Nzama Ĩla Ĩtongoesye nĩ kakundi kanini ka Aklĩsto aimu kĩ-veva ala manengae Ngũsĩ sya Yeova ĩũlũ wa nthĩ yonthe mĩtalatala ĩla maĩle kũatĩĩa. Wĩa woo ũkonetye maũndũ aa elĩ:

•   Nĩmo maũngamĩaa kũseũvwʼa kwa ũvoo wʼonthe ũkonetye Mbivilia ũla ũmanyĩawʼa kwĩsĩla mavuku, vitio, maũmbano, na sukulu ila syĩkawa nĩ Ngũsĩ sya Yeova.—Luka 12:42.

•   Nĩmo maũngamĩaa wĩa wa Ngũsĩ sya Yeova ĩũlũ wa nthĩ yonthe kwa kũelesya ũndũ wĩa wa kũtavanyʼa waĩle kũtwaĩĩwʼa na ũndũ mĩvothi ĩla yaumwʼa yaĩle kũtũmĩwa.

 Nzama Ĩla Ĩtongoesye ĩatĩĩaa mũvango ũla waatĩĩawa nĩ “atũmwa na atumĩa” ala maĩ Yelusaleme ĩvindanĩ ya atũmwa, ala meekaa motwi kwondũ wa Aklĩsto ala angĩ onthe kĩkundinĩ kya Kĩklĩsto. (Meko ma Atũmwa 15:2) O ta aũme asu maĩ aĩkĩĩku, ala me nthĩnĩ wa Nzama Ĩla Ĩtongoesye ti mo atongoi ma ũseũvyo witũ. Nĩmasomaa Mbivilia nĩ kana ĩmatongoesye, na nĩmetĩkĩlĩte vyũ kana Yeova Ngai amũnyuvĩte Yesũ Klĩsto ethĩwe mũtwʼe wa kĩkundi.—1 Akolintho 11:3; Aeveso 5:23.

 Ala methĩawa Nzamanĩ Ĩla Ĩtongoesye nĩ Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane, na Jeffrey Winder. Methĩawa ovisinĩ witũ ũla mũnene wĩ Warwick, New York, Amelika.

 Nzama Ĩla Ĩtongoesye nĩvangĩthĩtye kamitii thanthatũ nĩ kana itetheesye maũndũnĩ me kĩvathũkanyʼo wĩanĩ witũ, na kĩla ũmwe woo nĩwĩthĩawa nthĩnĩ wa kamitii ĩmwe kana o mbee wa ĩmwe. Kamitii isu nĩsyo ii:

•   Kamitii ya Avangĩthya: Ĩvangĩthasya maũndũ makonanĩtye na mĩao na kũnengane ũtethyo yĩla mĩisyo yaumĩla, nĩtetheeasya mavindanĩ angĩ ta yĩla Ngũsĩ sya Yeova iũthĩnwʼa nũndũ wa mũĩkĩĩo woo, na maũndũnĩ angĩ ala mendaa kũthĩnĩkĩwa na mĩtũkĩ makonetye Ngũsĩ sya Yeova.

•   Kamitii ya Kũũngamĩa Athũkũmi ma Mbetheli: Nĩyo ĩũngamĩaa mĩvango ĩla yaĩle kwĩkwa kwondũ wa athũkũmi ma Mbetheli.

•   Kamitii ya Wĩa wa Kũtumbĩthya: Ĩũngamĩe wĩa wa kũtumbĩthya na kũkuĩthya mavuku ma kwĩmanyĩsya Mbivilia na kwakwa kwa myako ya kũla tũmbanĩaa, movisi ma ũalyũli, na movisi ma ũvonge.

•   Kamitii ya Ũthũkũmi: Nĩyo ĩũngamĩe wĩa witũ wa kũtavanyʼa ‘ũvoo mũseo wa Ũsumbĩ.’—Mathayo 24:14.

•   Kamitii ya Ũmanyĩsya: Ĩũngamĩe wĩa wa kũseũvya maũndũ ma kĩ-veva ala mamanyĩawʼa kwĩsĩla maũmbano, sukulu, na vitio na syĩndũ sya kwĩthukĩĩsya.

•   Kamitii ya Ũandĩki: Nĩyo ĩũngamĩe kũseũvwʼa kwa lĩu wa kĩ-veva ũla umawʼa kwĩsĩla mavuku na ũvoo ũla wĩkĩawa kĩsesenĩ, na noyo yĩũngamĩe wĩa wa ũalyũli.

 O vamwe na wĩa ũla matethasya kwĩsĩla kamitiinĩ isu, Nzama Ĩla Ĩtongoesye nĩyũmbanaa kĩla kyumwa nĩ kana ĩneenee mavata ma ũseũvyo. Maũmbanonĩ asu, nĩmaneeneaa kĩla Maandĩko maĩtye, na mayĩtĩkĩlya veva mũtheu wa Ngai ũmatongoesye, me na kĩeleelo kya kwĩka motwi me na ũũmwe.—Meko ma Atũmwa 15:25.

 Aa nĩ Aklĩsto ma kwĩkwatwʼa ala matetheeasya kamitiinĩ sya Nzama Ĩla Ĩtongoesye. (1 Akolintho 4:2) Nĩmethĩawa na ũtonyi na ũtũĩka wa wĩa ũla matethasya nthĩnĩ wa kamitii ĩla matetheeasya, na nĩmethĩawa ũmbanonĩ wa kamitii ĩsu ũla wĩkawa kĩla kyumwa. O na kau ti mo mekaa motwi, atetheesya asu nĩmaumasya mawoni na mainengane ũvoo wʼonthe ũla ũtonya kũtethya. O na nĩmaĩkĩĩthasya kana ũtwi ũla weekwa ũmbanonĩ ũsu nĩwaatĩĩwa, na mavinda kwa mavinda moseo ala motwi asu maetete. O na ĩngĩ, Nzama Ĩla Ĩtongoesye nĩtonya kũmatũma mathi makathokee ana-a-asa isionĩ syĩ kĩvathũkanyʼo ĩũlũ wa nthĩ kana makewa maumye maũvoo nthĩnĩ wa maũmbano ala mekawa kĩla mwaka kana sukulunĩ ya Ngileati.