Tũkĩaa kĩkwʼũ nũndũ nĩ mũmaitha na nĩtwosaa matambya ala maĩlĩte nĩ kana tũsũvĩe thayũ witũ. (1 Akolintho 15:26) Ĩndĩ o na ũu wĩ o vo, kwĩthĩwa na wia mwingĩ ĩũlũ wa kĩkwʼũ nũndũ wa kwĩwʼa ngewa na syĩthĩo sya ũvũngũ kũtumaa andũ malika “ũkombonĩ thayũ woo wʼonthe.” (Aevelania 2:​15) Kũmanya ũla wʼo kũkakũtetheesya ndũkakĩe kĩkwʼũ mũno nũndũ wia ũsu nũtonya kũtuma ũema kũtanĩa thayũ.​—Yoana 8:​32.

Ũwʼo ĩũlũ wa kĩkwʼũ

•   Akwũ mayĩsĩ ũndũ. (Savuli 146:4) Kwoou, ndwaĩlĩte kũkĩa ũyona ta ũkathĩna kana ũthĩnwʼe wakwʼa nũndũ Mbivilia ĩelakanĩtye kĩkwʼũ na too.​—Savuli 13:3; Yoana 11:11-​14.

•   Akwʼũ maitonya kũtũũmĩsya. O na andũ ala matũmenete tene methĩawa matetonya me “akwʼũ.” (Nthimo 21:16) Mbivilia yaĩtye kana “kĩmena kyoo na kĩwĩu kyoo, nĩsyaaie.”​—Mũtavanʼya 9:6.

•   Kĩkwʼũ tikyo mũthya witũ. Ngai akathayũũkya andũ ala makwie.​—Yoana 5:​28, 29; Meko ma Atũmwa 24:15.

•   Ngai nĩwathanĩte kana ve ĩvinda ‘kĩkwʼũ kĩtakethĩwa vo ĩngĩ.’ (Ũvuanʼyo 21:4) Mbivilia yaĩtye ta ũũ ĩũlũ wa ĩvinda yĩu: “Ala alũngalu makatiĩwa nthĩ, na makatũa vo kũvika tene na tene,” mate na wia wa kwĩsa kũkwʼa.​—Savuli 37:29.