Mungkan ting na anhte a magam bungli hpe, Yehowa Sakse ni a shawang myit hte bang ai alu gumhpraw ni hte galaw nga ai. a Anhte a nawku zuphpawng galaw ai shara ni hta, alu sutdek ni tawn da ai. Alu jaw mai ai kaga ladat ni hpe mung, Donations ngu ai laika man hta madun da ai. Mungkan grup bungli a matu jaw na kun? buga htum jarik ni a matu alu jaw na kun? (sh) lahkawng yan a matu jaw na kun? ngu ai hpe lata mai ai.

 Htam shi alu jaw na matu, masat da ai daram jaw na matu, shang gumhpraw a kade shadang hpe jaw ra ai ngu nna, Yehowa Sakse Ni kaw na n hpyi shawn ai. (2 Korinhtu 9:7) Anhte a nawku zuphpawng ni hta, alu hkan hta ai lam ni n galaw ai zawn, hpung magam gun ni kawn hkalup hkam ya ai, makoi mayang galaw ai, hkungran poi hte kaga nawku htung lamang ni hpe galaw ai majaw, shabrai hpyi shawn ai lam ni n galaw ai. Muk dut ai poi, alu tam gat dut poi, ginsup shingjawng poi, kanibe poi, shana shat sha poi, me galaw ya ai lam ni zawn re ai, alu tam poi ni hpe galaw nna, alu tam ai lam ni n nga ai. Alu hkan lahkawn hkawm ai lam ni mung n galaw ai. Alu jaw ai ni a lam hpe ndau shana ya ai, masha law law chye hkra tsun dan ai lam ni hpe n galaw ai. (Mahte 6:2-4) Alu gumhpraw lu hkra, anhte a website hte laili laika ni hta ndau shana dan ai ni hpe n galaw ai.

 Yehowa Sakse Ni a nawku hpung shagu hta, shata shagu a alu jahpan hpe nawku zuphpawng ni hta ndau shana ya ai. Alu ni hpe htap htuk ai hku jailang nga ai hpe chye hkra, nawku hpung a gumhpraw jahpan ni hpe ayan na jep ai.​—2 Korinhtu 8:20, 21.

•   Alu Sut Dek Ni: Nawku Htingnu Ni, Zuphpawng Htingnu Ni hte anhte a zuphpawng ni galaw ai kaga shara ni hta tawn da ai alu sutdek ni hta gumhpraw (sh) check letmat ni bang mai ai.

•   Internet kaw na alu bang ai lam: Mungdan law law kaw, “Donate to Jehovah’s Witnesses” ngu ai laika man hpe akyu jashawn nna, hkretdit kat (credit card), debit kat (debit card), ban kaw nna gumhpraw shalai ai lam (bank transfer) hte kaga electronic ladat ni hte alu jaw mai ai. b Yehowa Sakse nkau mi gaw, dai ladat ni kawn langai ngai hpe lang nna, galoi shagu alu bang lu hkra “alu mahkawng da” na matu dawdan da ai.​—1 Korinhtu 16:2.

•   Tau Hkrau Shajin Nna Alu Jaw Ai Lam: Alu bang mai ai ladat nkau mi gaw, tau hkrau shajin da na matu hte (sh) upadi lam matsun ni ra ai. Dai zawn shajin da yang, na a mungdan hkansi hte seng ai akyu amyet ni lu mai ai. Masha law malawng gaw, shanhte asak hkrung nga ai laman galaw da mai ai (sh) si ai hpang akyu byin hkra alu jaw ai lam hpe, grau chye wa ai majaw akyu hkamsha wa ai. Lawu na ladat ni hte alu jaw mayu jang, kahtap na chye mayu ai lam ahkri ahkrai hpe buga a ginjaw garan rung hpe matut mahkai u.

  •   bank account ni

  •   amahkam hte bungli hkring shabrai hkam la ai ni

  •   nta, htingnu ni

  •   sheya letmat hte gumhpraw hkoi ga shaka ni

  •   si numhtet laika hte ap ya ai ga shaka ni

 Na a buga hta alu jaw mai ai ladat ni hte seng nna kahtap chye mayu jang, “Donate to Jehovah’s Witnesses” ngu ai laika man hta yu u.