Uphkang Hpung ngu ai gaw, mungkan ting na Yehowa Sakse Ni hpe lam matsun ya nga ai, mahkrum madup nga nna atsam ningja hpring ai Hkristan hpung kaji langai re. Shanhte galaw ai bungli lahkawng gaw:

•   Chyum Laika lam matsun ni hpe laili laika ni, zuphpawng ni hte Yehowa Sakse Ni a sharin jawng ni kaw nna, sharin achyin ya lu hkra woi awn ya ai.—Luka 12:42.

•   Shanhte gaw, hkaw tsun bungli hpe lam matsun ya ai, alu gumhpraw ni hpe lajang ya ai hku nna mungkan ting hta nga ai Yehowa Sakse ni a bungli hpe woi awn ya ai.

 Tsa ban langai aten hta Hkristan nawku hpung ting a malai, ahkyak ai dawdan lam ni hpe dawdan ya wa ai, “Yerusalem de nga ai kasa ni hte salang ni” a kasi hpe Uphkang Hpung shang ni hkan sa ai. (Kasa 15:2) Dai aten na sadi dung ai la ni zawn, Uphkang Hpung shang ni gaw anhte nawku hpung a ningbaw ni gaw n re. Lam matsun lu na matu, Chyum Laika hpe sha kamhpa ma ai. Nawku hpung a ningbaw hku nna Yehowa Karai Kasang gaw Yesu hpe aya tang da ai hpe shanhte hkap la ai.—1 Korinhtu 11:3; Ehpesu 5:23.

 Uphkang hpung shang ni gaw, Kenet Kuk, Gik Hpalige, Sam-myuye Hat, Jekhpri Jaksan, Satibin Lat, Gerit Lawt, Mak Sandasan, Debit Sapalin hte Jekhpri Winda ni re. Shanhte gaw Wawik, Nyu Yawk, U.S.A ginjaw rung hta magam gun nga ai.

 Magam bungli amyu myu hpe woi awn na matu, Uphkang Hpung hpe komiti kru hte hpawng de da ai. Hpung shang langai hpra gaw, komiti langai (sh) dai hta grau nna magam gun ma ai.

•   Bawng Jahkrup Komiti: Ndai komiti gaw upadi hte seng ai lam ni, shingra tara tsin-yam ni, makam masham a majaw zingri zingrat ai lam ni hte Yehowa Sakse Ni hpe hkra machyi shangun ai manghkang kaba ni hpe hparan ya ai.

•   Magam Dap Komiti: Ndai komiti gaw Behtela nta dinghku hte seng ai lam ni hpe woi awn ya ai.

•   Dip Shabra Komiti: Chyum Laika hte seng ai laili laika ni hpe dip shapraw ya ai, Nawku Htingnu gawgap ai, ga gale rung ni hte ginjaw garan rung ni gawgap ai bungli hpe ndai komiti gaw woi awn ya ai.

•   Magam Bungli Komiti: Karai Kasang “mungdan a kabu gara shi ga” hkaw tsun ai bungli hpe woi awn ya ai.—Mahte 24:14.

•   Sharin Achyin Komiti: Zuphpawng ni, sharin jawng ni, nsen rim ai hte video lamang ni hta madun na lam ni hpe, shajin ai hta woi awn ya ai.

•   Ka Lajang Komiti: Ndai komiti gaw, laili laika hte website hta mara na lam ni hpe lit la shajin ya ai zawn, ga gale ai bungli hpe mung woi awn ya ai.

 Uphkang Hpung shang ni gaw, ndai komiti ni hta magam gun nna, uhpung a ra kadawn ai lam ni hpe bawngban na matu bat shagu zuphpawng galaw ai. Zuphpawng hta Chyum Laika hta tsun ai lam ni hpe bawngban nna, chyoi pra ai wenyi lam matsun ya ai hpe hkap la ma ai. Myit hkrum let dawdan lam ni lu jahkrat hkra shakut ma ai.—Kasa 15:25.

 Kamhpa mai ai Hkristan hpunau ni gaw, Uphkang Hpung komiti hpe karum ya ai. (1 Korinhtu 4:2) Shanhte lit ang ai komiti bungli ni hte seng nna mahkrum madup hte atsam ningja nga ai ni re. Bat shagu galaw ai komiti zuphpawng ni hpe mung lung ai. Shanhte gaw dawdan lam n jahkrat tim, manu dan ai hpaji jaw ga ni hpe jaw ai, lam langai ngai hte seng nna shingdu mabyin ni hpe tsun dan ai. Komiti a dawdan lam hte maren galaw nna, dawdan lam a majaw awng dang ai lam ni hpe mung ayan maram yu ai. Mungkan ting na anhte a hpunau nauna ni hpang de sa kawan na matu, Uphkang Hpung gaw shanhte hpe lit jaw ai. Ladu hkrum zuphpawng ni shing nrai, Gilead jawng yu poi ni hta mung shang lawm karum ya ai.