, tsun shaga chye na matu b hte kaga nawku htung ni a lam, htunghking ni a lam hpe mung chye da na matu n-gun jaw ga ai.​—1 Korinhtu 9:​20-​22; 1 Timohti 4:​13.

 Asuya ni mung, jawng hpaji a akyu ni hpe chye ai majaw, law malawng hku nna ramma ni hpe lawu tsang hte lapran tsang jawng hpaji hpe sharin na matu hpyi shawng ma ai. “Shinggyim masha nlang hte gaw, daru magam ahkang aya lu ai ni a npu e a taw nga mu” ngu ai tara hte maren, dai hku hpyi shawng ai hpe anhte hkan sa ga ai. (Roma 13:1) Ma ni jawng hpaji sharin ai daram sha n-ga, laika shakut nna tatut akyu jashawn na matu mung n-gun jaw ga ai. c Chyum Laika hta ndai hku tsun ai: “Nanhte hpa galaw ti mung, masha a matu galaw ai zawn n rai, Karai Kasang a matu galaw ai zawn, nanhte a myit masin yawng hte ashaja nga mu.”​—Kolose 3:​23, JCLB.

 Jawng hpaji gaw nta masha ni hpe madi shadaw na matu karum ya lu ai. Chyum Laika hta “marai langai ngai tinang hte seng ai ni hpe n bau ai hta n-ga, tinang a nta na ni hpe n bau ai wa gaw, dai makam masham hpe nyet kau nna, n kam n sham ga ai wa hta grau nna n hkru nga ai” ngu nna tsun da ai. (1 Timohti 5:8) Jawng hpaji gaw nta masha ni hpe madi shadaw ra na laksan lit hpe gun hpai lu hkra karum ya ai. Mungkan Hparat Chyum (The World Book Encyclopedia) hta jawng hpaji a madung yaw shada lam hte seng nna, “sut hpaga lam hta, bungli galaw nna . . . masha uhpung uhpawng hpe akyu jaw lu ai masha ni byin wa na matu re” ngu tsun da ai. Hpaji chye ai wa gaw, hpaji n chye ai wa hta grau nna dinghku hpe madi shadaw ya lu ai.​—Ga Shagawp 22:29.

 Kanu kawa ni gaw, ma ni asak ram wa ai aten a matu hkyen lajang ya ai hku nna, jawng shalun ya nna, madi shadaw ya ga ai. (2 Korinhtu 12:14) Shanhte nga ai shara hta manu jahpu n jaw ra ai sha jawng n mai lung ai, lung na matu yak ai, jawng lung na matu n-gun n jaw ai htung lailen nga yang pyi, ma ni hpe jawng tawn na matu anhte n-gun jaw ga ai. d Ma ni a jawng hpaji hte seng nna kanu kawa ni hkan sa mai ai hpaji jaw ga ni hpe mung, anhte tsun dan ga ai. e

 Jawng hpaji hpe anhte atsawm myit nna lata ga ai. Chyum Laika hta ndai hku tsun da ai: “Nyan tang ai wa gaw na mana kam nga ai; Myit su ai wa chyawm gaw tinang sa wa ai lam gawn yu nga ai.” (Ga Shagawp 14:15) Kahtap nna hkaja na jawng hpaji a jarit hte lu la na akyu ni hpe atsawm sha sawn dinglik nna, dai npawt tara hpe hkan sa ga ai. Ga shadawn, kan bau bungli a matu hpaji hpe sharin la ai gaw, aten nau n ma ai sha n-ga, grau pyi akyu nga chye ai.

 Chyum Hpaji gaw jawng hpaji hta grau nna akyu nga ai. Jawng hpaji hte n bung ai sha, Chyum laika hpe madung da ai hpaji gaw Karai Kasang hte seng ai lam hpe sharin ya nna, asak lu shangun ai. (Yawhan 17:3) “Ding hpring ai lam, tara dara ai lam, Teng man ai lam hte mai kaja ai lam” zawn re ai, akyang lailen madang ni hpe mung sharin ya ai. (Ga Shagawp 2:9) Kasa Pawlu gaw dai ni aten na, dakkasu jawng hpaji hte bung ai jawng hpaji hpe sharin hkam la wa ai. Raitim, shi gaw Yesu Hkristu hpe chye chyang lu ai hpaji gaw grau htum ai ngu hkam la wa ai. (Hpilipi 3:8; Kasa 22:3) Dai zawn sha, dai ni aten na madang tsaw hpaji hpe sharin la wa ai Yehowa Sakse ni mung Chyum Laika hpaji gaw grau kaja ai ngu hkam la ga ai. f

 Chyum Laika hta ndai hku tsun da ai: “Hpaji rawng ai wa gaw, n kaja ai hpe tau chye nna, koi kau nga ai.” (Ga Shagawp 22:3) Dakkasu jawng (sh) madang tsaw jawng ni a makau grup-yin gaw, akyang lailen hte nawku dawjau lam hpe shoihpa jaw chye ai lam Yehowa Sakse Ni sadi hkrup wa ai. Dai majaw, Yehowa Sakse Ni gaw madang tsaw hpaji hpe n sharin na matu (sh) ma ni hpe n shalun na matu lata wa ma ai. Madang tsaw hpaji jawng ni gaw, lawu na shut ai ningmu ni hpe n-gun jaw nga ai ngu sawn la ga ai.

•   Chye Na Shut Ai Lam: Gumhpraw lu yang ngwi pyaw nna shimlum ai

   Madang tsaw jawng hpaji gaw, shang gumhpraw kaja ai bungli hpe lu shangun ai ngu tsun ai majaw, dai yaw shada lam hte dakkasu lung ai jawng ma ni grau law wa ai. Gumhpraw lu yang ngwi pyaw nna, shimlum na re ngu myit mada ma tim, dai hku myit ai gaw kaman lila sha re ngu Chyum Laika hta tsun da ai. (Hpaji 5:10) “Gumhpraw marin ai myit chyawm gaw, n hkru n hkra ai amyu myu a ru npawt rai” nna, makam masham hpe hten za shangun chye ai ngu nna mung Chyum Laika hta tsun da ai. (1 Timohti 6:10) “Hkalem kau ai sutgan” mahkam hta n hkrat mat na matu, Yehowa Sakse Ni gaw sadi ma ai.​—Mahte 13:22.

•   Chye Na Shut Ai Lam: Arawng sadang hte madang tsaw na matu madang tsaw jawng hpaji hpe hkaja ra ai

   Ga shadawn, Georgia mungdan a moi na hkringmang daju Nika Gilawri gaw, mung masha ni a ningmu hte seng nna ndai hku ka wa ai: “Dakkasu janmau gaw Georgia mung masha ni a n lu n mai ai masat langai rai wa sai. . . [Moi gaw] dakkasu janmau n lu ai ramma ni gaw nta masha ni a matu myit kaji hpa re.” g Raitim, ndai mungkan hta arawng sadang n tam na matu Chyum Laika gaw sadi jaw da ai. ‘Shada da shakawn shagrau nna arawng sadang jaw ai hpe hkam la mayu ai majaw . . . nanhte gaw ngai hpe kaning rai kamsham lu na myit ta?’ ngu nna nawku htung ningbaw ni hpe Yesu tsun wa ai. (Yawhan 5:44, JCLB) Dakkasu a grup-yin gaw, gumrawng gumtawng ai myit jasat shang wa hkra n-gun jaw lu ai. Gumrawng gumtawng ai myit hpe Karai Kasang nju ndawng ai.​—Ga Shagawp 6:16, 17; 1 Petru 5:5.

•   Chye Na Shut Ai Lam: Masha gaw jaw ai, shut ai tsang madang hpe tinang hkrai dawdan ging ai

   Yehowa Sakse Ni gaw Karai Kasang jahkrat da ai jaw ai, shut ai tsang madang hpe hkap la ga ai. (Esaia 5:20) Nanghpam Tsi Hte Tsa Chyaru Hpaji Jaw Journal a sumhpa langai hta tsun da ai hku nga yang, dakkasu jawng kaw ramma shada shadut ai majaw, jawng ma law malawng gaw “tinang chye da ai jaw ai, shut ai tsang madang hpe ning hkap nna galaw ma ai” ngu nna tsun da ai. h Dai sawk sagawn ai lam gaw, “N kaja ai kanawn manang ni, mai kaja ai arawn alai hpe jahten ma ai” ngu ai Chyum Laika npawt tara hte maren rai nga ai. (1 Korinhtu 15:33) Dakkasu jawng grup-yin gaw lu lai sha lai ai, nanghpam tsi lang ai, n hkungran ai sha nga sha ai zawn re ai, Karai Kasang n galaw shangun ai akyang ni hpe, yu maya hku nna sha galaw nga nna, dai hku galaw na matu mung n-gun jaw nga ai.​—1 Korinhtu 6:11; 2 Korinhtu 7:2.

•   Chye Na Shut Ai Lam: Madang tsaw jawng hpaji gaw mungkan hpe rawt jat hkra galaw na matu kaja htum lam re

   Masha law law gaw sut su nga mai na matu, arawng lu na matu, ngwi pyaw na matu n re ai sha, tinang hte mungkan hpe rawt jat hkra galaw ya na matu, madang tsaw hpaji hpe hkaja nga ma ai. Ndai gaw kaja ai bandung raitim, Yehowa Sakse Ni gaw kaga lam langai hpe lata ga ai. Karai Kasang a mungdan sha grau kaja ai mungkan shabyin ya lu ai ngu ai hpe Yesu zawn, anhte mung kam ga ai. (Mahte 6:9, 10) Karai Kasang a Mungdan gaw mungkan hta byin nga ai manghkang ni hpe hparan ya na matu, anhte hpa n galaw ai sha la nga ai gaw n re. Yesu zawn, anhte gaw mungkan ting hta “mungdan a kabu gara shiga” htawn tsun nga ga ai. Shaning shagu masha sen hku law ai ni hpe grau kaja ai asak aprat lu la hkra karum ya nga ga ai. i​—Mahte 24:14